MATTHEW 17 - Efik Old Bible With Sectional Headings

Ekpuhɔre Mbiet Jesus ke Iso Mme Mbet Esie Ita

1EKEM ke usen itiokiet ama ekebe, Jesus ada Peter, ye James, ye John eyen-eka esie, ɔdɔk ke akwa obot ke idem mmɔ:

2ndien mbiet Esie ɔkpuhɔre ke iso mmɔ; iso Esie asiaha nte utin, edisine-ŋkpɔ Esie onyuŋ akabare afia nte uŋwana.

3Ndien sese, Moses ye Elijah ebiɔŋɔ mmɔ ke iso eneme nneme ye Enye.

4Edi Peter ɔbɔrɔ Jesus ete, Ɔbɔŋ, ɔfɔn nnyin ndidu mi: edieke afo onyimede, nyebɔp ataya ita mi; kiet enyene Fi, kiet enyene Moses, kiet onyuŋ enyene Elijah.

5Ke ini enye osuk etiŋde, sese, nyayama ikpa-enyɔŋ ofuk mmɔ: ndien sese, uyo oto ke ikpa-enyɔŋ ɔwɔrɔ, ete, Emi edi edima Eyen Mi, emi mmenemesit ye Enye; ekop uyo Esie.

6Ekem ke ini mbet ekopde uyo oro mmɔ eduɔŋɔ ekibi iso ke isɔŋ, ndik onyuŋ anam mmɔ eti-eti

7Edi Jesus edi edituk mmɔ, ete, Edaha ke enyɔŋ, ekufehe.

8Edi ke ini mmɔ emenerede enyin, mmɔ ikwe baba owo kiet ke mibɔhɔke Jesus ikpɔŋ.

9Ndien nte mmɔ etode ke obot esuhɔre, Jesus owuk mmɔ ete, ekutiŋ ŋkukut emi enɔ baba owo kiet, tutu Eyen Owo eset ke mkpa.

10Mbet Esie enyuŋ ebup Enye ete, Nsinam mme scribe edɔhɔde ndien ete, Elijah enyene ndibem iso ndi?

11Edi Enye ɔbɔrɔ mmɔ ete, Ke akpanikɔ Elijah edidi ndidiɔŋ kpukpru ŋkpɔ.

12Ŋkɔm ndɔhɔ mbufo nte, Elijah ededi ama, ndien mmɔ ikɔdiɔŋɔke enye, edi ema enam enye se mmɔ emade. Kpasuk ntre ke Eyen Owo ŋko eyekut ukut ke ubɔk mmɔ.

13Ekem mbet efiɔk ete Enye etiŋ ye mme imɔ abaŋa John Baptist.

14Ndien ke ini mmɔ esimde otu owo, owo kiet etiene Enye, ɔtɔŋɔ edɔŋ ɔnɔ Enye, ete,

15Ɔbɔŋ, tua eyeneren mi mbɔm; koro enye ɔdɔŋɔde ndisi, onyuŋ otuhɔde eti-eti: koro ediwak ini enye ɔduɔ esine ke mmɔŋ.

16Ndien ŋkada enye nsɔk mbet Fo, edi mmɔ ikemeke ndinam udɔŋɔ okure enye.

17Edi Jesus ɔbɔrɔ ete, O emana unana mbuɔtidem ye emana ukwaŋido, adaŋa didie ke ndidu ye mbufo? adaŋa didie ke ndime ime ye mbufo? Da enye sɔk Mi mi.

18Ekem Jesus asua ɔnɔ demon, enye oro onyuŋ ɔwɔrɔ eyen ke idem; ndien udɔŋɔ okure enye kpa ke ini oro.

19Ekem mbet etiene Jesus ekobup Enye ke ndibe ete, Nsinam nnyin mikekemeke ndibin enye nduɔk?

20Edi Enye ɔdɔhɔ mmɔ ete, Oto ke ntak ekpri mbuɔtidem mbufo.

21Koro ke akpanikɔ ke ndɔhɔ mbufo, Edieke mbufo ekpenyenede mbuɔtidem nte mkpasip mustard, mbufo ekpɔdɔhɔ obot emi ete, daha kpɔŋ ɔtɔ emi, kɔwuhɔ ko, ndien enye eyedaha: baba ŋkpɔ kiet idinyuŋ isɔŋke ikan mbufo.

22Edi ke ini mmɔ esuk esasaŋa ke Galilee, Jesus ɔdɔhɔ mmɔ ete, emɔŋ edida Eyen Owo esin mme owo ke ubɔk, ndien mmɔ eyewot Enye;

23edi eyenam Enye eset ke ɔyɔhɔ usen ita. Ndien mmɔ efuhɔ eti-eti.

24Ekem ke ini mmɔ edukde ke Capernaum, mme ataŋ-okuk utomo temple etiene Peter ete, Nte Andikpep mbufo inɔŋɔ okuk utomo? Peter onyime ete, Enye ɔnɔnɔ.

25Ndien ke ini Peter odukde ke ufɔk, Jesus ebem iso obup enye ete, Simon, ekere didie? Ndidem ererimbot ebɔ mme anie utip ye utomo? ebɔ ikɔt ekemɔ, mme ebɔ isen owo?

26Peter ete, Ebɔ isen owo. Jesus ɔdɔhɔ enye ete, Ntre ke ikɔt mmɔ ebɔhɔ.

27Edi mbak nnyin idiyat mmɔ esit, ka ke inyaŋ kɔduɔk uwam, nyuŋ men akpa iyak eke omumde; ndien ke ama atat enye inua eyekut okuk; da oro, nɔ mmɔ ke udeme Mi ye okuo.