JEREMIAH 33 - Efik Old Bible With Sectional Headings

Eŋwɔŋɔ Idorenyin Efen Emi Abasi Ɔnɔde Nditɔ Israel

1EKEM uyo Jehovah ɔtɔŋɔ ntak osim Jeremiah, ndien enye osuk ɔkɔbɔ kaŋa ke okure ufɔk ukwak, ete,

2Ntem ke Jehovah emi akanamde enye, Jehovah emi okobotde enye man ɔsɔŋɔ owuk enye, Jehovah edi enyiŋ esie, ɔdɔhɔ, ete,

3Seme kot mi, ndien nyeyere fi, nnyuŋ ŋwut fi ikpɔ ye ata mkpɔsɔŋ ŋkpɔ eke afo mufiɔkke mmɔ.

4Koro ntem ke Jehovah Abasi Israel ɔdɔhɔ, abaŋa ufɔk obio emi, ye ufɔk ndidem Judah emi ekewuride enɔ ibombom ye ofut;

5mmɔ edi ndiyi ekɔŋ ye mme Chaldean, ndinyuŋ nda mme okpo owo oro ŋwotde ke iyaresit mi ye ke ifuresit mi nyɔhɔ ke esit, ami nnyuŋ ndip obio emi iso mi mbaŋa ofuri idiɔk ido mmɔ.

6Sese, ami nyeda ibɔk ukure unan ndian enye, nyenyuŋ ŋkɔk mmɔ, nnyuŋ nyarare uwak emem ye akpanikɔ nnɔ mmɔ.

7Nyenyuŋ nda nditɔ Judah ye nditɔ Israel emi eketaŋde efep mfiak ndi, nnyuŋ mbɔp mmɔ kpa nte akpa.

8Ndien nyesio mmɔ kpukpru mme idiɔk ido mmɔ eke mmɔ ekenamde ye ami ke idem mfep nnam mmɔ esana; nnyuŋ mfen kpukpru mme ukwaŋ-ŋkpɔ mmɔ emi mmɔ ekenamde ye ami, ye emi mmɔ ekeduede ye ami.

9Ndien enye eyedi okimmɔ ke enyiŋ idara ye itoro ye ke mbana ke otu kpukpru mme idut ererimbot, eke edikopde ofuri ufɔn emi ami ndifɔnde ye mmɔ: ndien mmɔ eyefehe ndik enyuŋ enyek idem ebaŋa kpukpru ufɔn ye kpukpru unen emi ami ndinamde ye enye.

10Ntem ke Jehovah ɔdɔhɔ, ete, Ke ebiet emi mbufo edɔhɔde ete ke enye omosobo, anana owo, onyuŋ anana ufene, ke mme obio Judah ye ke mme efak Jerusalem, emi ebiarade enana owo, enyuŋ enana andiduŋ, enyuŋ enana ufene,

11ke eyekop uyom idara, ye uyom mbre, ye uyo ɔdɔ ŋwan, ye uyo ŋwan ndɔ, ye uyo mmɔ eke edɔhɔde, ete, “Mbufo etoro Jehovah mme udim: koro Jehovah ɔfɔnde; koro ima esie ebigide ke nsinsi”: ye eke mmɔ emi edade ekɔm edi ke ufɔk Jehovah. Koro ami nyeda nditɔ isɔŋ emi eketaŋde efep mfiak ndi, kpa nte akpa; ke edi Jehovah ɔdɔhɔ.

12Ntem ke Jehovah mme udim ɔdɔhɔ, ete, Ke iduŋ mme ɔbɔk-erɔŋ emi enamde ufene mmɔ esukhɔre ena, editɔŋɔ ntak edu ke ebiet emi osobode ntem, anana owo, onyuŋ anana ufene, ye ke kpukpru mme obio mmɔ.

13Ke mme obio obot, ye ke mme obio una-isɔŋ edem inyaŋ, ye ke mme obio edem usuk-usuk, ye ke isɔŋ Benjamin, ye ke edem emi akande Jerusalem okuk, ye ke mme obio Judah, ke ufene editɔŋɔ ntak esaŋa ebe ke idak ubɔk enye emi abatde mmɔ. Ke edi Jehovah ɔdɔhɔ ntem.

14Jehovah ɔdɔhɔ, ete, Sese, mme usen ke edi eke ndimade eti ikɔ oro ŋkɔdɔhɔde ufɔk Israel ye ufɔk Judah.

15Ke mme usen oro, ye ke ini oro, ke ndinam edinen nsehe otibe ɔnɔ David; ndien enye eyenam edinen ikpe ke ererimbot.

16Ke mme usen oro ke edinyaŋa Judah, Jerusalem eyenyuŋ oduŋ ke ifure; ndien emi edi se edikotde enye, JEHOVAH ETI IDO NNYIN.

17Koro ntem ke Jehovah ɔdɔhɔ ete, Owo David iditreke nditie ke ebekpo ufɔk Israel;

18owo mme oku mme Levite idinyuŋ itreke ndiwa edifɔp uwa ke iso mi, idinyuŋ itreke ndifɔp inuak-udia, nnyuŋ ŋwa uwa emem kpukpru ini.

19Ndien uyo Jehovah osim Jeremiah, ete,

20Ntem ke Jehovah ɔdɔhɔ, ete, Mbufo ema ekeme ndibiat ediomi mi eke uwemeyo, ye ediomi mi eke okoneyo, man uwemeyo ye okoneyo ekudu ke ekem ini mmɔ;

21ndien eyekeme ndibiat ediomi mi (emi ŋkodiomide) ye David owo mi, man enye okunyene eyen eke edidade ubɔŋ ke ebekpo esie, ye eke mme Levite mme oku ŋko emi esaŋade utom enɔ mi.

22Kpa nte emi mikemeke ndibat me udim enyɔŋ, minyuŋ ikemeke ndidomo ntan inyaŋ; kpa ntre ke ndinam ubon David, owo mi, ye mme Levite emi esaŋade utom enɔ mi, ewak.

23Ndien uyo Jehovah osim Jeremiah, ete,

24Nte afo ukwe se mbio emi edɔhɔde, ete ke Jehovah emen ufɔk mbiba emi enye ekemekde mmɔ ɔduɔk? Ntre ke mmɔ esin ikɔt mi ke ndek, inyuŋ ibatke aba mmɔ ke obio.

25Ntem ke Jehovah ɔdɔhɔ, ete, Edieke ediomi mi miduhe ye uwemeyo ye okoneyo, edieke mmennimke mme ewuhɔ enyɔŋ ye isɔŋ ŋko;

26ndien nyemen ubon Jacob ye ubon David owo mi ŋko nduɔk, ndinyuŋ nsioho aba owo eke edikarade ubon Abraham, ye Isaac, ye Jacob, ke ubon esie: koro nyeda nditɔ mmɔ emi eketaŋde efep mfiak ndi, nnyuŋ ntua mmɔ mbɔm.