2 ŊWED CORINTH 11 - Efik Old Bible With Sectional Headings

Mme Prophet Nsu ke Iso Utom Paul

1MBUFO ekpakam eme ime ye ami ke ekpri ndisime eke nyomde ndisime; ekam enyene ime ye ami.

2Koro mmenyene ufup Abasi mbaŋa mbufo; koro ŋkada mbufo nnɔ ebe kiet, man ŋkpemen mbufo nte edisana eyen-aŋwan nnɔ Christ.

3Edi mmefehe ndik, mbak ke usuŋ ekededi, nte urukikɔt akabiaŋade Eve ke ŋkari esie, edibiat ekikere mbufo, enam mbufo etre ndinyene esit akpanikɔ ye eti ido ye Christ.

4Koro edieke owo edide edikwɔrɔ Jesus eke ɔkpuhɔrede ye Jesus eke nnyin ikɔkwɔrɔde, onyuŋ edieke mbufo ebɔde spirit eke ɔkpuhɔrede ye Spirit emi mbufo ekɔbɔde, enyuŋ ekopde gospel eke edide isio ye gospel emi mbufo ekokopde ke inua nnyin, mbufo eme ime ye owo oro eti-eti.

5Koro nse nte mmɔ, emi ebatde ke mme akakan apostle, ikanke mi ke baba ŋkpɔ kiet.

6Ŋkponyuŋ nanana udɔn ke eritiŋ ikɔ, ndige ɔkɔi ke ifiɔk; edi ke kpukpru ŋkpɔ ke otu kpukpru oruk owo, imanam gospel aŋwaŋa mbufo ke enyin.

7Ndi idiɔk ke ŋkanam, koro nsuhɔrede idem man mbufo eforo, emi ŋkɔkwɔrɔde gospel nnɔ mbufo ke mfɔn?

8Ŋkotuk mme ufɔk Abasi eŋwen, mbɔ mmɔ ŋkpɔ-eyen-utom, man nda nnam utom nnɔ mbufo;

9kpa ke idem ini ndude ke unana ke otu mbufo, ndobike baba owo kiet mbiomo; koro nditɔ-ete, emi etode ke Macedonia edi ke ɔtɔ mi, enɔ mi se inanade mi nte ekemde; ntem ke kpukpru ŋkpɔ mma mmum idem ŋkama ntre ndidi mbiomo nnɔ mbufo, nyenyuŋ mmum idem ŋkama ntre.

10Ma akpanikɔ Christ eke odude mi ke esit, baba owo kiet idibiɔŋɔke mi ndibure mbure mbaŋa ŋkpɔ emi ke ofuri edem Achaia.

11Nsidi ntak? Ndi koro mmemaŋa mbufo? Abasi ɔmɔfiɔk.

12Edi nyesuk nnam nte nnanam, man mbɔ mmɔ ntak mbure eke mmɔ eyomde ndibure, ete, mimɔ ikpetie ke enyin owo kpa nte nnyin ke idaha apostle eke mmɔ eburede mbure ebaŋa.

13Koro oruk owo emi edi mme apostle abiaŋa, mme anam-utom ŋkari, emi eforode mme apostle Christ.

14Inyuŋ idige utibe-ŋkpɔ; koro kpa Satan ke idem esie ke oforo angel uŋwana.

15Ntre ke idige utibe-ŋkpɔ edieke mme asaŋa-utom esie eforode mme asaŋa-utom edinen ido: edi utit mmɔ eyekem ye ubɔk-utom mmɔ.

16Mmɔtɔŋɔ ntak ndɔhɔ nte, owo baba kiet okuda mi ke ndisime; edi eda nte ededa, eme ime ye ami ke ndisime mi, man ami ŋko mbure mbure esisit.

17Se ntiŋde, ndien, ntiŋke ke uyo Ɔbɔŋ, edi nte ndisime etiŋ ŋkpɔ, ke ɔkpɔsɔŋ mbure mi.

18Sia ediwak owo enamde mbure ebaŋa enyɔŋ-enyɔŋ ŋkpɔ obukidem, ami nyenyuŋ nnam ŋko.

19Koro mbufo eme ime ye mbon ndisime ke inemesit, sia mbufo edide mme enyene-ibuot owo.

20Mbufo eme ime ye owo, ye enye adade mbufo oduk ufin, ye enye adiade inyene mbufo, ye enye adade ŋkari omum mbufo, ye enye ataŋde idem, ye enye oyibide mbufo ke mbaŋ.

21Mmetiŋ ikɔ nte owo etetiŋ ŋkpɔ ɔsuhɔre itie esie, nte ŋkpɔ eke nnyin ikedide mmem-mem. Edi se ededi eke owo enyenede uko (ntiŋ nte ndisime), ami mmenyene ŋko.

22Nte mmɔ edi nditɔ Hebrew? Ntre ke ami ndi. Nte mmɔ edi nditɔ Israel? Ntre ke ami ndi. Nte mmɔ edi nditɔ Abaraham?

23Ntre ke ami ndi. Mmɔ edi mme asaŋa-utom Christ? (ntiŋ nte idat), ami mmasaŋa utom Christ ŋkan mmɔ. Mmanam ɔkpɔsɔŋ utom ŋkan mmɔ: mmodu ke ufɔk-ŋkpɔkɔbi ŋkan mmɔ: mmɔbɔ ufen mbe nde: mmekpere ndikpa ediwak ini.

24Ŋkɔbɔ ubɔk-ikpa edip ye efurenaŋ ke ubɔk mme Jew utim ikotion.

25Eda eto emia mi utim ikata; etɔŋɔ mi ke itiat ini kiet; ubom mi osip utim ikata; mmadaŋ ke okoneyo kiet ye uwemeyo kiet ke inyaŋ ibom;

26Mmasaŋa isaŋ ediwak ini, mmokut afanikon ke akpa, mmokut afanikɔŋ ke otu mbon uŋwo, mmokut afanikɔŋ ke ubɔk ikɔt nnyin, mmokut afanikɔŋ ke ubɔk mme Gentile, mmokut afanikɔŋ ke obio, mmokut afanikɔŋ ke iŋwaŋ, mmokut afanikɔŋ ke akwa inyaŋ, mmokut afanikɔŋ ke otu nditɔ-ete abiaŋa;

27ediwak ini ndu ke ɔkpɔsɔŋ utom ye eŋwan, ye ataba-idap; ediwak ini ndu ke biɔŋ ye nsat-itɔŋ ye unana se ndiade; tuep omum mi, nnyuŋ nnyeneke se nsinede.

28Ɔkɔrɔ ye se itode to isim mi, mbiomo efen etiene efik mi kpukpru usen, kpa ɔkpɔsɔŋ ekikere eke nnyenede kabaŋa kpukpru mme ufɔk Abasi.

29Anie odu ke mmem-idem, ndien ami ntre nditiene enye ŋkop mmem-idem? Anie ke owo anam enye atuak ukot ɔduɔ, ndien ami ntre ndiyat esit?

30Edieke anade nte mbure mbure, nyenam mbure ke se mmem-idem esinde mi ŋkut.

31Abasi ye Ete Ɔbɔŋ nnyin Jesus, eke ubɔŋ enyenede Enye ke nsinsi, ɔmɔfiɔk ete nsuhu nsu.

32Ke Damascus adidaha edidem Aretas okonim mbon-ukpeme ke obio mbon Damascus ete emum mi,

33edi esin mi ke akpasa, esio mi ke window esuk ke mben ibibene tutu nsim isoŋ; ntre ke mbɔhɔ enye.