EZEKIEL 36 - Efik Old Bible With Sectional Headings

Abasi Enyime Nditɔŋɔ Ntak Ndiɔŋ Israel

1NDIEN afo eyen owo tiŋ prophecy nɔ ikpɔ obot Israel, nyuŋ dɔhɔ ete, Ikpɔ obot Israel, mbufo ekop uyo Jehovah:

2Ntem ke Ɔbɔŋ Jehovah ɔdɔhɔ ete, Koro usua ɔdɔhɔde abaŋa mbufo, ete, Aha! nsinsi ŋkokoŋo ebiet emekabare ndien edi udeme nnyin:

3tiŋ ndien prophecy, nyuŋ dɔhɔ, Ntem ke Ɔbɔŋ Jehovah ɔdɔhɔ, ete, Koro, kpa koro mme mmɔ emi ekande ekuk ebiatde enyuŋ eŋwunede mbufo, ete mbufo edi se mme idut emi esuhɔde edade enyene; ndien mme ababara etoho mbufo ufiet, mbufo enyuŋ edi se kpukpru owo esuenede:

4ikpo obot Israel, mbufo ekop ndien uyo Ɔbɔŋ Jehovah, ete, Ntem ke Ɔbɔŋ Jehovah ɔdɔhɔ ye ikpɔ obot ye ŋkpri, ye mme udiɔŋ mmɔŋ, ye mme ebedeŋ, ye mme ikpikpu ndon, ye mme obio emi ekekpɔŋde, emi ekedide se mme idut emi esuhɔde ekan ekuk, ebumede enyuŋ esakde.

5Mmɔdo ntem ke Ɔbɔŋ Jehovah ɔdɔhɔ, ete, Nditreke ndida ikaŋ ufup mi ndɔhɔ ikɔ mbaŋa mme idut emi esuhɔde, nnyuŋ mbaŋa ofuri Edom, emi ekenimde isɔŋ mi enɔ idem mmɔ, ete ida enye inyene, ofuri esit adat mmɔ, ukpɔŋ mmɔ onyuŋ ese ke ndek, man mben isɔŋ esie edi ŋkpɔ mbume.

6Tiŋ ndien prophecy baŋa isɔŋ Israel, nyuŋ dɔhɔ ikpɔ ye ŋkpri obot, ye mme udiɔŋ mmɔŋ, ye mme ebedeŋ, ete, Ntem ke Ɔbɔŋ Jehovah ɔdɔhɔ, ete, Sese, ami mmada ufup mi ye ifuresit mi ndɔhɔ: koro mbufo ekebiomde esuene mme idut:

7mmɔdo ntem ke Ɔbɔŋ Jehovah ɔdɔhɔ ete; Ami mmen ubɔk mi, nte, Ama edi mme idut emi ekande mbufo ekuk, mmɔ eyebiom esuene mmɔ.

8Edi mbufo, ikpɔ obot Israel, eyesiaha ŋkɔk mbufo, enyuŋ eŋwum mfri mbufo enɔ ikɔt mi Israel: koro mmɔ esaŋade ekpere.

9Koro, sese, ami mmɔŋ ntiene mbufo, nnyuŋ ŋkabare nse mbufo, ndien eyefuŋ mbufo,

10enyuŋ etɔ mbufo ke isɔŋ: nyenyuŋ nnam owo ewak ke enyɔŋ mbufo, kpa ofuri ufɔk Israel kpukpru: owo eyenyuŋ eduŋ ke mme obio; enyuŋ ediɔŋ mme ŋwure:

11nyenyuŋ nnam owo ye ufene ewak ke enyɔŋ mbufo; ndien mmɔ eyewak enyuŋ etɔt: nnyuŋ nyak mbufo edaŋ kpa nte ke eyo oko, nnyuŋ mfɔn ido ye mbufo ŋkan nte ŋkɔfɔnde ke eritɔŋɔ mbufo: ndien mbufo eyefiɔk ete ke ami ndi Jehovah.

12Nyenyuŋ nnam owo, kpa ikɔt mi Israel, esaŋa mbufo ke enyɔŋ; ndien mmɔ eyenyene fi, afo eye-nyuŋ edi udeme mmɔ, ndien afo uduyakke aba mmɔ enana owo.

13Ntem ke Ɔbɔŋ Jehovah ɔdɔhɔ, ete, Koro edɔhɔde mbufo, ete, Afo ekedi andidia owo,

14onyuŋ anam idut fo anana owo; mmɔdo, Ɔbɔŋ Jehovah ɔdɔhɔ, ete, Afo ududiaha aba owo, udunyuŋ unamke aba mbio fo eduɔŋɔ.

15Ndinyuŋ nyakke aba fi okop esuene mme idut, udunyuŋ ubiomke aba isuŋi mme obio; mbio fo idinyuŋ iduɔhɔ aba. Uyo Ɔbɔŋ Jehovah edi emi.

16Edikem uyo Jehovah osim mi, ete,

17Eyen owo, ufɔk Israel ekeduŋ ke isɔŋ mmɔ, enyuŋ esabare enye ke usuŋ mmɔ ye ke ido mmɔ: mmese usuŋ mmɔ ke ndek aŋwan emi odude ke esien.

