LEVITICUS 7 - Efik Old Bible With Sectional Headings

Ɔyɔhɔ Uwa Usio Isop

1NDIEN emi onyuŋ edi ewuhɔ uwa isop: enye edi ata edisana.

2Ke ɔtɔ emi ewotde edifɔp uwa ke ediwot uwa isop: ndien owo osime iyip esie ke itie-uwa akanade okuk.

3Ndien yak esio enye ofuri ikpɔŋ, ye isim, ye ikpɔŋ emi ɔfuhɔde ke ŋkpɔ esit idibi, eda edi ye ekput mbiba,

4ye ikpɔŋ emi adianade mmɔ, emi adianade ke isin, ye caul emi adianade esit; yak esio enye efep ekpere ekput:

5ndien oku ɔfɔp mmɔ ke itie-uwa, nte uwa ikaŋ, ɔnɔ Jehovah: enye edi uwa isop.

6Kpukpru irenowo ke otu mme oku edita enye: yak eta enye ke edisana ebiet: enye edi ata edisana.

7Uwa isop ebiet uwa idiɔk ido: mmɔ esaŋa ewuhɔ kiet; oku eke edidade enye osio isop, edida enye enyene.

8Ndien ama edi oku emi awade edifɔp uwa owo, ikpa edifɔp uwa emi enye awade edinyene oku oro.

9Ndien ŋko ama edi kpukpru inuak-udia eke esaŋde ke usaŋ-uyo, ye kpukpru se enamde ke eso, ye ke ukwak-usaŋ-uyo, oku eke awade enye edida enye ke idem-esie.

10Edi ama edi kpukpru inuak-udia eke ebuakde aran ke esit, eke onyuŋ asatde, edinyene kpukpru nditɔ Aaron ukem-ukem.

11Ndien ŋko emi edi ewuhɔ uwa emem eke owo edidade ɔsɔk Jehovah.

12Edieke enye awade enye ke ekɔm, yak enye ada obukpa uyo eke leaven miduhe, eke ebuakde aran, ɔkɔrɔ ke uwa ekɔm esie, ye mfefere uyo eke leaven miduhe, eyere aran, ye edikaŋ obukpa eti ndom-uyo eke ebuakde aran ke esit.

13Yak enye ada uyo eke enyenede leaven, ɔkɔrɔ ke obukpa uyo oro, edi ke enɔ esie, adian ye uwa ekɔm uwa emem esie.

14Ndien yak enye osio kiet-kiet ke ofuri enɔ oro, ɔnɔ Jehovah ke edimenere uwa, ndien oro edinyene oku eke osimede iyip uwa emem.

15Ndien yak eta unam uwa ekɔm uwa emem esie ke usen enɔ esie; okusuhɔ baba esisit, esiere.

16Edi edieke enɔ esie edide akaŋa, mme ŋkpɔ ima esit, yak eta enye ke usen eke enye adade uwa esie edi: enyuŋ eta se isuhɔde mkpɔŋ:

17Edi ama edi unam uwa eke ɔsuhɔde osim ɔyɔhɔ usen ita, yak efɔp enye ke ikaŋ.

18Ndien edieke editade unam uwa emem esie ke ɔyɔhɔ usen ita, enye idinemke (Jehovah), idinyuŋ ibatke enye inɔ andiwa; enye eyedi ŋkpɔ ndek, ndien ukpɔŋ eke editade enye edida ufen esie.

19Ndien ama edi unam eke otukde ŋkpɔ ekededi eke edehede, owo okuta enye; yak efɔp enye ke ikaŋ: ndien ama edi unam (eken) oro, kpukpru owo eke esanade edita unam oro.

20Ndien edieke owo adade ndek ke idem esie, akata unam uwa emem eke enyenede Jehovah, yak esibe owo oro efep ke oruk esie.

21Ndien ŋko ŋko adaŋemi owo otukde ndek ekededi, edide ndek owo, onyuŋ edide ndek edidehe unam, onyuŋ edide ndek ŋkpɔ ekededi, eke edehede, ndien aka akata unam uwa emem eke enyenede Jehovah, yak esibe owo oro efep ke oruk esie.

22Ndien Jehovah ɔdɔhɔ Moses, ete, Dɔhɔ nditɔ Israel ete,

23Mbufo ekuta baba ikpɔŋ unam enaŋ, ye eke erɔŋ, ye eke ebot.

24Ndien yak eda ikpɔŋ unam eke akpade ikpɔŋ, ye ikpɔŋ unam eke ewaide, enam oruk utom ekededi: edi mbufo ekuta enye baba.

25Ke adaŋemi owo ekededi atade ikpɔŋ eke otode ke unam eke esiode enye uwa ikaŋ enɔ Jehovah, yak esibe owo eke atade ke oruk esie efep.

26Mbufo ekunyuŋ edia baba iyip ke iduŋ mbufo ndomo kiet, edide eke inuen, onyuŋ edide eke ufene.

27Owo ekededi ama adia iyip ekededi, yak esibe owo oro efep ke otu oruk esie.

28Ndien Jehovah onyuŋ ɔdɔhɔ Moses, ete,

29Dɔhɔ nditɔ Israel, ete, Yak owo eke adade uwa emem esie edisɔk Jehovah, osio enɔ esie ke uwa emem esie ada edinɔ Jehovah.

30Yak ubɔk esiemɔ emen uwa ikaŋ Jehovah edi: yak enye ada ikpɔŋ ɔkɔrɔ ke ikɔŋesit edi: ikɔŋesit, man efuŋ enye ke edifuŋ uwa ke iso Jehovah.

31Ndien oku edifɔp ikpɔŋ oro ke itie-uwa: edi ikɔŋesit edinyene Aaron ye nditɔ esie.

32Ndien ŋko mbufo esioŋo afara nnasia ke mme uwa emem mbufo, eda enɔ oku ke eke edimenere.

33Eyen Aaron eke adade iyip uwa emem ye ikpɔŋ ediwa, edida afara nnasia ke udeme esie.

34Koro mbɔde nditɔ Israel edifuŋ ikɔŋesit ye edimenere afara, nsioŋo ke mme uwa emem mmɔ, nda nnɔ Aaron oku ye nditɔ esie ke nsinsi ewuhɔ, ke otu nditɔ Israel.

35Emi edi udeme Aaron, ye udeme nditɔ esie, eke otode ke mme uwa ikaŋ Jehovah, ke usen eke edade mmɔ esɔk Jehovah, ete eda oku;

36emi Jehovah okowukde ete ebɔ nditɔ Israel enɔ mmɔ, ke usen emi enye eyetde mmɔ aran, ke nsinsi ewuhɔ ke ofuri emana mmɔ.

37Emi edi ewuhɔ edifɔp uwa, ye eke inuak udia, ye eke uwa idiɔk ido, ye eke uwa isop, ye eke eriyɔhɔ ubɔk, ye eke uwa emem;

38emi Jehovah eketemede Moses ke obot Sinai, ke usen oro enye etemede nditɔ Israel ete eda enɔ mmɔ esɔk Jehovah ke wilderness Sinai.