ISAIAH 1 - Efik Old Bible With Sectional Headings

Ŋkukut Isaiah Abaŋa Idut Judah Anam Ukaŋ Ido

1ŊKUKUT Isaiah eyen Amoz emi enye okokutde abaŋa Judah ye Jerusalem, ke eyo Uzziah, ye Jotham, ye Ahaz, ye Hezekiah, ndidem Judah.

2Mbufo enyɔŋ ekop, isɔŋ nyuŋ kpaŋ utɔŋ: koro Jehovah ɔdɔhɔde: Mbɔk, nnyuŋ ŋkɔ nditɔ, ndien mmɔ emekabare esɔŋ ibuot ye ami.

3Enaŋ ɔfiɔk andinyene enye, ass onyuŋ ɔfiɔk ebiet eke ete esie onimde udia ɔnɔ enye: Israel ifiɔkke, ikɔt mi ikereke.

4Ɔdiɔk ɔnɔ idut emi anamde idiɔk, mbio emi ebiomde idiɔk ido, ubon mme oburobut owo, nditɔ emi ekabarede ediɔk! Mmɔ emekpɔŋ Jehovah, emesin Edisana Abasi Israel ke ndek, emekabare efiak edem.

5Edinam didie esuk emia mbufo? Mbufo edediɔŋ ekabare ekpɔŋ mi: ofuri ibuot ke ɔdɔŋɔ, ofuri esit ke onyuŋ akpa.

6Ɔtɔŋɔde ke ikpat ukot tutu osim ke ibuot, baba nsɔŋidem iduhe ke esit; ke edi unan ye ŋkukip, ye obufa ufen: ifikke mmɔ, inyuŋ ibɔpke, inyuŋ iyetke mmɔ aran inam emem.

7Esobo isɔŋ mbufo, mme obio mbufo eta ikaŋ; ama edi obot iŋwaŋ mbufo, isen owo ke edia enye ke iso mbufo, enyuŋ esobo enye nte ŋkpɔ eke isen owo ebiatde.

8Ndien adiaha Zion osuk nte efe ke iŋwaŋ-vine, nte ataya ke iŋwaŋ-ikpan, nte obio eke ekukde.

9Ke mikpedige Jehovah mme udim ɔsuhɔ ata ekpri nsuhɔ ɔnɔ nnyin, nnyin ikpekabare itie nte Sodom, ibiet Gomorrah.

10Mbufo mme ebierikpe Sodom, ekop uyo Jehovah; mbio Gomorrah, ekpaŋ utɔŋ ke ibet Abasi nnyin.

11Jehovah ɔdɔhɔ, ete, Uwak uwa mbufo ɔfɔn mi nso? Mmɔyuhɔ edifɔp uwa okukim, ye ikpɔŋ edisehe unam; iyip enaŋ, ye eke nditɔ erɔŋ, ye eke okpo ebot inyuŋ inemke mi esit.

12Ke ini mbufo edide ndiwut mi idem mbufo, anie oyom emi ke ubɔk mbufo, ete edidigi okure mi?

13Mbufo ekuda aba uwa nsu edi; mmese incense ke ŋkpɔ mbubiam; kpa ntre ke nse ɔfiɔŋ, ye sabbath, ye erikot esop: ŋkwe nte nyɔde idiɔk ido ye ederi.

14Ukpɔŋ mi asasua mbufa ɔfiɔŋ mbufo, ye ini esop mbufo: mmɔ emekabare edobi mi; mmobiom mmɔ tutu ŋkpa mba.

15Ndien ke ini mbufo emenerede ubɔk mbufo, ndip mbufo enyin mi: ndien ŋko ke ini mbufo ewakde ndibɔŋ akam, ami ŋkopke: iyip ɔmɔyɔhɔ mbufo ke ubɔk.

16Mbufo eyet idem enam esana; emen mme idiɔk ido mbufo ke enyin mi efep; etre ndinam idiɔk; ekpep ndinam eti:

17eyom se inende, eneŋere se ikwaŋade, ekpe edinen ikpe enɔ eyen-akpa, eda ye ebe-akpa ke ikpe.

18Jehovah ɔdɔhɔ ete, Mbufo edi ndien, nnyin ikpe ikɔ: mme idiɔk ido mbufo ekpetie nte iduot, eyefia nte snow; ekpeyibe nte crimson, eyekabare nte idet erɔŋ.

19Mbufo ema enyime, enyuŋ ekop, eyedia ufɔn isɔŋ;

20edi ema esin, enyuŋ esɔŋ ibuot, ofut eyedia mbufo: koro edi inua Jehovah ɔdɔhɔ.

21Anam didie obio akpanikɔ akabare edi akpara! se inende ɔkɔyɔhɔ ke esit; eti ido ɔkɔduŋ ke esit; edi ke emi mme owot-owo.

22Silver fo amakabare edi ifuɔ, wine fo amakabare edi mmɔŋ.

23Mbɔŋ fo edi mbon nsɔŋ-ibuot, ye nsaŋa inɔ: kpukpru mmɔ esuk emama enɔ, enyuŋ ebine utip: mmɔ ikpehe ikpe eyen akpa, ikɔ ebe-akpa inyuŋ isimke mmɔ.

24Oro esin Ɔbɔn Jehovah mme udim, Ɔkpɔsɔŋ Abasi Israel ɔdɔhɔ, ete, Ah, nyebiomore mme asua mi ke idem mi mfep, nnyuŋ nsio usiene ye mbon utɔk mi:

25ndien nyeda ubɔk mi mfiak ntiene fi, nnyuŋ nuk ifuɔ fo mfep nnam asana, nnyuŋ ndianare kpukpru ŋket fo mfep:

26nnyuŋ nnam mme ebierikpe fo efiak kpa nte ke akpa, ye mbon item fo, kpa nte ke eritɔŋɔ: ndien ke ŋkpɔ emi ebede, eyekot fi, ete, Obio eti ido, obio akpanikɔ.

27Eyeda ikpe efak Zion, enyuŋ eda eti ido efak nditɔ esie emi ekabarede.

28Edi eyesobo mme oburobut owo ye mme anam idiɔk ini kiet, ndien mmɔ eke ekpɔŋde Jehovah eyetak.

29Koro mmɔ eyeda but ebaŋa ofriyo emi enemde mbufo esit; mbufo eyenyuŋ ekop esuene ebaŋa iŋ-waŋ esa emi mbufo emekde.

30Koro mbufo eyebiet ofriyo emi ikɔŋ esie ekeŋede, ebiet iŋwaŋ eke mmɔŋ miduhe ke esit.

31Ndien ŋkpɔsɔŋ owo eyekabare edi mfube, ŋkpɔ eke enye anamde eyenyuŋ edi ebua ikaŋ, ndien mmɔ mbiba eyeta ikaŋ, baba owo kiet eke onimede idinyuŋ iduhe.