18Ami nnyuŋ nduɔk mmɔ ifuresit mi ke idem mbaŋa iyip emi mmɔ ekeduɔkde ke isɔŋ; koro mmɔ enyuŋ edade ibɔk mmɔ esabare enye:

19ndien nsuan mmɔ ke otu mme idut, enyuŋ ewari mmɔ ke otu mme obio: ami nnam ikpe ye mmɔ nte ekemde ke usuŋ mmɔ.

20Ndien adaŋemi mmɔ esimde mme idut emi mmɔ ekade do, mmɔ ebiat edisana enyiŋ mi, koro edɔhɔde ebaŋa mmɔ, ete, Mme mmɔ emi edi ikɔt Jehovah, enyuŋ eto ke isɔŋ esie edi.

21Ndien edisana enyiŋ mi emi ufɔk Israel esabarede ke otu mme idut emi mmɔ ekade do, enyene mi mbɔm.

22Dɔhɔ ndien ufɔk Israel, ete, Ntem ke Ɔbɔŋ Jehovah ɔdɔhɔ, ete, Ami nnamke ntem mbaŋa mbufo, ufɔk Israel, edi mbaŋa edisana enyiŋ mi emi mbufo esabarede ke otu mme idut emi mbufo ekade do.

23Ɔbɔŋ Jehovah onyuŋ ɔdɔhɔ ete, Ndien nyemen edisana enyiŋ mi emi esabarede ke otu mme idut, emi mbufo esabarede enye ke ufɔt mmɔ, nnim ke edisana; ndien mme idut eyefiɔk ete ke ami ndi Jehovah, ke ini enimde mi ke edisana ke otu mbufo ke enyin mbufo.

24Nyenyuŋ mmen mbufo mfep ke mme idut, nnyuŋ ntaŋ mbufo ke kpukpru mme obio; ndien nda mbufo ndi ke isɔŋ mbufo

25Ndien nyesime mbufo edisana mmɔŋ ke idem, ndien mbufo eyedi edisana: nyesio mbufo kpukpru ndek mbufo ye kpukpru ibɔk mbufo ke idem mfep nnam esana.

26Nyenyuŋ nnɔ mbufo obufa esit, nnyuŋ nda obufa spirit nsin mbufo ke idem, nnyuŋ nsio mbufo esit enyene itiat ke obuk mfep, nnyuŋ nnɔ mbufo esit enyene obuk.

27Nyenyuŋ nda spirit mi nsin mbufo ke idem, nnyuŋ nnam mbufo esaŋa ke mme ewuhɔ mi, enyuŋ ekpeme ikpe mi enyuŋ enam.

28Ndien mbufo eyeduŋ ke isɔŋ emi ŋkɔnɔde mme ete mbufo, ndien mbufo eyedi ikɔt mi; ami nyenyuŋ ndi Abasi mbufo.

29Ndien nyenyaŋa mbufo nsio kpukpru ndek mbufo mfep: nyenyuŋ ŋkot ibokpot edi, nnyuŋ nnam enye awak, ndinyuŋ ndorike mbufo akaŋ.

30Nyenyuŋ nnam mfri eto ye mbuŋwum isɔŋ ewak: man mbufo ekukut aba but akaŋ ke otu mme idut.

31Ndien mbufo eyeti mme idiɔk usuŋ mbufo, ye ido mbufo eke midige nti, ndien esua idem mbufo ke iso idem mbufo ebaŋa mme idiɔk ido mbufo ye mbubiam mbufo.

32Ɔbɔŋ Jehovah ɔdɔhɔ, ete, Mbufo efiɔk ete ke ami nnamke ntem mbaŋa mbufo: mbufo eda but ye esuene ebaŋa usuŋ mbufo, O ufɔk Israel.

33Ntem ke Ɔbɔŋ Jehovah ɔdɔhɔ, ete, Ke usen eke ndisiode mbufo kpukpru mme idiɔk ido mbufo ke idem mfep nnam esana, nnyenyuŋ nnam mbufo eduŋ ke mme obio oro, ndien eyediɔŋ mme ŋwure.

34Ndien eyefuŋ isɔŋ emi abiarade, emi enye akam anade ke nsobo ke enyin kpukpru owo eke esaŋade ebe.

35Ndien mmɔ eyedɔhɔ, ete, Isɔŋ emi akabiarade akabare ebiet iŋwaŋ Eden; ndien mme obio ŋko emi ekesobode enyuŋ ebiarade, enyuŋ ewurede, emekabare enyene ibibene, owo enyuŋ eduŋ mmɔ.

36Ndien mme idut emi esuhɔde ekan mbufo ekuk eyefiɔk ete ke ami Jehovah ndiɔŋ se ikewurede, ntɔ se ibiarade. Edi ami Jehovah ndɔhɔ, nnyuŋ nnam.

37Ntem ke Ɔbɔŋ Jehovah ɔdɔhɔ ete, Eyesuk ebeŋe mi ŋkpɔ emi enɔ ufɔk Israel, ete nnam nnɔ mmɔ. Nyenam mmɔ ewak owo nte otu ufene.

38Nte otu edisana ufene, kpa nte otu ufene Jerusalem ke mme usɔrɔ esie; kpasuk ntre ke mme obio emi ekewurede editie, otu owo eyeyɔhɔ ke esit, Ndien mmɔ eyefiɔk ete ke ami ndi Jehovah.