2 SAMUEL 22 - Efik Old Bible With Sectional Headings

David Ɔkwɔ Ikwɔ Ɔnɔ Abasi ke Ntak Emi Enye Akanyaŋade Mmɔ

1EKEM David ada ikɔ ikwɔ etiŋ ɔnɔ Jehovah, ke usen oro Jehovah okosiode enye ke ubɔk kpukpru mme asua esie, ye ke ubɔk Saul;

2ndien enye ɔdɔhɔ ete, Jehovah edi akwa itiat mi, ye ufɔk ekɔŋ mi, ye andinɔ mi ubɔhɔ;

3Abasi akwa itiat mi; nyebuɔt idem mi ye enye: otu-ekɔŋ mi, ye nduk erinyaŋa mi, edikoŋ tower mi, ye ebiet ubɔhɔ mi, andiyaŋa mi; afo anyaŋa mi osio ke nnama.

4Nyeseme nnɔ enye emi etorode, kpa Jehovah: ndien eyenyaŋa mi esio mme asua mi ke ubɔk.

5Adaŋemi odut mkpa akande mi okuk, mme akpa mmɔŋ idiɔk ido enyuŋ esinde mi ndikhe.

6Mme idut udi ekande mi ekuk; mme afia mkpa enyuŋ esimde mi.

7Ke nnanenyin mi nyefiori ŋkot Jehovah, nnyuŋ nseme nnɔ Abasi mi: ndien enye etie ke temple esie okop uyo mi, mfiori mi onyuŋ oduk enye ke utɔŋ.

8Ndien isɔŋ aduai onyuŋ enyek; se enyɔŋ eberede ke esit onyuŋ otut onyuŋ aduai, koro enye ayatde esit.

9Nsuŋikaŋ oto enye ke ibuo ɔdɔk, ikaŋ onyuŋ ɔwɔrɔ enye ke inua asak: ebok ikaŋ obubere ke esit.

10Ndien enye onuk ikpa-enyɔŋ, ɔsuhɔre; ɔkpɔsɔŋ ekim onyuŋ odu enye ke idak ukot.

11Enye onyuŋ odoro cherub, efe: enyuŋ ekut enye odoro ke mba ofum.

12Enye onyuŋ ada ekim onim nte tent akan idemesie okuk, ebok mmɔŋ, ye mbubit enyɔŋ.

13Ebok ikaŋ obubere ke uyama emi odude enye ke iso.

14Jehovah akatuak enyɔŋ, Ata Andikoŋ onyuŋ osiosro uyo.

15Enye onyuŋ otop idaŋ, asuan mmɔ; asiak obuma, otimere mmɔ.

16Ndien ekut afua mmɔŋ, se ererimbot eberede ke esit ayarare, ke nduari Jehovah, ke ibifik ofimede ke ibuo esie.

17Enye etie ke enyɔŋ ɔdɔŋ edida mi; odudi mi osio ke ediwak mmɔŋ

18Enye anyaŋa mi osio ke ubɔk mkpɔsɔŋ mme asua mi, ye eke mbon-utɔk mi: koro mmɔ esɔŋde ekan mi.

19Mmɔ ekebuat mi ke usen ukut mi: edi Jehovah eberi mi ubɔk.

20Enye ada mi ɔwɔrɔ esin ke akamba ufaŋ: atara mi idem, koro amade mi.

21Jehovah ɔnɔ mi usiene, nte eti ido mi edide: ɔnɔ mi nte ubɔk asanade mi.

22Koro ŋkpemede usuŋ Jehovah, mmenyuŋ ndiɔkke ŋkpɔŋ Abasi mi.

23Koro kpukpru ikpe esie edude mi ke iso: ama onyuŋ edi mme ewuhɔ esie, ŋwahake ŋkpɔŋ mmɔ.

24Ŋkonyuŋ mfɔn mma ye enye, nnyuŋ ŋkpeme idem mi, man ŋkunam oburobut ido mi.

25Mmɔdo Jehovah osiode mi usiene esin ke nti ido mi: ye nte idem asanade mi ke iso esie.

26Afo anam ke ima ye mbon-ima, onyuŋ ɔfɔn ama ye owo eke ɔfɔnde ama.

