2 CHRONICLES 6 - Efik Old Bible With Sectional Headings

Edidem Solomon Etiŋ Ikɔ Ɔnɔ Nditɔ Israel Kabaŋa Temple Abasi

1NDIEN Solomon ɔdɔhɔ, ete, Jehovah ɔdɔhɔ ete ke imɔ iduŋ ke ata ekim.

2Edi ami mmɔbɔp ufɔk iduŋ nnɔ fi, ye ebiet eke afo oduŋde ke nsinsi.

3Ndien edidem ɔwɔŋɔre iso esie ɔkɔm ofuri esop Israel: ndien ofuri esop Israel edaha eda.

4Ndien enye ɔdɔhɔ, ete, Mbufo etoro Jehovah Abasi Israel, emi akadade inua esie ɔdɔhɔ David ete mi okonyuŋ anam ama ke ubɔk esie, ete,

5“Toto ke usen oro ŋkosiode ikɔt mi ke isɔŋ Egypt mfep, ŋkemekke obio ke baba esien Israel kiet ndibɔp ufɔk, man enyiŋ mi odu do; ŋkonyuŋ mmekke baba owo kiet, man enye edi ɔbɔŋ ikɔt mi Israel:

6edi ŋkemek Jerusalem, man enyiŋ mi odu do; ŋkonyuŋ mmek David, nte enye edi ɔbɔŋ ikɔt mi Israel.”

7Ndien okodu David ete mi ke esit ndibɔp ufɔk nnɔ enyiŋ Jehovah Abasi Israel:

8ndien Jehovah ɔdɔhɔ David ete mi, ete, “Koro okodude fi ke esit, ndibɔp ufɔk nnɔ enyiŋ mi, afo amanam eti koro okodude fi ke esit:

9edi idige afo edibɔp ufɔk oro; edi eyen fo emi editode fi ke idem, enye eyebɔp ufɔk ɔnɔ enyiŋ mi.”

10Ndien Jehovah amanam ikɔ esie emi enye ɔkɔdɔhɔde, ɔsɔŋ ada: ndien mmadaha itie nda ke David ete mi, nnyuŋ ntie ke ebekpo Israel, kpa nte Jehovah ɔkɔdɔhɔde, mma nnyuŋ mbɔp ufɔk emi nnɔ enyiŋ Jehovah Abasi Israel.

11Mma nnyuŋ mmen ekebe emi ediomi Jehovah oro enye okodiomide ye nditɔ Israel odude, nnim ke esit.

12Ndien enye ada ke iso itie-uwa Jehovah ke iso ofuri esop Israel, onyuŋ atat ubɔk esie.

13Koro Solomon akanamde okpokoro okpoho, ɔdiɔk ke ufɔt okure, uniɔŋ esie ibio-idomo-okuk ition, ubom esie ibio-idomo-okuk ition, ye idaha esie ibio-idomo-okuk ita: ndien ada ke esit, onyuŋ ɔtɔŋɔ edɔŋ esie ke iso ofuri esop Israel, onyuŋ atat ubɔk esie ese enyɔŋ,

14onyuŋ ɔdɔhɔ, ete, O Jehovah Abasi Israel, Abasi eke ebietde fi iduhe du ke enyɔŋ ye ke isɔŋ; emi onimde ediomi ye ima ɔnɔ ikɔt fo, emi esaŋade ke iso fo ke ofuri esit mmɔ:

15afo emi adade se afo ɔkɔdɔhɔde owo fo David ete mi, onim ɔnɔ enye, ama ɔdɔhɔ ke inua fo, omonyuŋ anam ke ubɔk fo ama, kpa nte edide mfin emi.

16O Jehovah Abasi Israel, kam da ndien se afo ɔkɔdɔhɔde ye owo fo David, ete mi nim nɔ enye, ete, Idisibeke owo fo ke iso mi ifep ke eritie ke ebekpo Israel: ke nditɔ fo ema ekpeme usuŋ mmɔ, enyuŋ esaŋa ke mbet mi, kpa nte afo akasaŋade ke iso mi.

