ISAIAH 45 - Efik Old Bible With Sectional Headings

Abasi Emek Cyrus Nte Ŋkpɔ Utom Esie

1NTEM ke Jehovah ɔdɔhɔ Cyrus, emi enye eyetde aran, emi mmumde enye ubɔk nnasia, nte, Nyedigi mme idut ke iso esie; nnyuŋ ntat ndidem isin, man mberere itim ke iso esie; ndien mmɔ idiberike enyin-usuŋ;

2Ami nyebem fi iso nsaŋa, nnyuŋ nneŋere ibombom: nyenuak mme itim okpoho, nnyuŋ ŋkpok mme-usin-usuŋ-ukwak:

3ndien nyenɔ fi unim ŋkpɔ uto ekim, ye inyene eke odobide, man afo ɔfiɔk, ete ke edi ami Jehovah emi ŋkotde fi enyiŋ, kpa Abasi Israel.

4Ŋkot fi enyiŋ ŋko, mbaŋa owo mi Jacob ye Israel emi mmekde: ŋkot fi enyiŋ ukpono ŋko, edi afo ufiɔkke mi.

5Ami ndi Jehovah, ndien efen iduhe du, Abasi iduhe ke mibɔhɔke ami, mbɔbɔ fi mbɔbɔ, ndien afo ufiɔkke mi:

6man mmɔ efiɔk ke edem usiaha-utin, ye ke edem usop-utin, ete ke baba kiet iduhe ke mibɔhɔke ami, ami ndi Jehovah, ndien baba efen iduhe.

7Mbot uŋwana, nnyuŋ mbot ekim: nnam emem, nnyuŋ mbot idiɔk: ami Jehovah nnam kpukpru ŋkpɔ emi.

8Mbufo mme heaven ke enyɔŋ ekeŋe, yak mbubit enyɔŋ enyuŋ eŋwaŋa edinen ido: yak isɔŋ ɔkubɔre, yak erinyaŋa ye edinen ido esiaha, yak enye oŋwum mmɔ ini kiet: ami Jehovah mbot enye.

9Ɔdiɔk ɔnɔ owo eke aŋwanade ye andibot enye! Mfiɔk kiet ke otu mfiɔk mbat. Nte mbat ɔdɔhɔ andibot, ete, Afo anam nso? Nte utom fo ɔdɔhɔ, ete, Enye inyeneke ubɔk?

10Ɔdɔdiɔk ɔnɔ owo eke ɔdɔhɔde Ete esie, ete, Afo edibon nso? Ɔdɔhɔ ye ŋwan, ete, Afo ediman nso?

11Emi edi uyo Jehovah Edisana Abasi Israel, ye andibot enye; mbufo ebup mi ŋkpɔ edidide: ama edi nditɔ mi, ye utom ubɔk mi, mbufo eyak mi ŋkere mmɔ.

12Edi ami ŋkanam isɔŋ, nnyuŋ mbot owo emi edude ke esit: ami, kpa ubɔk mi, nneŋere ikpa-enyɔŋ, mmonyuŋ ŋwuk ofuri udim mmɔ.

13Ami ndemere enye nsin ke edinen ido, nyenyuŋ nneŋere kpukpru usuŋ esie: enye eyebɔp obio mi, onyuŋ asana ikɔt mi emi eketaŋde efep, ayak, idige ke utip inyuŋ idige ke enɔ.

14Emi edi uyo Jehovah mme udim. Ntem ke Jehovah ɔdɔhɔ, ete, Utom Egypt ye udori Ethiopia, ye eke mme Sabean, nyan owo, eyebe etiene fi, enyuŋ enyene fi: eyetiene fi eka; ke ŋkpɔkɔbi ke mmɔ edibe, enyuŋ enuhɔ enɔ fi, enyuŋ ekpe fi ubɔk, ete, Abasi odu ke otu mbufo ikpɔŋ: efen inyuŋ iduhe, Abasi iduhe.

15Ke akpanikɔ afo edi Abasi eke odibede, O Abasi Israel, andinyaŋa.

16But ye esuene ŋko eyenam mmɔ kpukpru: mmɔ eke esɔide mbiet ŋkpɔ eduk ke esuene ini kiet.

17Jehovah anyaŋa Israel nsinsi erinyaŋa: but ye esuene idinamke mmɔ ke nsinsi-nsinsi.

18Koro emi edi uyo Jehovah andibot enyɔŋ; enye edi Abasi emi obotde isɔŋ, onyuŋ anamde enye; enye owuk enye, ibotke enye ke ikpikpu, obot enye man eduŋ ke esit: ami ndi Jehovah, ndien efen iduhe.

19Ŋkɔdɔhɔke ke ndibe ebiet, ke ŋkim-ŋkim ebiet isɔŋ: ndɔhɔke ubon Jacob, nte, Mbufo eyom mi ikpikpu: ami Jehovah ndɔhɔ akpanikɔ, ntiŋ se inende.

20Mbufo mbio mme idut eke ebɔhɔde, esop idem edi; esaŋa ɔtɔ kiet ekpere; mmɔ eke ebiomde eto edisɔi mbiet mmɔ, enyuŋ enamde mkpe ubɔk enɔ Abasi eke mikemeke ndinyaŋa, ifiɔkke ŋkpɔ.

21Mbufo etiŋ, enyuŋ eda edi; yak mmɔ enyuŋ esobo ibuot ɔtɔ kiet: anie okobuk emi ke eset? anie eketiŋ enye tutu ko? Nte idige ami Jehovah? ndien Abasi efen iduhe ke mibɔhɔke ami: edinen Abasi emi onyuŋ edide andinyaŋa iduhe ikɔrɔ ye ami.

22Mbufo kpukpru mme idut ererimbot, ekabare ese mi, ndien eyenyaŋa mbufo: koro ami ndide Abasi, ndien efen iduhe aba.

23Mmotomo idem mi, ikɔ ɔmɔwɔrɔ mi ke inua edinen, idinyuŋ ifiakke, nte kpukpru edɔŋ eyetɔŋɔ enɔ mi, kpukpru edeme eyenyuŋ etomo.

24Owo ɔdɔhɔ, ete, Ami nnyene edinen ido ye odudu ke Jehovah ikpɔŋ-ikpɔŋ: enye eyebine enye; ndien but eyenam kpukpru mmɔ eke eyatde esit ye enye.

25Ikpe eyesana ofuri ubon Israel, mmɔ eyenyuŋ ebure ke Jehovah.