ERIYARARE 18 - Efik Old Bible With Sectional Headings

Akwa Babylon Ɔduɔ

1KE ŋkpɔ emi ema ekebe, ŋkut angel eŋwen nte otode ke heaven ɔsuhɔre ye akwa odudu; isɔŋ onyuŋ ayama ke ubɔŋ esie.

2Ndien enye ofiori ke ɔkpɔsɔŋ uyo ete, Akwa Babylon ɔmɔduɔ, ɔmɔduɔ, omonyuŋ akabare edi iduŋ mme demon, ye itie udibe kpukpru spirit ndek, ye itie-udibe kpukpru ndidehe inuen eke owo esuade:

3koro kpukpru mme idut ekeŋwɔŋ wine ifuresit use esie; ndidem isɔŋ ekenyuŋ enam use ye enye, mbon-urua isɔŋ ema enyuŋ ekabare eforo oto ke uwak edinem ido esie.

4Ndien ŋkop uyo eŋwen nte otode ke heaven ete, Mbufo ikɔt Mi, ewɔŋɔ ke esit, mbak mbufo edibuana ke idiɔk-ŋkpɔ esie, edinyuŋ etiene ebɔ mme ufen esie;

5koro mme idiɔk-ŋkpɔ esie ema eboho ekoŋ esim enyɔŋ, Abasi omonyuŋ eti mme ukwaŋkpɔ esie.

6Nɔ enye usiene kpa nte enye ɔkɔnɔde, nyuŋ nɔ enye ubiom-ikpe esie utim ikaba, nte ekemde ye se enye akanamde. Ke cup emi enye akabuakde ŋkpɔ ke esit ebuak enɔ enye utim ikaba.

7Adaŋa nte enye akataŋde idem, onyuŋ odude uwem edinem-edinem, kpasuk ntre nɔ enye ndutuhɔ ye eyet. Koro enye ɔdɔhɔ ke esit esie ete, Ntie okim nte ɔbɔŋ-aŋwan, ndige ebe-akpa, ndinyuŋ ŋkwe ntuaŋa.

8Mmɔdo ke usen kiet ke mme ufen edibuat enye, mkpaŋa ye ntuaŋa ye akaŋ; eyenyuŋ efɔp enye ke ikaŋ; koro Ɔbɔŋ Abasi, emi ekpede ikpe ye enye, edide Ɔkpɔsɔŋ.

9Ndien ndidem isɔŋ, emi ekenamde use ye enye, enyuŋ edude uwem edinem-edinem ye enye, eyetuaŋa enyuŋ eseme enye, ke adaŋemi mmɔ esede nsuŋikaŋ emi enye ɔfɔbɔde ke esit; eyeda nsan-nsan ɔnɔ ndik ndutuhɔ esie, ete,

10Mbɔm, mbɔm, akwa obio, ɔkpɔsɔŋ obio Babylon! koro ke hour kiet ubiom-ikpe akabuat fi.

11Mbon-urua isɔŋ ŋko eyetuaŋa, enyuŋ eseme ebaŋa enye, koro owo eke edepde ŋkpɔ-urua mmɔ miduhe aba;

12ŋkpɔ urua o-gold, ye silver, ye ɔsɔŋ-urua itiat, ye pearl, ye eti linen, ye purple, ye silk, ye ididuot ɔfɔŋ; ye kpukpru mfuɔŋ-mfuɔŋ eto, ye kpukpru ŋkpɔ eke edade nduk-enin, ye ɔsɔŋ-urua eto, ye okpoho, ye ukwak, ye marble, enam;

13ye cinnamon, ye balsam, ye ufuɔŋkpɔ, ye myrrh, ye frankincense, ye wine, ye aran, ye eti ndomuyo, ye ibokpot, ye ufene, ye erɔŋ; ye enaŋ-mbakara, ye ukpat-ŋkpɔ, ye ikpɔhidem owo, ye ukpɔŋ owo.

14Mbuŋwum eke esit fo amade emebe ekpɔŋ fi; kpukpru ɔsɔŋ-urua ye ediye ŋkpɔ fo emetak, owo idinyuŋ ikwe mmɔ aba.

15Mbon-urua ke mme ŋkpɔ emi, emi ekabarede eforo oto ke obio oro, eyeda nsan-nsan ɔnɔ ndik ndutuhɔ esie, etuaŋa enyuŋ eseme, ete Mbɔm, mbɔm,

16akwa obio, emi ekesinde linen, ye purple, ye ididuot ɔfɔŋ, onyuŋ adade gold ye ɔsɔŋ-urua itiat ye pearl abana idem!

17koro ke hour kiet inyene eke ewakde ntem ema ekabare ekpu. Ndien kpukpru etubom ubom ye mmɔ emi eyode ke inyaŋ, ye mbon uwat, ye kpukpru mme ebin mbubine ke inyaŋ,

18eda nsan-nsan ese nsuŋ-ikaŋ emi enye ɔfɔbɔde ke esit, efiori ete, Ewe obio etie nte akwa obio?

19Mmɔ enyuŋ ewobi ntɔŋ eduɔk ke ibuot, esio mkpo, etuaŋa enyuŋ efuhɔ, ete, Mbɔm, mbɔm, akwa obio, emi akanamde kpukpru mme enyene ubom ke akpa eforo oto ke eriduɔk inyene esie! ke hour kiet ema enam enye odu ke ndobo.

20Edara ebaŋa enye O heaven, ye mbufo nti ikɔt Abasi ye mme apostle ye mme prophet, koro Abasi ama ekpe ikpe ibuot mbufo ye enye.

21Ekem ŋkpɔsɔŋ angel emen itiat emi etiede nte akwa itiat ukɔk-ibokpot, ɔduɔk ke inyaŋ, onyuŋ ɔdɔhɔ ete, Ntem ke edisio akwa obio Babylon eduɔk ke ɔkpɔsɔŋ iduɔ, ndien idikwe enye aba.

22Owo idikopke aba mme ebre harp ye mme ɔkwɔ-ikwɔ ye mme ofri-ifiom ye mme ofri-ukorowo, nte enamde uyom ke esit fo; idinyuŋ ikwe aba mbon-usɔ, eke enamde ubɔk-usɔ ekededi, ke esit fo;

23idinyuŋ ikopke aba uyom itiat ukɔk-ŋkpɔ ke esit fo; uŋwana utuenikaŋ idinyuŋ iyamake aba ke esit fo; owo idinyuŋ ikopke aba uyo ebe-ndɔ ye ŋwan-ndɔ ke esit fo. Koro mbon-urua fo ekedi mbɔŋ isɔŋ; afo ama onyuŋ ada ido idiɔŋ fo abiaŋa kpukpru mme idut;

24ndien ke obio emi ema ekut iyip mme prophet ye nti ikɔt Abasi, ye iyip kpukpru mmɔ emi owo ekewotde ke isɔŋ.