17O Jehovah Abasi Israel, kam yak uyo fo oro afo ɔkɔdɔhɔde owo fo David akam osu.

18Nte Abasi edidu ye owo ke isɔŋ ke akpanikɔ? Sese, enyɔŋ ye ata enyɔŋ ikemke fi; ŋwaŋwa ediso ufɔk emi mbɔpde!

19Wɔŋɔre, ndien, se akam owo fo, ye mkpeubɔk esie, O Jehovah Abasi mi, nyuŋ kop eseme ye akam emi owo fo ɔbɔŋde ke iso fo:

20man enyin fo etara ese ufɔk emi, ke uwemeyo ye ke okoneyo, idem ebiet emi afo ɔkɔdɔhɔde ete eyesin enyiŋ fo do; nyuŋ kop akam emi owo fo edibɔŋde ese ebiet emi:

21kop ndien mkpeubɔk owo fo, ye eke ikɔt fo Israel, eke mmɔ edikpede ese ebiet emi: tie ke ebiet-iduŋ fo ke enyɔŋ kop; ndien ke ini afo okopde, dahado.

22Edieke owo ediduede mbɔhɔ-iduŋ esie, ndien owo odori enye uŋwɔŋɔ, man anam enye ɔŋwɔŋɔ uŋwɔŋɔ, ndien uŋwɔŋɔ oro ama edi ke iso itie-uwa fo ke ufɔk emi:

23tie ndien ke enyɔŋ kop, nyuŋ nam, nyuŋ kpe ikpe ikɔt fo, nyuŋ sio idiɔk owo usiene, da usuŋ esie dori enye ke ibuot; nyuŋ bat edinen owo ke edinen, nyuŋ nɔ enye nte edinen ido esie edide.

24Ndien edieke ikɔt fo Israel edisuanade ke iso mme asua mmɔ, koro mmɔ ediduede fi; ndien ema ekabare, enyuŋ enyime enyiŋ fo, enyuŋ ebɔŋ ekam, enyuŋ enam mkpe-ubɔk ke iso fo ke ebiet emi;

25ndien afo tie ke enyɔŋ kop, nyuŋ dahado ke idiɔk ido ikɔt fo Israel, nyuŋ da mmɔ fiak ke isɔŋ emi afo ɔkɔnɔde mmɔ ye mme ete mmɔ.

26Adaŋemi enyɔŋ esirede, edim minyuŋ idepke, koro mmɔ ediduede fi; mmɔ ema ebɔŋ akam ke iso ebiet emi, enyuŋ enyime enyiŋ fo, enyuŋ efiak edem ekpɔŋ idiɔk ido mmɔ, ke adaŋemi afo ɔtuhɔde mmɔ;

27tie ndien ke enyɔŋ kop, nyuŋ dahado ke mme idiɔk ido ifin fo, ye eke ikɔt fo Israel, adaŋemi afo etemede mmɔ eti usuŋ, emi mmɔ ekpesaŋade ke esit; nyuŋ nam edim edep ke isɔŋ fo emi afo ɔkɔnɔde ikɔt fo ke udeme.

28Ke ini akaŋ edidude ke isɔŋ emi, ke idiɔk udɔŋɔ edidude, ke nda-eyo, mme mfut, mme ŋkukuŋkpɔyɔriyɔ eke etade edidude; ke ini mme asua mmɔ edikande inua-otop isɔŋ mmɔ ekuk: ke ufen ekededi, mme udɔŋɔ ekededi edidude:

29kpukpru akam, kpukpru mkpeubɔk eke kpukpru owo, ye ofuri ikɔt fo Israel, eke edifiɔkde ufen mmɔ, ye ndutuhɔ mmɔ, edikpede, edinyuŋ emenerede ubɔk mmɔ ese ufɔk emi:

