ISAIAH 10 - Efik Old Bible With Sectional Headings

Ubiom-Ikpe ye Ufen Emi Abasi Edinɔde Israel

1IFƆNKE fɔn inɔ mmɔ eke ewukde ukwaŋ ewuhɔ, ye mme ewet-ŋwed ukut;

2man enuk mbon unana ke itie ikpe efep, enyuŋ eda ŋkanubɔk ebɔ mme ubuene ikɔt mi se inende, man mme ebe-akpa edi mbume mmɔ, man mmɔ enyuŋ ewo ŋwo ye nditɔ-akpa.

3Ndien mbufo edinam nso ke usen ufen, ye ke ini eke nsobo otode ke anyan usuŋ edi? Mbufo edifeŋe etiene anie eyom uŋwam? Ndien ke ebiet ewe ke mbufo edinim ubɔŋ mbufo?

4Mikpedige ami mmɔ ekpenuhɔ ke otu mbuot ekɔŋ, ekpenyuŋ eduɔŋɔ ke otu mme akpaŋa afai. Ofuri ŋkpɔ emi isinke iyaresit esie akabare, edi enye ke anyanyan ubɔk esie kaŋa.

5Ifɔnke fɔn inɔ Asshur, eto iyaresit mi, ndien esaŋ ke ubɔk mmɔ edi eke ifuresit mi.

6Nyedɔŋ enye utom ke oburobut idut, nnyuŋ ntobo enye etop nnɔ mbio iyaresit mi, nte enye obume mbume, onyuŋ owo ŋwo, onyuŋ onim mmɔ ke se edigide nte mbat efak.

7Edi enye idikereke ntem, esit esie idinyuŋ iduakke ntem; koro odude enye ke esit ndisobo nnyuŋ nsibe ediwak mme idut mfep.

8Koro enye eyedɔhɔ, ete, Nte ikpɔ owo emi idige ndidem ŋko-ŋko?

9Nte Calno ibietke Carchemish? Nte Hamath ibietke Arpad? Nte Samaria ibietke Damascus?

10Kpa nte ubɔk mi okosimde mme idut ibɔk, emi ndisɔi mbiet mmɔ ewakde ekan eke Jerusalem, ye eke Samaria,

11Kpa nte ŋkanamde ye Samaria ye ibɔk esie, nte ndinamke kpa ntre ye Jerusalem ye mbiet nkpɔ esie ŋko-ŋko?

12Ndien eyedi nte Ɔbɔŋ edisibede ofuri utom esiemɔ efep ke obot Zion, ye ke Jerusalem; ndien nyeda ufen ntiene mfri iseri esit edidem Assyria, ye ubɔŋ mmenere iso esie.

13Koro enye ɔdɔhɔde, ete: “Nnam emi ke odudu ubɔk mi, ye ke ifiɔk mi; koro mmenyene eti ibuot: ndien nsehere adaŋa mme idut, nnyuŋ mbume inyene emi mmɔ enimde, ndien, nte ɔkpɔsɔŋ owo, nsuhɔre mme andiduŋ:

14ndien ubɔk mi onyuŋ osime inyene mme idut nte efɔk: ndien kpa nte etaŋde nsen inuen eke ekpɔŋde, kpa ntre ke ami ŋkataŋ ofuri ererimbot: ndien baba kiet iduhe eke enyeŋede mba, onyuŋ atatde inua, onyuŋ osiorode uyo.”

15Nte ekuri ekeme ndibure mbure ŋkan andida enye ŋkpi? Nte uyɔk-ŋkpɔ ekeme ndimenere idem ŋkan andida enye nyɔk? Eto ikemeke ndimen andikama enye, esaŋ ikemeke ndimen se midige eto.

16Mmɔdo Ɔbɔŋ, Ɔbɔŋ mme udim, eyenɔ ndiɔk-idem esɔk mbon ubom mmɔ; ndien eyesak ke idak ubɔŋ mmɔ nte ikaŋ asakde.

17Ndien uŋwana Israel eyekabare edi ikaŋ, Edisana Abasi esie eyenyuŋ edi edemikaŋ: ndien eyefɔp onyuŋ ata akpap ye ikɔt ŋkukim esie ke usen kiet;

18onyuŋ ata ubɔŋ akai esie, ye eke eti iŋwaŋ esie, ukpɔŋ ye obukidem: ndien enye eyebiet ndiɔk-idem owo udɔŋɔ.

19Ndien eto akai esie eke osukde eyedi esisit, eyen-ɔwɔŋ eyenyuŋ ekeme ndiwet mmɔ.

20Ndien ama ekem ke usen oro, nditɔ Israel emi esukde, ye nditɔ ufɔk Judah emi ebɔhɔde, iditɔŋɔke aba ntak iberi edem ye enye emi akasuande mmɔ; edi eyebere-edem ye Jehovah, Edisana Abasi Israel, ke akpanikɔ.

21Ubak eke ɔsuhɔde, ubak Jacob eke ɔsuhɔde, eyefiak etiene Ata Ɔkpɔsɔŋ Abasi.

22Koro okposuk edi nte nditɔ fo, O Israel, ewakde nte ntan inyaŋ, esisit mmɔ ikpɔŋ edifiak: nsobo ɔmɔwuhɔ eke edinamde edinen ikpe ɔyɔhɔ nte mmɔŋ.

23Koro Ɔbɔŋ Jehovah mme udim eyenam nsobo, kpasuk oro ɔwuhɔde, ke ofuri ererimbot.

24Mmɔdo ntem ke Ɔbɔŋ Jehovah mme udim ɔdɔhɔ, ete, Ikɔt mi emi eduŋde ke Zion, mbufo ekufeŋe Asshur ndik: enye eyemia mbufo ke eto, onyuŋ emen esaŋ esie etiene fi, kpa nte Egypt akanamde.

25Koro osuk ata ini esisit kaŋa, ndien ikpahesit okure, ye iyaresit mi ke edisobo mmɔ.

26Ndien Jehovah mme udim eyedemere ikpa ese enye, ebiet usuana Midian ke akwa itiat Oreb: ndien esaŋ Esie eyedoro ke inyaŋ, Enye eyenyuŋ emenere enye, kpa nte akanamde ke Egypt.

27Ndien ama ekem ke usen oro, eyebiomore fi mbiomo esie ke afara efep, ye ɔkpɔnɔ esie ke itɔŋ, nte ɔkpɔnɔ abiarade efep ke iso (enaŋ) ubom.

28Enye edi ke Aiath, ebe osim ke Migron; onim mbiomo esie ke Michmash:

29mmɔ emebe mkpa-faha usuŋ: edaŋ ke okoneyo ke Geba; Ramah enyek idem; Gibeah Saul efeŋe.

30Adiaha Gallim, sɔŋ uyo fo fiori: Laishah, kpaŋ utɔŋ: mbɔm Anathoth! Madmenah efeŋe;

31mme andiduŋ Gebim emen ŋkpɔ edaŋa.

32Enye osuk etie mfin emi ke Nob: enyeŋe ubɔk esie ese obot adiaha Zion, kpa obot Jerusalem.

33Sese, Ɔbɔŋ, Jehovah mme udim ke awai ŋkpɔ efep ke imum: eyenyuŋ ekpeŋe mmɔ eke ekoŋde idaha, ndien mmɔ eke ekoŋde eyesuhɔre.

34Ndien enye eyeda ŋkpɔ ukwak etem mfuhɔ akai; Ata Ɔkpɔsɔŋ eyenyuŋ ekpi Lebanon ɔduɔk.