JEREMIAH 52 - Efik Old Bible With Sectional Headings

Ukara Zedekiah ye Ini Ewuride Jerusalem

1ZEDEKIAH edi isua edip ye kiet ke ini enye adade ubɔŋ, ndien enye edi edidem ke Jerusalem ke isua duopekiet. Ndien enyiŋ eka esie ekere Hamutal eyen Jeremiah a Libnah.

2Enye ŋko onyuŋ anam idiɔk ke iso Jehovah, kpa nte Jehoiakim akanamde kpukpru.

3Koro osude ntre ye Jerusalem ye Judah abaŋa iyaresit Jehovah, tutu enye emen mmɔ ke iso esie ɔduɔk. Ndien Zedekiah ɔsɔŋ ibuot ye edidem Babylon.

4Edikem ke ɔyɔhɔ isua usukkiet nte enye akada ubɔŋ, ke ɔyɔhɔ ɔfiɔŋ duop, ke ɔyɔhɔ usen ɔfiɔŋ duop, Nebuchadrezzar edidem Babylon, ye ofuri mbon-ekɔŋ esie esim Jerusalem, enyuŋ ekan enye ekuk, ndien ebɔp ŋkokoŋo ufɔk-ekɔŋ ekan enye ekuk.

5Ntem ke mmɔ ekan obio ekuk tutu osim isua edidem Zedekiah duopekiet.

6Ke ɔyɔhɔ ɔfiɔŋ inaŋ, ke ɔyɔhɔ usen ɔfiɔŋ usukkiet, akaŋ ɔsɔŋ ubɔk ke obio; udia eke mbio-obio ediade inyuŋ iduhe.

7Ndien obio ɔbuŋɔ, kpukpru mbon-ekɔŋ enyuŋ efeŋe, eto ke obio ewɔŋɔ ke okoneyo, eka ke usuŋ inua-etop ke ufɔt ibibene iba emi ekperede iŋwaŋ-esa edidem; mme Chal-dean enyuŋ ekan obio ekuk; ndien mmɔ eka usuŋ una-isɔŋ.

8Ndien mbon-ekɔŋ mme Chaldean ebine edidem, enyuŋ esim Zedekiah, ke una-isɔŋ Jericho; kpukpru mbon-ekɔŋ esie enyuŋ ekpɔŋ enye esuana.

9Ndien mmɔ emum edidem, enyuŋ eda enye esɔk edidem Babylon ke Riblah ke isɔŋ Hamath; ndien enye ekpe ikpe ye enye.

10Ndien edidem Babylon owot nditɔ-iren Zedekiah ke iso esie, onyuŋ owot kpukpru mbɔŋ Judah ke Riblah.

11Enye onyuŋ otibi Zedekiah enyin, onyuŋ ɔkɔbi ke ŋkpɔkɔbi okpoho; ndien edidem Babylon onyuŋ ada enye aka ke Babylon, ekesin ke ufɔk ukwak tutu osim ke usen mkpa esie.

12Ekem ke ɔyɔhɔ ɔfiɔŋ ition, ke ɔyɔhɔ usen ɔfiɔŋ duop, oro edi ɔyɔhɔ isua ɔbɔŋ Nebuchadrezzar edidem Babylon efurenaŋ, Nebu-zaradan etubom mbon ukpeme edidem, emi asaŋade utom edidem Babylon, edisim Jerusalem;

13ndien ɔfɔp ufɔk Jehovah ye ufɔk edidem; onyuŋ ɔfɔp kpukpru mme ufɔk Jerusalem, ye kpukpru ikpɔ ufɔk ke ikaŋ.

14Ndien kpukpru mbon ekɔŋ mme Chaldean, eke esaŋade ye etubom mbon ukpeme edidem, ewuri ofuri ibibene Jerusalem ekan ekuk.

15Nebuzaradan etubom mbon-ukpeme edidem onyuŋ ataŋ ndusuk nditɔ ubueme, ye mbio-obio efen eke esuhɔde ke obio, ye mmɔ eke ediande idem ye edidem Babylon, ye otu owo eŋwen ɔnyɔŋ ke Babylon.

16Nebuzaradan etubom mbon ukpeme edidem onyuŋ osuhɔ ndusuk mme ubuene nditɔ obio, ete edi mbon iŋwaŋ-vine ye mme ofuŋ-isɔŋ.

17Mme Chaldean enyuŋ ebom mme adaha okpoho oro edude ke ufɔk Jehovah, ye udiɔhɔ akpaŋkpaŋ, ye mkpɔdiɔhɔ-mmɔŋ okpoho oro odude ke ufɔk Jehovah, ndien emen ofuri okpoho mmɔ enyɔŋ ke Babylon.

