2 NDIDEM 1 - Efik Old Bible With Sectional Headings

Elijah ye Edidem Ahaziah

1EKEM Moab ɔsɔŋ ibuot ye Israel, ke Ahab ama akakpa.

2Ndien Ahaziah oto ke window ubet-enyɔŋ esie emi odude ke Samaria ɔduɔ, ndien udɔŋɔ anam enye; ndien enye ɔdɔŋ mme isuŋ-utom, onyuŋ ɔdɔhɔ mmɔ, ete, Mbufo eka ekebup Baal-zebub abasi Ekron, mme udɔŋɔ emi eyekure mi.

3Ndien angel Jehovah ɔdɔhɔ Elijah Tishbite, ete, Daha ke enyɔŋ, dɔk kosobo ye mme isuŋ-utom edidem Samaria, nyuŋ bup mmɔ, ete, Ndi koro Abasi miduhe ke Israel, esin mbufo eka ndibup Baal-zebub abasi Ekron?

4Mmɔdo ntem ke Jehovah ɔdɔhɔ ete, Afo udutoho ke bed oro afo ɔkɔdɔkde, usuhɔre, edi eyekpa mkpa. Ndien Elijah adaha.

5Ekem adaŋemi mme isuŋ-utom oro efiakde esim enye, enye obup, mmɔ, ete,

6Owo kiet oto edibiɔŋɔre ke iso nnyin, onyuŋ ɔdɔhɔ nnyin, ete, Mbufo efiak etiene edidem emi ɔkɔdɔŋde mbu-tom, enyuŋ edɔhɔ enye, ete, Ntem ke Jehovah ɔdɔhɔ ete, Ndi koro Abasi miduhe ke Israel, esin afo ɔdɔŋ ekebup Baal-zebub abasi Ekron?

7Mmɔdo mudutoho ke bed oro afo ɔkɔdɔkde, usuhɔre, edi eyekpa mkpa. Ndien enye obup mmɔ, ete, Owo oro okotode edibiɔŋɔre mbufo ke iso, onyuŋ etiŋde ikɔ emi ɔnɔ mbufo, eketie didie?

8Ndien mmɔ ebɔrɔ enye, ete, Enye ekedi idet-idet owo, mbɔbɔ ikpa onyuŋ ɔbɔbɔ enye ke isin. Ndien enye ete, Ke edi Elijah Tishbite.

9Ndien edidem ɔdɔŋ etubom owo aba ye duop ye owo esie aba ye duop etiene enye. Ndien enye ɔdɔk okosim enye: ndien, sese, enye etie ke enyɔŋ obot kiet. Ndien etubom ɔdɔhɔ enye, ete, Owo Abasi, edidem ɔdɔhɔ fi, ete, Suhɔre di.

10Ndien Elijah ɔbɔrɔ, onyuŋ ɔdɔhɔ etubom owo aba ye duop oro, ete, Edieke ami ndide owo Abasi, yak ikaŋ oto ke enyɔŋ ɔsuhɔre, ata fi ye owo fo aba ye duop. Ndien ikaŋ oto ke enyɔŋ ɔsuhɔre, ata enye ye owo esie aba ye duop.

11Ndien edidem ɔtɔŋɔ ntak ɔdɔŋ etubom owo aba ye duop eŋwen, ye owo esie aba ye duop etiene enye. Ndien etubom ɔbɔrɔ enye, onyuŋ ɔdɔhɔ ete, Owo Abasi oro, ntem ke edidem ɔdɔhɔ ete, Wawara suhɔre di.

12Ndien Elijah ɔbɔrɔ mmɔ, ete, Edieke ami ndide owo Abasi, yak ikaŋ oto ke enyɔŋ ɔsuhɔre, ata fi ye owo fo aba ye duop. Ndien ikaŋ Abasi oto ke enyɔŋ ɔsuhɔre, ata enye ye owo esie aba ye duop.

13Ndien enye ɔtɔŋɔ ntak ɔdɔŋ etubom owo aba ye duop ɔyɔhɔ ita, ye owo esie aba ye duop, utom. Ndien etubom aba ye duop ɔyɔhɔ ita ɔdɔk, aka ɔkɔtɔŋɔ edɔŋ esie ke iso Elijah, onyuŋ ekpe enye ubɔk, onyuŋ ɔdɔhɔ enye, ete, Owo Abasi, mbɔk, yak uwem mi, ye uwem owo fo aba ye duop emi, edi ŋkpɔ-uto ke enyin fo.

14Sese, ikaŋ okoto ke enyɔŋ ɔsuhɔre, ata akpa mme etubom aba ye duop mbiba, ye mme aba ye duop mmɔ: edi ke emi se uwem mi ke ŋkpɔ uto.

15Ndien angel Jehovah ɔdɔhɔ Elijah, ete, Tiene enye suhɔre: kufehe enye. Ndien enye adaha ke enyɔŋ, asaŋa ye enye aka ebiet edidem.

16Ndien enye ɔdɔhɔ enye, Ntem ke Jehovah ɔdɔhɔ ete, Koro afo ɔkɔdɔŋde mme isuŋ-utom ekebup Baal-zebub abasi Ekron, ndi koro Abasi miduhe ke Israel eke ekpebupde uyo esie? Mmɔdo mudutoho ke bed emi afo ɔkɔdɔkde, usuhɔre, edi udutreke ndikpa.

17Ntre ke enye akpa ke uyo Jehovah oro Elijah ɔkɔdɔhɔde. Ndien Jehoram ada ubɔŋ ke ibuot esie, ke udiana-akpa isua Jehoram eyen Jehoshaphat edidem Judah; koro enye minyeneke eyen-eren.

18Ndien ama edi ikɔ Ahaziah emi ɔsuhɔde, emi enye akanamde, nte ikewetke mmɔ isin ke ŋwed ikɔ eyo ndidem Israel?