27Afo onim idem fo ke edisana ye owo eke asanade; onyuŋ anam ŋkwaŋa-ŋkwaŋa ye mmɔ eke ekwaŋade.

28Eyenyuŋ anyaŋa mbon-ukut: edi enyin fo ese mbon iseri: afo ɔsuhɔre mmɔ.

29Koro afo edide utuenikaŋ mi, O Jehovah: Jehovah onyuŋ aŋwaŋade ekim mi.

30Koro ndade fi mbumere udim owo: nda Abasi mi mfrɔ ŋkaŋa ibibene.

31Abasi! usuŋ esie ɔfɔn ama: ema edomo uyo Jehovah; enye edi otu - ekɔŋ kpukpru mmɔ eke ebuɔtde idem mmɔ ye enye.

32Koro anie edi Abasi ke mibɔhɔke Jehovah? Anie onyuŋ edi akwa itiat ke mibɔhɔke Abasi nnyin?

33Abasi edi ɔkpɔsɔŋ ebiet ubɔhɔ mi, onyuŋ ada owo eke ɔfɔnde ama, asaŋa ke usuŋ esie.

34Enye anam ukot mi ebiet edop: onyuŋ odori mi ke edikoŋ ebiet mi.

35Eteme ubɔk mi ndiŋwana ekɔŋ; ubɔk mi onyuŋ onuk utiga okpoho.

36Afo onyuŋ ɔnɔ mi otu-ekɔŋ erinyaŋa fo; ibɔrɔ fo onyuŋ ofori mi.

37Afo aŋwaŋa ikpat isaŋ mi ke idak mi; ndien itɔŋ ukot mi ikehekede.

38Nyebine mme asua mi, nnyuŋ nsobo mmɔ; ndinyuŋ mfiakke edem tutu esobo mmɔ ema.

39Nyenyuŋ nsobo mmɔ, nnyuŋ nyibi mmɔ, ndien mmɔ ididahake ke enyɔŋ: mmɔ enyuŋ eduɔŋɔ ema ke idak ikpat.

40Afo onyuŋ ada odudu ekɔŋ ɔbɔbɔ mi ke idem: ɔsuhɔre mmɔ eke eyomde mi ikɔ onim mi ke ke idak.

41Afo omonyuŋ ada itɔŋ mme asua mi ɔnɔ mi, man nsobo mbon utɔk mi.

42Mmɔ etiŋ enyin ese, edi owo eke anyaŋade iduhe; ese Jehovah, edi enye ibɔrɔke mmɔ.

43Ndien nnuak mmɔ emem nte ntan isɔŋ: ntim mmɔ nte mbat efak, nnyuŋ ndigi mmɔ.

44Afo onyuŋ osio mi ke ubɔk mbio-obio mi, ekpeme mi, ete, ndi etubom mme idut; mbon emi mmemfiɔkke eyedi ikɔt mi.

45Nditɔ isen owo eyenem inua enɔ mi: adaŋemi mmɔ ekopde ke utɔŋ, mmɔ eyenam uyo mi.

46Nditɔ isen owo eyeyemere, enyuŋ edikhe ke ebiet udibe mmɔ.

47Jehovah odudu uwem; yak enyuŋ ekɔm akwa itiat mi; enyuŋ etoro Abasi itiat erinyaŋa mi.

48Edi Abasi mi osio usiene ɔnɔ mi, onyuŋ ɔsuhɔre mme idut onim mi ke idak;

49Onyuŋ osio mi ke ubɔk mme asua mi: onyuŋ ofori mi akan mmɔ emi edahade ke enyɔŋ eyom mi ikɔ; afo anyaŋa mi osio mbon afai ke ubɔk.

50Mmɔdo ndikwɔde fi ke otu mme idut, O Jehovah, nyenyuŋ ŋkwɔ ikwɔ nnɔ enyiŋ fo.

51Ɔkpɔsɔŋ ufɔk erinyaŋa edidem esie, emi ɔfɔnde mfɔn ye owo esie emi eyerede aran, kpa David ye ubon esie ke nsinsi-nsinsi.