1EKEM Ben-hadad edidem Syria obon kpukpru mbon-ekɔŋ esie: mbɔŋ edip ye duopeba enyuŋ edu ye enye, ye horse, ye chariot: ndien enye ɔdɔk aka akakan Samaria okuk, onyuŋ aŋwana ekɔŋ ye enye.
2Ndien enye ɔdɔŋ mme isuŋ-utom ke ɔtɔ Ahab edidem Israel ke esit obio,
3onyuŋ ɔdɔhɔ enye, ete, Ntem ke Ben-hadad ɔdɔhɔ ete, Silver fo ye gold fo enyene mi; iban fo, ye nditɔ fo eke efɔnde fɔn, enyuŋ edi okimmɔ.
4Ndien edidem Israel ɔbɔrɔ ete, Ekem ke uyo fo, ɔbɔŋ mi edidem, ami ye kpukpru okim inyene fi.
5Ekem mme isuŋ oro efiak ekedɔhɔ ete, Ntem ke Ben-hadad ɔdɔhɔ ete, Mmɔdɔŋ ekedɔhɔ fi, nte, Nɔ mi silver fo, ye gold fo,
6ye iban fo, ye nditɔ fo; ke adaŋa ini ntem mkpɔŋ nditreke ndidɔŋ ikɔt mi utom ke ɔtɔ fo; ndien mmɔ eyeduŋɔ ufɔk fo, ye ufɔk ikɔt fo; ndien ama ekem mmɔ eyemen kpukpru se enyin fo amade, esin ke ubɔk mmɔ eda enyɔŋ.
7Ndien edidem Israel okot kpukpru mbiowo Israel edi, ndien ɔdɔhɔ ete, Mbɔk, mbufo efiɔk enyuŋ ese nte owo emi oyomde ndibak ibak: koro enye ɔkɔdɔŋde utom ke ɔtɔ mi, abaŋa iban mi, ye nditɔ mi, ye silver mi, ye gold mi; ndien ami ŋkesinke enye.
8Ndien kpukpru mbiowo oro ye kpukpru owo edɔhɔ enye, ete, Kukop, ku-nyuŋ unyime.
9Ndien enye ɔdɔhɔ mme isuŋutom Ben-hadad, ete, Mbufo edɔhɔ ɔbɔŋ mi edidem, ete, Nyenam kpukpru se afo ɔkɔdɔŋde utom ke ɔtɔ mi abaŋa ke akpa ini: edi ama edi ŋkpɔ emi, ndikwe nte nnamde. Ndien mme isuŋ oro enyɔŋɔ, eda ikɔ oro eketiŋ enɔ enye.
10Ndien Ben-hadad ɔdɔŋ ekedɔhɔ enye, ete, Yak mme abasi enam mi ntem, yak enyuŋ enam eka iso, ke ntɔŋ Samaria ama ekem nte kpukpru mmɔ emi esaŋade ye ami ewobide ke eka-ubɔk.
11Ndien edidem Israel ɔbɔrɔ ete, Mbufo edɔhɔ ete, Yak owo eke ɔbɔbɔbɔ ŋkpɔ ke idem okubure mbure nte owo eke ososio,
12Edikem adaŋemi enye (Ben-hadad) okopde ikɔ emi, enye ke ɔŋwɔŋwɔŋ mmin ye ndidem oro ke ataya esie; ndien enye ɔdɔhɔ ikɔt esie, ete, Mbufo etim idem mbufo ke ŋka ke ŋka. Ndien mmɔ etim idem mmɔ ke ŋka, ete iŋwana ekɔŋ ye obio.
13Ndien, sese, prophet kiet aka ke ebiet Ahab edidem Israel, ɔkɔdɔhɔ ete, Ntem ke Jehovah ɔdɔhɔ ete, Ŋkɔm afo omokut akwa otu emi. Sese, nyeda mmɔ nsin fi ke ubɔk mfin emi; ndien afo eyefiɔk ete ke ami ndi Jehovah.
14Ndien Ahab obup ete, Enye eyeda ubɔk mme anie anam? Ndien enye ɔbɔrɔ ete, Ntem ke Jehovah ɔdɔhɔ ete, Eke mkparawa mme etubom mme esien. Ndien enye obup ete, Anie editibi ekɔŋ? Ndien enye ete, Afo.
