2 ŊWED TIMOTHY 2 - Efik Old Bible With Sectional Headings

Ebiom Ukut Nte Eti Owo Ekɔŋ Christ

1AFO ndien, eyen mi, sɔŋɔ idem ke mfɔn eke odude ke Christ Jesus.

2Nyuŋ men mme ikɔ emi okokopde mi ke inua ke iso ediwak ntiense, yak nɔ mbon akpanikɔ, eke edikemede ndikpep owo eŋwen ŋko.

3Tiene mi biom ukut, nte eti owo-ekɔŋ Christ Jesus.

4Baba owo kiet eke akade ekɔŋ idaha idem ikɔkɔmɔ ke mbubehe uwem emi, man enye enem andisin enyiŋ esie ke ŋwed mbon-ekɔŋ esit.

5Onyuŋ edieke owo aŋwanade ndikan ke mbre, iyarake enye anyanya ke enye misaŋake ke mme item iŋwana.

6Ɔtɔ-iŋwaŋ emi akpade utom enyene ndibem iso ndia mbuŋwum iŋwaŋ.

7Tim kere fiɔk se ndɔhɔde, koro Ɔbɔŋ eyenɔ fi ɔniɔŋ ke kpukpru nde.

8Ti Jesus Christ, emi ekesetde ke mkpa, emi okotode ke ubon David, nte ŋkwɔrɔde ke gospel mi;

9emi ŋkutde ukut ke esit, tutu esin mi ke ŋkpɔkɔbi nte anam-idiɔk: edi owo ikɔbike ikɔ Abasi.

10Ntre ke mme ime ye kpukpru ŋkpɔ mbaŋa mmɔ emi Abasi ekemekde, man mmɔ ŋko enyene erinyaŋa emi odude ke Christ Jesus, enyuŋ ebɔ nsinsi ubɔŋ.

11Ikɔ emi edi akpanikɔ, ete,

Koro edieke ima ikpa ye Enye, iyenyuŋ idu uwem ye Enye;

12Edieke imede ime, iyeda ubɔŋ ye Enye;

Edieke ikaŋde Enye, Enye eyekaŋ nnyin;

13Edieke nnyin minamke akpanikɔ, Enye osuk edi anam-akpanikɔ;

Koro Enye mikemeke ndikpuhɔre ŋkpɔŋ uduot Esie.

14Ti mmɔ ŋkpɔ emi; sɔŋɔ wuk mmɔ ke iso Ɔbɔŋ, ete mmɔ eku-ŋwana ebaŋa ikɔ-inua, koro oro midoroke mmɔ ke baba usuŋ kiet, edi akam ososobo mme andikop mmɔ.

15Sin ifik wut Abasi idem fo, ete idi owo eke edomode efiɔk, anam-utom eke minyeneke ntak ndikop but, edi itimde isiak ikɔ akpanikɔ.

16Fep idem ke idiɔk ye ikpikpu ndutiŋ; koro oro edi se idinamde mme owo ekɔri ke unana uteŋe Abasi, ndien se mmɔ etiŋde eyetara nte ɔnɔk, Hymenaeus ye Philetus edu ke otu mmɔ;

17ema edue ekpɔŋ akpanikɔ, ete, eriset ke mkpa ebebe ama;

18Ntem ke mmɔ ebiat mbuɔtidem ndusuk owo.

19Edi ɔkpɔsɔŋ isɔŋ, eke Abasi okowukde ufɔk Esie ke esit, ɔsɔŋɔ ada; ndien enyene idiɔŋɔ ke esit ntem, ete,

Abasi ɔmɔfiɔk mmɔ emi enyenede Enye;

Ye,

Yak kpukpru owo emi esemede ekot enyiŋ Ɔbɔŋ edianare ekpɔŋ ukwaŋkpɔ.

20Edi ke akwa ufɔk idige mkpoduoho gold ye mkpoduoho silver ikpɔŋ edu, edi se edade eto ye mbat enam enyuŋ edu; enim ndusuk mmɔ enɔ itie ukpono, enyuŋ enim mmɔ eken enɔ usuhɔreitie.

21Edieke owo adianarede idem ye mbio idiɔk ndutiŋ, enye eyedi ŋkpɔ-utom emi enyenede ukpono, ŋkpɔ-utom emi Abasi anamde asana, emi Ete ufɔk ekemede ndida nnam ŋkpɔ, emi ebeŋede enye enim enɔ kpukpru oruk eti utom.

22Fehe kpɔŋ mme idiɔk itɔŋ ini uyen, nyuŋ tiene mmɔ eke esemede ekot Ɔbɔŋ ke edisana esit, bine edinen ido, ye mbuɔtidem, ye ima, ye emem.

23Edi sin ndiduk ke ndisime eneni ɔkɔi sia ɔfiɔkde ete mmɔ ededemere utɔk.

24Ndien owo Ɔbɔŋ inyeneke ndidi owo utɔk; enye enyene ndinyene suŋ-suŋ ido ye kpukpru owo; enye enyene ndifiɔk nditeme owo, nnyuŋ mme ime ke ini enamde enye idiɔk:

25enye onyuŋ enyene ndida ata nsuk-esit nnam mmɔ emi ebiɔŋɔde eneŋere esaŋa; mme eyeto do Abasi anam mmɔ ekabare esit enyene ifiɔk akpanikɔ,

26enyuŋ enyaŋa idem esio ke afia eke Satan akadade omum mmɔ, ke owo Abasi ama akada mmɔ nte mbuot-ekɔŋ, man mmɔ edu uwem esaŋa nte Enye amade.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help