1SIA ibet enyenede ukpɔŋ-ukpɔŋ mbiet nti ŋkpɔ eke edidide, minyuŋ inyeneke idem ŋkpɔ oro, ikemeke ndinam mmɔ emi esaŋade edi ediwa oruk uwa kiet kpukpru ini ke isua ke isua efɔn ema.
2Edieke ekpekemede, idige ekpetre ndiwa uwa adaŋemi, koro mmɔ emi etuakde ibuot enɔ Abasi ikpenyeneke aba ifiɔk idiɔk-ŋkpɔ ke esit mmɔ, sia ema ekenam mmɔ esana?
3Edi eda mme uwa oro enam owo eti mme idiɔk-ŋkpɔ ke isua ke isua.
4Koro iyip enaŋ ye ebot ikemeke-keme ndimen mme idiɔk-ŋkpɔ mfep.
5Mmɔdo ke adaŋemi Enye odukde ke ererimbot, Enye ɔdɔhɔ ete,
Afo umaŋa uwa ye enɔ,
Afo emebeŋe ikpɔhidem ɔnɔ Mi;
6Afo ukopke inemesit ke ofuri edifɔp-uwa ye uwa idiɔk ido:
7Ntre ke ndɔhɔ nte, Sese, mmedi
(Ewet ebaŋa Mi ke ikpaŋwed)
Ndinam uduak Fo, O Abasi.
8Ke ini Enye ama ekebem iso ɔdɔhɔ ete, Afo umaŋa unyuŋ ukopde inemesit ke uwa ye enɔ ye ofuri edifɔp-uwa ye uwa idiɔk ido (emi ibet etemede ete ewa),
9Enye edidɔhɔ ndien ete, sese, mmedi ndinam uduak Fo, Enye emen akpa ŋkpɔ efep, man Enye ɔtɔ udiana ŋkpɔ.
10Ema eda uduak emi enam nnyin isana ke eriwa emi Jesus akawade ikpɔhidem Esie ini kiet.
11Ke akpanikɔ kpukpru oku eda enam ŋkpɔ enɔ Abasi ke usen ke usen, enyuŋ ewak ndiwa oruk uwa kiet eke mikemeke ndimen mme idiɔk-ŋkpɔ mfep:
12edi Oku emi, ke ini Enye ama akawa uwa kiet abaŋa mme idiɔk-ŋkpɔ, ɔsuhɔre etetie ke ubɔk nasia Abasi ke nsinsi:
13ɔtɔnɔre ke ini oro Enye ebebet tutu enam mme asua Esie ekabare edi udori-ukot Esie.
14Koro Enye ada uwa kiet anam mmɔ emi ekenimde enɔ Abasi efɔn ema ke nsinsi.
15Edisana Spirit onyuŋ edi ntiense ɔnɔ nnyin: koro ke Enye ama ɔkɔdɔhɔ ete,
16Jehovah ete, Emi edi ediomi eke ndidiomide ye mmɔ
Ke mme usen oro ema ebe; Nyesin mbet Mi ke esit mmɔ,
Nyenyuŋ ŋwet mbet Mi ke ɔwɔŋ-esit mmɔ;
17Enye edidɔhɔ ndien ete,
Ndinyuŋ ntihi aba mme idiɔk-ŋkpɔ mmɔ ye mme ukwaŋ-ido mmɔ.
18Ndien ɔtɔ nte ekefende mme idiɔk ido, iwaha aba uwa ibaŋa idiɔk-ŋkpɔ.
19Mmɔdo nditɔ-ete, sia nnyin inyenede uko ndibe nduk ke Edisana Ebiet ke iyip Jesus,
20ke usuŋ oro Enye okonimde ɔnɔ nnyin, kpa obufa ye odu-uwem usuŋ emi ebede ke ukara, oro edi, obukidem Esie;
21sia inyuŋ inyenede akamba Akwa Oku emi akarade ufɔk Abasi;
22eyak nnyin isaŋa ikpere ye esit akpanikɔ ke ɔyɔhɔ mbuɔt-idem idem, ye esit eke esimede esio ifiɔk idiɔk-ŋkpɔ efep ye idem eke eyetde ke ata mmɔŋ:
23enyuŋ eyak nnyin isɔŋɔ imum ikɔ eke idade iyarare idori-enyin ikama, mbak edibɔhɔ nnyin oyok; koro Enye emi ɔnɔde nnyin uŋwɔŋɔ edi Abasi akpanikɔ:
24eyak nnyin inyuŋ ikere nte ikpedemerede kiet eken inɔ ima ye nti utom;
25ikunyuŋ isin ndisop idem ɔtɔ kiet, nte edu ndusuk owo edide, edi inɔ kiet eken item; ndien mbufo ekpedɔdiɔŋ enam ntem, adaŋa nte ekutde ete usen oro ke asaŋa ekpere.
26Koro edieke nnyin iduede ke nkoi-nnam, ke ini nnyin ima ikɔbɔ ifiɔk akpanikɔ, uwa iduhe aba inɔ idiɔk-ŋkpɔ, edi idori-enyin ikpe eke enyenede ndik,
27ye ikaŋ-ikaŋ iyaresit eke edifɔbɔde mmɔ emi eŋwanade ye Abasi.
28Owo eke midaha mbet Moses ikɔm ŋkpɔ akakpa ke uyo ntiense iba me ita, ituaha enye mbɔm;
29mbufo ese ndien ete edibiere ufen ɔsɔŋ adaŋa didie akan enɔ owo, eke edigide Eyen Abasi ke ikpat, onyuŋ abatde iyip ediomi, emi edade enam enye asana, ke ŋkpɔ ndek, onyuŋ esuenede Spirit mfɔn?
30Koro nnyin imɔfiɔk Enye emi ɔdɔhɔde ete, Usiene edi okim, nyesio usiene; onyuŋ ɔdɔhɔde ŋko ete, Jehovah eyekpe ikpe ikɔt Esie.
31Edi ata ŋkpɔ ndik ndiduɔ nsine ke ubɔk Abasi emi odude uwem.
32Edi eti mme usen ini oko, ini oro enyin ekatarade mbufo, mbufo ekenyuŋ ebiomde ɔkpɔsɔŋ ndusihere ndutuhɔ;
33ke ŋkaŋ kiet enam mbufo edi ŋkpɔ ndise ke ntak esuene ye ukut; ke ŋkaŋ eken, mbufo ekabare nsaŋa ye mmɔ emi ekutde ukut ntre.
34Koro mbufo ekatuade mmɔ emi edude ke ŋkpɔkɔbi mbɔm, enyuŋ enyime ke idaresit ete ebume inyene mbufo, sia mbufo efiɔkde ete imenyene inyene eke ɔfɔnde akan onyuŋ ebigide.
35Mmɔdo ekuyak uko mbufo eduɔk, koro enye asaŋade ye akwa utip.
36Koro ana nte mbufo enyene ime man ebɔ se Abasi ɔkɔŋwɔŋɔde, ke ema ekenam se Enye amade.
37Koro osuk ata ekpri esisit,
Ndien Enye emi edide eyedi, idinyuŋ ibigike.
38Edi edinen owo Mi edidu uwem ke mbuɔtidem:
Ndien edieke enye edikhede afiak edem, ukpɔŋ Mi idikopke inemesit ke enye.
39Edi nnyin idige mbon mfiakedem ŋka nsobo; edi idi mmɔ emi ebuɔtde idem isim erinyaŋa ukpɔŋ.
Who We AreWhat We EelieveWhat We Do
2025 by iamachristian.org,Inc All rights reserved.
