2 CHRONICLES 26 - Efik Old Bible With Sectional Headings

Ukara Uzziah ke Judah

1NDIEN kpukpru mbio Judah eda Uzziah, emi okosimde isua efurekiet, enim enye ke edidem ke itie ete esie Amaziah.

2Enye ɔbɔp Eloth, onyuŋ ada enye ɔnɔ Judah, adaŋemi edidem ɔsuhɔrede ana ye mme ete esie.

3Uzziah osim isua efurekiet ke ini enye adade ubɔŋ, ndien enye edi edidem ke Jerusalem ke isua aba ye duopeba. Ndien enyiŋ eka esie ekere Jechiliah aŋwan Jerusalem.

4Ndien enye anam se inende ke iso Jehovah, nte Amaziah ete esie akanamde kpukpru.

5Ndien enye etiene Abasi ke eyo Zechariah, emi ekenyenede ifiɔk ŋkukut Abasi: ndien adaŋa ini nte enye etienede Jehovah, Abasi ofori enye.

6Ndien enye ɔwɔrɔ aka akaŋwana ekɔŋ ye mme Philistine, onyuŋ owuri ibibene Gath, ye ibibene Jabneh, ye ibibene Ashdod, onyuŋ ɔbɔp obio ke Ash-dod, ye ke otu mme Philistine.

7Ndien Abasi aŋwam enye aŋwana ye mme Philistine, ye mme Arabian, emi eduŋde ke Gurbaal, ye mme Mehunim.

8Mme Ammonite ŋko enɔ Uzziah enɔ: ndien etop esie ɔwɔrɔ osim edem eke edukde Egypt; koro enye ɔsɔŋde ubɔk eti-eti.

9Uzziah onyuŋ ɔbɔp edikoŋ ufɔk ke Jerusalem, ke ɔtɔ inua-otop inuk, ye ke eke inua-otop ebedeŋ, ye ke eke inua-otop ke ɔtɔ ukabare ibibene, onyuŋ anam mmɔ esɔŋɔ.

10Enye onyuŋ ɔbɔp tower ke wilderness, onyuŋ otibi ediwak obube mmoŋ; koro enye enyenede ediwak ufene ke una-isɔŋ edem inyaŋ, ye ke una-isɔŋ edem Jordan; ye mme andifuŋ isɔŋ ye mbon-udiɔŋ vine ke ikpɔ obot, ye ke Carmel: koro enye edide ama-iŋwaŋ.

11Ndien ŋko Uzziah ekenyene ediwak mbon-ekɔŋ ke ubɔk Hananiah, owo mme etubom edidem kiet, emi ewɔŋɔde ke udim eka ekɔŋ ke ibat mmɔ, eke etimde ke ubɔk Jeiel andiwet ŋwed, ye eke Maaseiah andidaha.

12Ofuri ibat mme etubom mme ete mbon-uko edi tɔsin owo iba, ye ikie itiokiet.

13Udim ekɔŋ emi odude ke ubɔk mmɔ edi tɔsin itie ikie ita, ye tɔsin owo ikie iba, ye ikie ition, eke eŋwanade ekɔŋ ke akwa odudu, enyuŋ etienede edidem eŋwana ye mme asua esie.

14Ndien Uzziah otim otu-ekɔŋ, ye eduat, ye ndun, ye edisine-ŋkpɔ ekɔŋ, ye utiga, ye ŋkpɔ utop-itiat, ɔnɔ mmɔ.

15Ndien ke Jerusalem enye onyuŋ anam ŋkpɔ emi otode mbon-usɔ ke ibuot, man edori mmɔ ke tower, ye ke inuk ibibene, man etop idaŋ ye ikpɔ itiat. Ndien etop esie ɔwɔrɔ osim anyan idut; koro eŋwamde enye ndyɔ-ndyɔ, tutu enye ɔsɔŋɔ.

16Ekem adaŋemi enye ɔsɔŋɔde ntre, esit esie akabare okpon, esin enye ɔdiɔk, ndien enye edue Jehovah Abasi esie, onyuŋ oduk ke temple Jehovah ndifɔp incense ke itie ufɔp incense.

17Ndien Azariah oku etiene enye ke edem oduk, ye mme oku Jehovah, mbon-uko anaŋ ŋko;

18mmɔ enyuŋ eda ebiɔŋɔ Uzziah edidem, enyuŋ edɔhɔ enye, ete, Uzziah, inyeneke fi ndifɔp incense nnɔ Jehovah, edi enyene mme oku nditɔ Aaron, emi enimde mmɔ, ete efɔp: wɔrɔ ke edisana ebiet; koro afo emedue; ndien Jehovah Abasi idiyakke fi ada ukpono ke esit.

19Ndien esit ayat Uzziah, enye onyuŋ akama censer ufɔp incense ke ubɔk esie: ndien ke ini enye osuk ayayat esit ye mme oku, akpa-mfia ɔtɔ enye ke ɔkpɔ-iso ke iso mme oku ke ufɔk Jehovah, ke ŋkan itie ufɔp incense.

20Ndien ke ini Azariah, ɔbɔŋ oku ye kpukpru mme oku ekutde enye, sese, akpa-mfia ɔtɔ enye ke ɔkpɔ-iso, ndien mmɔ enuk enye esio do: enye nde onyuŋ emen idem ɔwɔrɔ, koro Jehovah ɔkɔtɔde enye.

21Ntre ke Uzziah edidem ɔdɔŋɔ akpa-mfia tutu osim usen mkpa esie, onyuŋ oduŋ ke ufɔk mbon udɔŋɔ, nte owo akpa-mfia; koro edianarede enye ke ufɔk Jehovah efep: ndien Jotham eyen esie akama ufɔk edidem, onyuŋ ekpe ikpe mbio-obio.

22Ndien Isaiah prophet eyen Amoz ewet mbemiso ye akpatre ikɔ Uzziah eke esuhɔde.

23Ekem Uzziah ɔsuhɔre ana ye mme ete esie ede, ndien mmɔ ebuk enye ye mme ete esie ke ebiet-ubuk ndidem: koro mmɔ edɔhɔde ete, Enye edi owo akpa-mfia. Ndien Jotham eyen esie ada ubɔŋ ke itie esie.