1 CHRONICLES 13 - Efik Old Bible With Sectional Headings

Edidem David Emen Ekebe Ediomi Edinim ke Kiriath-jearim

1NDIEN David obup mme etubom mme tɔsin, ye eke mme ikie, ye kpukpru mbɔŋ, item.

2David onyuŋ ɔdɔhɔ ofuri esop Israel, ete, Ama enem mbufo, ama onyuŋ oto Jehovah Abasi nnyin, eyak nnyin idɔŋ eketɔt nditɔ-ete nnyin ke kpukpru ebiet eke esuhɔde ke ofuri isɔŋ Israel, ye mme oku nde, ye mme Levite ke mme obio, ye ke mben isɔŋ mmɔ, ite edi esop ke ɔtɔ nnyin:

3eyak nnyin inyuŋ ida ekebe Abasi nnyin idi ke ebiet nnyin: koro nnyin mikobupke (Abasi) ke esit ke eyo Saul.

4Ndien ofuri esop edɔhɔ, ete, “Nnyin iyenam ntre”: koro ŋkpɔ oro enende ke iso kpukpru owo.

5Ntre ke David obon ofuri esop Israel, ɔtɔŋɔde ke Shihor Egypt, tutu osim ke ebiet emi edukde Hamath, man eda ekebe Abasi ke Kiriath-jearim edi.

6Ekem David ye ofuri Israel edɔk eka ke Baalah ke Kiriath-jearim, emi enyenede Judah, ndimen ekebe Abasi Jehovah do emi etiede ke ufɔt mme cherubim, emi ekotde enye enyiŋ esie, nda ndɔk.

7Ndien mmɔ esio ekebe Abasi ke ufɔk Abinadab, edori ke obufa ukpat-ŋkpɔ: Uzza ye Ahio enyuŋ ebin ukpat-ŋkpɔ oro.

8David ye ofuri Israel enyuŋ ebre ke iso Abasi ke ofuri ukeme mmɔ, ke ikwɔ, ye ke harp, ye ke psaltery, ye ke ekɔmɔ, ye ke cymbal, ye ke ukorowo.

9Ekem ke ini mmɔ esimde ebiet-ubek-ibokpot Chidon, Uzza anyan ubɔk esie omum ekebe akama: koro mme enaŋ eyomde enye ndiduɔk.

10Ndien Jehovah ayat esit ye Uzza, onyuŋ owot enye: koro enye akanyande ubɔk esie otuk ekebe: ndien enye akpa do ke iso Abasi.

11Ndien esit ayat David ŋko, koro Jehovah okobumerede owot Uzza: mmɔdo ɔtɔ oro ekerede Perez-uzza tutu osim mfin emi.

12Ndien David abak Abasi ke usen oro, ete, Ndinam didie nda ekebe Abasi nnyɔŋ ke ebiet mi?

13Ntre ke David idaha ekebe oro inyɔŋ ke ebiet esiemɔ ke obio David, edi ada enye awaha okonim ke ufɔk Obed-edom Gittite.

14Ndien ekebe Abasi etie ke ufɔk Obed-edom, kpa ke ebiet esie, ke ɔfiɔŋ ita. Ndien Jehovah ɔdiɔŋ ufɔk Obed-edom, ye kpukpru se enye enyenede.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help