EZRA 7 - Efik Old Bible With Sectional Headings

Ezra Asaŋa ye mme Nsaŋa Esie Edi Jerusalem

1EKEM ke ŋkpɔ oro ema ekebe, ke ini ubɔŋ Artaxerxes edidem Persia, Ezra eyen seraiah, eyen Azariah, eyen Hilkiah,

2eyen Shallum, eyen Zadok, eyen Ahitub,

3eyen Amariah, eyen Azariah, eyen Meraioth,

4eyen Zerahiah, eyen Uzzi, enye Bukki,

5eyen Abishua, eyen Phinehas, eyen Eleazar, eyen Aaron, ɔbɔŋ oku:

6enye Ezra oto ke Babylon ɔdɔk, ndien enye edi owo ŋwed emi otimde ɔfiɔk ŋwed ibet Moses, emi Jehovah Abasi Israel ɔkɔnɔde: ndien oto ke ubɔk Jehovah Abasi esie emi odude ye enye, edidem ɔnɔ enye kpukpru se enye ebeŋede.

7Ndien ndusuk nditɔ Israel, ye ndusuk mme oku, ye mme Levite, ye mme ɔkwɔ-ikwɔ ye mme etie-usuŋ, ye mme Nethinim, edɔk eka ke Jerusalem, ke ɔyɔhɔ isua Artaxerxes edidem itiaba.

8Ndien enye osim ke Jerusalem ke ɔyɔhɔ ɔfiɔŋ ition, emi edide ɔyɔhɔ isua edidem itiaba.

9Koro ke akpa usen akpa ɔfiɔŋ enye ɔkɔtɔŋɔ ndito ke Babylon ndɔk, ndien ke akpa usen ɔyɔhɔ ɔfiɔŋ ition enye edisim ke Jerusalem, oto eti ubɔk Abasi esie emi odude ye enye.

10Koro Ezra okowukde esit esie ndiduŋɔ ŋwed ibet Jehovah, nnyuŋ nnam, nnyuŋ nteme ewuhɔ ye ikpe ke Israel.

11Ndien emi edi ŋwed oro ekekaŋade ke eke edidem Artaxerxes ɔnɔde Ezra oku, owo ŋwed oro, owo ŋwed ikɔ mbet Jehovah, ye eke ewuhɔ esie emi enye oko-wukde Israel.

12Artaxerxes edidem ndidem ɔkɔm Ezra oku, ata ɔfiɔk ŋwed-ibet Abasi enyɔŋ, ye ntre ntre.

13Mmowuk ewuhɔ, nte, Yak kpukpru Israel, ye mme oku esie, ye mme Levite ke ofuri isɔŋ ubɔŋ mi, emi enyimede nditiene fi ŋka ke Jerusalem, eka.

14Koro edidem ye mme ɔnɔ-item esie itiaba edɔŋde fi, ete afo obup abaŋa Judah ye Jerusalem, nte mbet Abasi fo emi odude fi ke ubɔk asaŋade;

15onyuŋ obiom silver ye gold emi edidem ye mme ɔnɔ-item esie edade ke ima esit enɔ Abasi Israel emi iduŋ esie odude ke Jerusalem,

16ye ofuri silver ye gold emi afo edikutde ke ofuri province Babylon, ye mme enɔ ima esit kpukpru owo, ye eke mme oku emi mmɔ enyimede ndinɔ ufɔk Abasi mmɔ emi odude ke Jerusalem; da, ndien,

17silver emi wawara dep enaŋ, ye okukim erɔŋ, ye nditɔ-erɔŋ, ye inuak-udia mmɔ, ye uwa ediŋwɔŋ-ŋkpɔ mmɔ, nyuŋ wa mmɔ ke itie-uwa ufɔk Abasi mbufo, emi odude ke Jerusalem.

18Ndien se afo ye nditɔ-usɔ emade ndinam ke silver, ye ke gold, eke ɔsuhɔde, mbufo enam nte Abasi mbufo amade.

19Nyuŋ da mkpoduoho emi enɔde fi ke eke utom ufɔk Abasi fo, yak mmɔ nim ke iso Abasi Jerusalem.

20Ndien ama edi ŋkpɔ efen eke ufɔk Abasi fo ananade, eke afo enyenede ndinɔ, sio ke ufɔk ŋkpɔ-uto edidem nɔ.

21Ami Artaxerxes edidem mmonyuŋ ŋwuk ewuhɔ nnɔ kpukpru mme andikpeme okuk emi edude ke edem akpa oko, nte, Mbufo emen idem enam kpukpru se Ezra oku, owo ŋwed mbet Abasi enyɔŋ edisiakde ɔnɔ mbufo,

22okposuk edi talent silver ikie, ye udomo wheat ikie, ye bath wine ikie, ye bath aran ikie, ye inuŋ eke miwetke.

23Yak mmɔ ediɔŋ enam kpukpru se Abasi enyɔŋ owukde abaŋa ufɔk Abasi enyɔŋ: koro anam didie iyaresit edidoro ke mme idut emi edidem akarade, ye ke nditɔ esie?

24Nnyin inyuŋ isian mbufo, ite, Ama edi kpukpru mme oku, ye mme ɔkwɔ-ikwɔ, ye mme etie-usuŋ, ye mme Nethinim, ye mme anam-utom ufɔk Abasi emi, owo inyeneke odudu ndibɔ mmɔ utomo, ye comey, ye utip.

25Ndien afo Ezra, da ifiɔk Abasi fo emi odude fi ke idem, nim mme ebierikpe, ye mme ekpe-ikɔ eke edikpede ikɔ kpukpru owo emi edude ke edem akpa oko, kpa kpukpru owo eke efiɔkde mbet Abasi fo, ndien mbufo esian mmɔ eke mifiɔkke.

26Ndien yak emen idem eda ufen enɔ kpukpru owo eke minamke mme ewuhɔ Abasi fo, ye mme ewuhɔ edidem, edide ke mkpa, onyuŋ edide ke eribin mmɔ mfep, onyuŋ edide ke eridia mmɔ isop, onyuŋ edide ke erikɔbi mmɔ.

27Etoro Jehovah abasi mme ete nnyin, emi ekesinde edidem oruk ekikere emi ke esit, ete ɔdiɔŋ ufɔk Jehovah emi odude ke Jerusalem:

28ama onyuŋ ɔfɔn ido ye ami ke iso edidem ye mme ɔnɔ-item esie, ye ke iso kpukpru ikpɔ mbɔŋ edidem. Ndien esit ɔsɔŋ mi, oto ubɔk Jehovah Abasi mi emi adade ye ami, ndien ntaŋ ikpɔ owo ke Israel, nte etiene mi edɔk.