JAMES 2 - Efik Old Bible With Sectional Headings

Ekunyene Odusat; Mbuɔridem Eke Misaŋake ye Utom Akpa

1NDITƆ-ETE mi, ekuda mbuɔtidem emi mbufo enyenede ye Ɔbɔŋ nnyin Jesus Christ, emi edide Ubɔŋ, edian ye uteŋe-enyin.

2Koro edieke owo emi esinede mkpanuen-a-gold ye ediye ɔfɔŋidem odukde edi ke esop mbufo, eyen ubuene emi esinede edidehe ɔfɔŋ onyuŋ odukde edi;

3ndien mbufo esede esine ediye ɔfɔŋidem, edɔhɔ enye ete, Tetie mi ke eti itie; enyuŋ edɔhɔ eyen ubuene ete, Da do, midige, Suhɔre mi ke isɔŋ ke mben udorukot mi:

4nte mbufo inyenede esit iba, inyuŋ idaha ukwaŋ ekikere ibiere ŋkpɔ inɔ owo?

5Ekop, ndima nditɔ-ete mi; nte Abasi ikemekke mmɔ emi ebuenede ke ŋkpɔ ererimbot emi, ite mmɔ eforo ke mbuɔtidem, enyuŋ enyene Obio Ubɔŋ emi Enye ɔkɔŋwɔŋɔde ndinɔ mmɔ emi emade Enye?

6Edi mbufo ema esuene eyen-ubuene. Nte idige mme enyene-inyene etuk mbufo? Nte mmɔ ke idem mmɔ idudike mbufo ika ke itie-ubiere-ikpe?

7Nte mmɔ isuŋike eti Enyiŋ emi ekotde mbufo edian?

8Edi edieke mbufo enimde ewuhɔ Edidem, nte ewetde ke Ŋwed Abasi ete, Ma mbɔhiduŋ fo nte amade idem fo, mbufo enam se ifɔnde;

9edi edieke mbufo eteŋede owo enyin, mbufo enam idiɔk-ŋkpɔ, ibet onyuŋ obiom mbufo ikpe, ete emebiat ibet.

10Koro owo ekededi eke edinimde ofuri ibet, edi eduede ke nde kiet kpɔt, amakabare edue isop ke ofuri ibet.

11Koro Enye emi ɔdɔhɔde ete, Kusin efibe, ɔdɔhɔ ŋko ete, Kuwot owo. Edi edieke musinke efibe, edi owotde owo, amakabare abiat ibet.

12Etiŋ ŋkpɔ enyuŋ enam ŋkpɔ, nte mmɔ emi Abasi edidade ibet eke anamde owo ɔwɔrɔ ufin ekpe ikpe mmɔ.

13Koro ikpe minyeneke mbɔm ye owo emi mikatuaha owo mbɔm; edi mbɔm obure mbure akan ikpe.

14Nditɔ-ete mi, ɔfɔn nso owo ndidɔhɔ ete, imɔ imonim ke akpanikɔ, ke enye minyeneke erinam ŋkpɔ? Nte erinim ke akpanikɔ oro emekeme ndiyaŋa enye?

15Edieke eyen-ete eren me eyen-ete aŋwan ananade edisine-ŋkpɔ ye udia usen, ndien owo mbufo kiet edidɔhɔ mmɔ ete,

16Saŋa suŋ-ŋ; akpakam afo okut edisine-ŋkpɔ ye udia: edi mbufo inɔŋɔ mmɔ se inanade mmɔ ke obukidem, oro ɔfɔn nso?

17Kpasuk ntre erinim ke akpanikɔ, eke misaŋake ye erinam ŋkpɔ, amakpa ke idem esie.

18Owo ekeme ndidɔhɔ ete, Afo emenyene mbuɔtidem, ami mmonyuŋ nnyene erinam ŋkpɔ: wut mi mbuɔtidem eke misaŋake ye erinam ŋkpɔ, ndien ami nyeda erinam ŋkpɔ ŋwut fi mbuɔtidem mi.

19Afo omonim ke akpanikɔ ete, Abasi kiet ke odudu? Ɔfɔn: mme demon ŋko enim ke akpanikɔ enyuŋ enyek.

20Edi nte afo, O ndisime owo, eyekam ɔfiɔk ete, erinim ke akpanikɔ eke misaŋake ye erinam ŋkpɔ iŋwumke mfri?

21Nte ikabatke ite, ikpe etebe Abraham ete nnyin oto ke erinam ŋkpɔ ke ini enye akayakde Isaac eyen esie ɔnɔ ke itie-uwa?

22Omokut ete, erinim ke akpanikɔ akasaŋa ye se enye anamde, ndien oto ke se enye anamde ekenyene mbuɔtidem eke ɔfɔnde ama,

23Ntem se ekewetde osu, ete, Abraham onim Abasi ke akpanikɔ, ndien ebat oro enɔ enye ke edinen ido; enyuŋ ekot enye, ete, Ufan Abasi.

24Mbufo emekut ete, ikpe etebe owo oto ke erinam ŋkpɔ, itoho ke erinim ke akpanikɔ ikpɔŋ.

25Kpa ntre ŋko, nte ikabatke ite, ikpe etebe Rahab, akpara aŋwan oro, oto ke erinam ŋkpɔ, ke ini enye adade mme isuŋutom esin ke ufɔk, onyuŋ anamde mmɔ esaŋa ke usuŋ eŋwen enyɔŋɔ?

26Koro nte ikpɔhidem eke minyenede spirit ama akpa, kpasuk ntre ŋko erinim ke akpanikɔ eke misaŋake ye erinam ŋkpɔ onyuŋ akpa.