15Ekem enye abat mkparawa mme etubom mme esien, ndien mmɔ esim owo ikie iba ye edip ye duopeba: enye onyuŋ abat kpukpru owo, kpa kpukpru nditɔ Israel, tɔsin owo itiaba, onim mmɔ eken ke edem. Ekem mmɔ ewɔŋɔ ke ufɔt uwemeyo.
16Edi Ben-hadad ke ɔŋwɔ-ɔwɔŋɔ mmin akpa ke ataya, ye mbɔŋ edip ye duopeba oro eŋwamde enye.
17Ndien mkparawa mme etubom mme esien ebem iso ewɔŋɔ. Ndien Ben-hadad ɔdɔŋ owo utom; ndien mmɔ editiŋ enɔ enye, ete, Owo ke eto ke Samaria ewɔŋɔ.
18Ndien enye ɔdɔhɔ ete, Ewɔŋɔ ke emem, mbufo emum mmɔ ye uwem, enyuŋ ewɔŋɔ edi ekɔŋ, emum mmɔ ye uwem.
19Ntem ke mkparawa mme etubom mme esien emi eto ke obio ewɔŋɔ, ye udim oro esaŋade mmɔ ke edem.
20Ndien kpukpru mmɔ kiet kiet ewot owo mmɔ; mme Syrian enyuŋ efeŋe; ndien Israel ebine mmɔ; ndien Ben-hadad edidem Syria odoro horse ɔbɔhɔ ye mbon horse.
21Edikem Israel onyuŋ ɔwɔrɔ aka akasuan mme horse ye mme chariot, onyuŋ owot mme Syrian ata ediwak owo.
22Ekem prophet oro aka ke ɔtɔ edidem Israek, ɔkɔdɔhɔ enye, ete, Ka kɔsɔŋ idem fo, nyuŋ fiɔk, nyuŋ kere se afo edinamde: koro edidem Syria eyedɔk edi ekɔŋ ye afo ke ukabare isua.
23Ekem ikɔt edidem Syria edɔhɔ enye, ete, Mme abasi mmɔ edi abasi ikpɔ obot, mmɔdo mmɔ ekesɔŋde ekan nnyin; edi yak nnyin iŋwana ye mmɔ ke una-isɔŋ, ise mme nnyin iyesɔŋ ikan mmɔ,
24Nam ndien ŋkpɔ emi: sio mbɔŋ oro kpukpru ke itie mmɔ fep, nyuŋ sin mme etubom ke itie mmɔ:
25nyuŋ bat udim mbon-ekɔŋ nɔ idem fo ekem ye udim fo oro ɔkɔduɔŋɔde, ye horse ekem ye horse, ye chariot ekem ye chariot: ndien nnyin iyeŋwana ekɔŋ ye mmɔ ke una-isɔŋ, ise mme nnyin iyesɔŋ ikan mmɔ. Ndien enye okop uyo mmɔ, onyuŋ anam ntre.
26Edikem ke ukabare isua, Benhadad owuk Syria, onyuŋ ɔdɔk aka ke Aphek, ndiŋwana ekɔŋ ye Israel.
27Ndien mmɔ etim mbon-ekɔŋ nditɔ Israel, enyuŋ enɔ mmɔ udia ekɔŋ, ndien mmɔ eka ndibiɔŋɔ mmɔ eken: nditɔ Israel enyuŋ enam nna-ekɔŋ ke iso mmɔ, nte ŋkpri otu ebot iba: edi mme Syrian eyɔhɔ ke isɔŋ.
28Ekem owo Abasi oro asaŋa ekpere ɔkɔdɔhɔ edidem Israel, ete, Ntem ke Jehovah ɔdɔhɔ ete, Koro mme Syrian ekedɔhɔde, ete, Jehovah edi abasi ikpɔ obot, edi idige abasi mme itihere, nyeda ofuri akamba udim emi nsin fi ke ubɔk; ndien mbufo eyefiɔk, ete ke ami ndi Jehovah.
29Ntem ke mmɔ ena kiet ke iso kiet ke usen itiaba, Edikem ke ɔyɔhɔ usen itiaba mmɔ eyi ekɔŋ: ndien nditɔ Israel ewot Syria tɔsin owo ikie emi esaŋade ke ikpat, ke usen kiet.
30Ndien mmɔ emi esuhɔde efeŋe eka Aphek, ekeduk ke obio oro; ndien ibibene ɔduɔ ofuk tɔsin owo edip ye itiaba emi esuhɔde. Benhadad efehe ŋko aka okoduk ke obio ke esit ubet.