30afo tie ndien ke enyɔŋ, ke ebiet-iduŋ fo, kop, nyuŋ dahado, nyuŋ nɔ owo kpa nte ekemde ye kpukpru ido enye emi afo ɔfiɔkde esit esie: (koro afo ikpɔŋ-ikpɔŋ ɔfiɔkde esit nditɔ Adam:)

31man mmɔ ebak fi, enyuŋ esaŋa ke usuŋ fo kpukpru usen eke mmɔ edidude uwem ke iso isɔŋ eke afo ɔkɔnɔde mme ete nnyin.

32Ndien ŋko, ama edi esen owo eke midige ikɔt fo Israel, edi oto ke anyan idut abaŋa akwa enyiŋ fo, ye ɔkpɔsɔŋ ita fo, ye edimenere ubɔk fo; mmɔ ema edi edibɔŋ akam ke ufɔk emi:

33afo tie ndien ke enyɔŋ, kpa ebiet-iduŋ fo, kop, nyuŋ nam kpukpru se esen owo oro edisemede ɔnɔ fi abaŋa; man kpukpru mme idut ke ererimbot efiɔk enyiŋ fo, enyuŋ ebak fi, kpa nte ikɔt fo Israel enamde, enyuŋ efiɔk ete ke enyiŋ fo odoro ke ufɔk emi ŋkɔbɔpde.

34Adaŋemi ikɔt fo edikade ekɔŋ ye mme asua mmɔ ke usuŋ emi afo edidɔŋde mmɔ, edinyuŋ ebɔŋde akam ese obio emi afo emekde, ye ufɔk emi ami mbɔpde nnɔ enyiŋ fo;

35tie ndien ke enyɔŋ kop akam mmɔ, ye mkpe-ubɔk mmɔ, nyuŋ nam ikpe etebe mmɔ.

36Adaŋemi mmɔ ediduede fi, (koro owo baba kiet eke miduehe, miduhe), ndien afo ediyatde esit ye mmɔ, edinyuŋ ayakde mmɔ ɔnɔ mme asua mmɔ, ndien mmɔ eke emumde mmɔ etaŋ mmɔ enyɔŋ ke isɔŋ eke oyomde, mme eke ekperede:

37ndien mmɔ ema ekabare esit mmɔ ke isɔŋ eke eketaŋde mmɔ eka, enyuŋ ekabare ekpe fi ubɔk ke isɔŋ eke eketaŋde mmɔ enyɔŋ, ete “Nnyin imanam idiɔk, imedue, inyuŋ idiɔk”:

38ndien edieke mmɔ efiakde etiene fi ke ofuri esit mmɔ, ye ke ofuri ukpɔŋ mmɔ, ke isɔŋ ntaŋ-mfep mmɔ emi eketaŋde mmɔ enyɔŋ, enyuŋ ebɔŋ akam ese isɔŋ mmɔ emi afo ɔkɔnɔde mme ete mmɔ, ye obio emi afo emekde, ye ufɔk emi mbɔpde nnɔ enyiŋ fo:

39tie ndien ke enyɔŋ, ebiet-iduŋ fo, kop akam mmɔ, ye mkpe-ubɔk mmɔ, nyuŋ nam ikpe etebe mmɔ, nyuŋ dahado nɔ ikɔt fo eke eduede fi.

40O Abasi mi, mbɔk, tat enyin fo, nyuŋ kpaŋ utɔŋ fo nɔ akam ebiet emi.

41Daha ke enyɔŋ, ndien, O Jehovah Abasi, duk ke ebiet nduɔk-odudu fo, afo, ye ekebe nsɔŋ-idem fo: yak mme oku fo, O Jehovah Abasi esine erinyaŋa ke idem, yak mbon ima fo enyuŋ edat esit ke mfɔn.

42O Jehovah Abasi, kunuk iso emi afo ekeyetde aran, ufep: ti ima David owo fo.