18Mmɔ enyuŋ eda eso, ye uwobi-ntɔŋ, ye udiɔŋ utuenikaŋ, ye bowl, ye ikpaŋ idaŋ, ye kpukpru mkpoduoho okpoho eke mmɔ edade enam ŋkpɔ, enyɔŋ.

19Etubom mbon ukpeme onyuŋ ada ikpɔ bowl, ye mme censer, ye bowl, ye eso ye uwuk utuenikaŋ, ye ikpaŋ idaŋ, ye cup, eke edide gold, gold, ye eke edide silver, silver, onyɔŋ.

20Mme adaha mbiba ye mkpɔdiɔhɔ-mmɔŋ kiet, ye enaŋ mbo duopeba okpoho oro edude ke idak, ye udiɔhɔ-akpaŋkpaŋ oro edidem Solomon akanamde ɔnɔ ufɔk Jehovah: okpoho kpukpru ŋkpɔ emi inyeneke idomo.

21Ndien ama edi mme adaha, idaha adaha kiet edi ibio idomo-okuk efureta; ndien uruk ibio idomo-okuk duopeba akara enye okuk, enye onyuŋ odobi ekem ye nnuen-ubɔk inaŋ, onyuŋ edi aba.

22Ibuot okpoho odoro enye ŋko, idaha ibuot kiet onyuŋ edi ibio idomo-okuk ition, iyire ye pomegranate enyuŋ ediana ibuot oro ekan ekuk, kpukpru edi okpoho. Adaha eken ye mme pomegranate enyuŋ etie kpa ntem.

23Mme pomegranate edi anaŋ ye efure-kiet ese ofum; kpukpru mme pomegranate emi edianade ye iyire ekan ekuk edi ikie.

24Ndien etubom mbon-ukpeme edidem ada Seraiah akpan oku ye Zephaniah udiana oku, ye mme etie usuŋ mbita:

25enye onyuŋ ada eunuch kiet emi edide etubom mbon-ekɔŋ ke obio; ye owo itiaba ke otu mmɔ emi ekekutde iso edidem, emi edude ke obio, ye andiwet ŋwed etubom mbon-ekɔŋ, eke okotde mbio-obio edi ekɔŋ; ye mbio iŋwaŋ ata emi ekutde ke obio.

26Ndien Nebuzaradan etubom mbon-ukpeme emen mmɔ efep, onyuŋ ada mmɔ ɔsɔk edidem Bayblon ke Riblah.

27Ndien edidem Babylon ɔtɔ mmɔ owot ke Riblah, ke isɔŋ Hamath; onyuŋ ataŋ Judah ke isɔŋ mmɔ efep.

28Mme mmɔ emi edi mmɔ oro Nebuchadrezzar akataŋde efep: ke ɔyɔhɔ isua itiaba, tɔsin Jew ita ye owo edip ye ita:

29ke ɔyɔhɔ isua Nebuchadrezzar efureta (enye ataŋ) mbio-obio Jerusalem ikie itiaita ye edip ye duopeba:

30ke ɔyɔhɔ isua Nebuchadrezzar edip ye ita, Nebuzaradan, etubom mbon-ukpeme edidem, ataŋ mme Jew owo ikie itiaba ye aba ye ition: kpukpru owo esim tɔsin inaŋ ye ikie itiokiet.

31Edikem ke ɔyɔhɔ isua edip ye efureba nte eketaŋ Jehoiachin edidem Judah efep, ke ɔyɔhɔ ɔfiɔŋ duopeba, ke ɔyɔhɔ usen ɔfiɔŋ edip ye ition, Evil-merodach edidem Babylon, ke isua oro enye adade ubɔŋ, emenere ibuot Jehoiachin edidem Judah ke enyɔŋ, onyuŋ osio enye ke ufɔk ukwak,

32onyuŋ ɔdɔhɔ ufan-ufan ye enye, onyuŋ emenere itie esie onim ke enyɔŋ akan itie ndidem oro edude ye enye ke Babylon;

33onyuŋ ɔkpuhɔre enye edisine-ŋkpɔ ufɔk ukwak; ndien enye adia ŋkpɔ ke iso esie kpukpru usen uwem esie.

34Ndien ama edi udeme udia esie, edidem Babylon esin enɔ enye udeme kpukpru ini, nte ekemde kpukpru usen, tutu osim usen enye akpade, ke ofuri usen uwem esie.