31Ndien ikɔt esie edɔhɔ enye, ete, Mbɔk, sese, nnyin imokop ite ke ndidem ufɔk Israel edi ndidem mbɔm: mbɔk, yak nnyin ikune ɔfɔŋ ikpo ke isin, inyuŋ ikɔŋɔ uruk ke itɔŋ nnyin, ndien iwɔŋɔ itiene edidem Israel: mme enye eyenim fi uwem.
32Ndien mmɔ ekune ɔfɔŋ ikpo ke isin mmɔ, enyuŋ ekɔŋɔ uruk ke itɔŋ mmɔ, ndien ewɔŋɔ eka ke ɔtɔ edidem Israel, ekedɔhɔ ete, Owo fo Benhadad ɔdɔhɔ ete, Mbɔk, nim imɔ uwem. Ndien enye ete, Nte enye ɔmɔŋ osuk odu uwem?
33Enye edi eyen-ete mi. Ndien mmɔ ese oro ke mfɔniso, ndien ewara enam enye asian mme oto enye ke esit. Ndien mmɔ edɔhɔ ete, Nte Benhadad edi eyen-usɔ? Ndien enye ɔdɔhɔ, ete, Mbufo eka ekeda enye edi. Ekem Benhadad ɔwɔrɔ etiene enye. Enye (Ahab) onyuŋ emen enye esin ke chariot esie.
34Ndien enye (Benhadad) ɔdɔhɔ enye, ete, Nyeyak mme obio oro ete mi ɔkɔbɔde usɔ; afo eyenyuŋ anam efak ɔnɔ idemfo ke Damascus, kpa nte ete mi akanamde ke Samaria. Ndien enye (Ahab) ɔdɔhɔ ete, Ami ŋko nyediomi ediomi ntem nsana fi nyak Ndien enye odiomi ediomi ye enye, onyuŋ asana enye ayak.
35Ekem owo kiet ke otu nditɔ mme prophet ɔdɔhɔ mbɔhiduŋ esie ke uyo Jehovah, ete, Mbɔk, kam tɔ mi. Edi owo oro inyimeke nditɔ enye.
36Ndien enye eken ɔdɔhɔ enye, ete, Koro afo mukokopke uyo Jehovah, sese, ke ini afo ɔnyɔŋde ɔkpɔŋ mi, lion kiet eyewot fi. Ndien adaŋemi enye adianarede ɔkpɔŋ enye, lion kiet osim enye owot.
37Ndien enye okut owo efen onyuŋ ɔdɔhɔ, ete, Mbɔk,
38kam tɔ mi. Ndien owo oro ɔtɔ enye, ɔtɔ onyuŋ ɔnɔ enye unan. Ndien prophet oro aka akada ke usuŋ, ebet edidem, onyuŋ oforo owo efen, ɔbɔp eribin ke ɔkpɔ-iso esie.
39Ndien ke ini edidem ebede, enye eseme ɔnɔ edidem, ete, Owo fo oduk ke ufɔt ekoŋ; ndien, sese, owo kiet awaha, ada owo kiet ɔsɔk mi, ete, Kpeme owo emi: edieke owo emi ɔbɔhɔde bɔhɔ, eyekaŋa uwem fo ke ibuot uwem esie, ke mudomoke talent silver kiet unɔ.
40Edikem nte owo fo ananam ŋkpɔ oto mi, aka ko, owo oro ɔbɔhɔ. Ndien edidem Israel ɔdɔhɔ enye, ete, Ntem ke afo emekpe ikpe fo.
41Ndien enye eken awara osio erebin ke ɔkpɔ-iso esie; ndien edidem Israel ɔdiɔŋɔ enye, ete ke enye edi owo mme prophet kiet.
42Ndien enye ɔdɔhɔ edidem, ete, Ntem ke Jehovah ɔdɔhɔ ete, koro afo akasanade owo nsobo mi ayak ɔbɔhɔ ke ubɔk, mmɔdo edikaŋade uwem fo ke ibuot uwem esie, ye ikɔt fo ke ibuot ikɔt esie.
43Ndien edidem Israel ɔnyɔŋ ke ufɔk esie ke mfuhɔ ye ke iyaresit, onyuŋ aka ke Samaria.
Who We AreWhat We EelieveWhat We Do
2025 by iamachristian.org,Inc All rights reserved.
