EZEKIEL 29 - Efik Old Bible With Sectional Headings

Etiŋ Prophecy Ebaŋa Isɔŋ Egypt

1KE ɔyɔhɔ isua duop, ke ɔfiɔŋ duop, ke usen ɔfiɔŋ duopeba, uyo Jehovah edisim mi, ete,

2Eyen owo, wuk iso fo se Pharaoh edidem Egypt, nyuŋ tiŋ prophecy baŋa enye ye ofuri Egypt.

3Dɔhɔ, ete, Ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye afo Pharaoh edidem Egypt, akamba fiom emi anade ke ufɔt mme akpa mmɔŋ esie, emi ɔdɔhɔde, ete, Akpa mi edi okimmɔ, ami ŋkonyuŋ nnam enye nnɔ idem mi.

4Ndien nyesin fi uwam ke mbaŋ, nyenyuŋ nnam iyak akpa fo eyire fi ke mkpɔk, ndien nyemen fi nsio ke ufɔt akpa fo, ndien kpukpru iyak akpa fo eyeyire fi ke mkpɔk.

5Ndien nyemen fi nduɔk ke wilderness, kpa fi ye kpukpru iyak akpa fo: afo eyeduɔ ke iso isɔŋ; iditaŋke fi, idinyuŋ imenke fi ibon: nyeda fi nnɔ mme unam ikɔt ye mme inuen enyɔŋ eta.

6Ndien kpukpru mme andiduŋ Egypt eyefiɔk ete ke ami ndi Jehovah, koro mmɔ edide esaŋ nnyanyaŋa ufɔk Israel.

7Ke adaŋemi mmɔ emumde fi ke ubɔk, afo ɔbuŋɔ onyuŋ asiak mmɔ ofuri afara: ndien ke ini mmɔ eberede idem ye afo, afo ɔbuŋɔ onyuŋ ayak ofuri isin mmɔ ada.

8Mmɔdo ntem ke Ɔbɔŋ Jehovah ɔdɔhɔ ete, Sese, mmɔŋ nda ofut ntiene fi, nyenyuŋ nsibe fi owo ye ufene mfep.

9Ndien isɔŋ Egypt eyekabare edi ndon ye ŋwure, ndien mmɔ eyefiɔk ete ke ami ndi Jehovah; koro enye ɔdɔhɔde, ete, Akpa edi okimmɔ, ami ŋkonyuŋ nnam.

10Mmɔdo, sese, ami nyenam ikɔ ye afo ye akpa mmɔŋ fo; nyenyuŋ nnim isɔŋ Egypt ke ata ŋwure ye ndon, ɔtɔŋɔde ke Migdol tutu osim ke Syene: tutu onyuŋ osim ke adaŋa Kush.

11Ndien ukot owo idisaŋake ke esit ibe, ukot enaŋ idinyuŋ isaŋake ke esit ibe, owo idinyuŋ iduŋke enye ke ofuri isua aba.

12Ndien nyenim isɔŋ Egypt ke nsobo ke ufɔt mme idut emi esobode, nnyuŋ nnim mme obio esie ke ŋwure ke ufɔt mme obio eke ewurede. Mmɔ eyesobo ke ofuri isua aba: nyenyuŋ nsuan Egypt ke otu mme idut, nnyuŋ ŋwari mmɔ ke otu mme obio.

13Koro ntem ke Ɔbɔŋ Jehovah ɔdɔhɔ, ete, Ke utit isua aba ke nditaŋ Egypt ke mme idut emi mmɔ esuanade ke esit, mfep mbon:

14ndien nyeda mbon ntaŋ-mfep Egypt mfiak; nnyuŋ nda mmɔ nnyɔŋ ke isɔŋ Pathros, ke isɔŋ emana mmɔ; ndien do ke mmɔ edidi obukpo idut.

15Enye eyedi obukpo akan mme idut efen, idinyuŋ imenke aba idem ikan mme idut.

16Ndien mmɔ ididige aba iberedem ufɔk Israel, ke enam mmɔ eti idiɔk ido mmɔ, koro mmɔ ekabarede ebine mmɔ: ndien mmɔ eyefiɔk ete ke ami ndi Ɔbɔŋ Jehovah.

17Edikem ke ɔyɔhɔ isua edip ye itiaba, ke akpa ɔfiɔŋ, ke akpa usen ɔfiɔŋ, uyo Jehovah osim mi, ete,

18Eyen owo, Nebuchadrezzar edidem Babylon ekesin mbon-ekɔŋ esie enam akwa utom ebaŋa Tyre: kpukpru ibuot ekabare edi ibɔ, kpukpru afara enyuŋ eyaŋade: ndien enye ye mbon-ekɔŋ esie ikwe ŋkpɔ-eyen-utom ke Tyre, nte ekemde ye utom oro enye akanamde abaŋa enye:

19mmɔdo ntem ke Ɔbɔŋ Jehovah ɔdɔhɔ, ete, Sese, mmɔŋ nda isɔŋ Egypt nnɔ Nebuchadrezzar edidem Babylon; ndien enye eyemen ŋkpɔ emi enye okonimde efep, onyuŋ obume enye, onyuŋ ataŋ ŋkpɔ esie ke ŋkan-ubɔk; ndien oro eyedi ŋkpɔ-eyen-utom mbon-ekɔŋ esie.

20Mmada isɔŋ Egypt nnɔ enye ke utip esie, emi enye aŋwanade ke esit, koro mmɔ ekenamde utom enɔ mi: uyo Ɔbɔŋ Jehovah edi emi.

21Ke usen oro nyenam nduk otibe ɔnɔ ufɔk Israel nnyuŋ nyak fi aŋwaŋade inua ke otu mmɔ: ndien mmɔ eyefiɔk ete ke ami ndi Jehovah.