2 NDIDEM 6 - Efik Old Bible With Sectional Headings

Ekudi Ɔfiɔrɔ ke Mmɔŋ

1EKEM nditɔ mme prophet edɔhɔ Elisha, ete, Sese, ebiet emi nnyin itiede mi ke iso fo afaha akan nnyin.

2Mbɔk, yak nnyin ika ke Jordan, kiet, kiet, ikada eto do, inam ebiet eke nnyin iduŋde do, inɔ idem-nnyin do. Ndien enye ete, Mbufo eka.

3Ndien owo kiet oro ɔdɔhɔ ete, Mbɔk, kusin, saŋa ye ikɔt fo ka. Ndien enye ete, Nyeka.

4Ntre ke enye asaŋa ye mmɔ. Ndien mmɔ eka ke Jordan ekekpeŋe eto.

5Ekem, nte owo kiet ekpide eto, ekudi ɔkpɔhɔde ɔduɔ ke mmɔŋ: ndien enye eseme, ete, Ahah, ete mi! koro ŋkɔbuɔtde buɔt.

6Ndien owo Abasi ɔdɔhɔ ete, Ɔkɔduɔ ke ebiet ewe? Ndien enye owut enye ebiet. Ndien enye ekpi eto ɔduɔk do; ndien ukwak ɔfiɔrɔ.

7Ndien enye ete, Men ke idemfo. Ndien enye anyan ubɔk esie ada enye.

8Ekem edidem Syria aŋwana ekɔŋ ye Israel, ndien odiomi ye ikɔt esie, ete, Nna-ekɔŋ mi eyedu ke ebiet ntem.

9Ndien owo Abasi ɔdɔŋ ekedɔhɔ edidem Israel, ete Kpeme idem fo mbak afo edibe ɔtɔ oro: koro mme Syrian emɔŋ esuhɔre eka do.

10Ndien edidem Israel ɔdɔŋ owo, ete eka ke ebiet oro owo Abasi akasiakde enye, onyuŋ etemede enye; ntem ke enye ekpeme idem esie do, idige ini kiet, inyuŋ idige utim ikaba.

11Ntre esit etimere edidem Syria abaŋa ŋkpɔ emi; ndien enye okot ikɔt esie, onyuŋ obup mmɔ, ete, Nte mbufo idiwutke mi owo ke otu nnyin, emi adade ye edidem Israel?

12Ndien owo ikɔt esie kiet ɔdɔhɔ ete, Idige ntre, ɔbɔŋ mi, edidem; edi Elisha prophet emi odude ke Israel asian edidem Israel ikɔ emi afo etiŋde ke ubet nna fo.

13Ndien enye ɔdɔhɔ ete, Mbufo eka ekesin uyep, efiɔk ebiet eke enye odude, ndien nyedɔŋ ekeda enye edi. Ekem etiŋ enɔ enye, ete, Enye odu ke Dothan.

14Ndien enye ɔdɔŋ horse, ye chariot, ye akamba udim mbon-ekɔŋ, ete eka do: ndien mmɔ esaŋa ke okoneyo, eka ekekan obio oro ekuk.

15Ekem asaŋa-utom owo Abasi abak edemere ke usenubɔk ɔwɔrɔ, ndien, sese, udim, ye horse, ye chariot, ke ekan obio ekuk. Ndien owo esie ɔdɔhɔ enye ete, Ahah, ete mi,

16nnyin idinam didie? Ndien enye ɔdɔhɔ ete, Kufehe ndik: koro mmɔ emi edude ye nnyin, ewakde ekan mmɔ eke edude ye mmɔ.

17Ndien Elisha ɔbɔŋ akam, ete, Mbɔk, Jehovah, tat enye enyin, man enye okut. Ndien Jehovah atat eyen oro enyin; ndien enye okut: ndien, sese, horse, ye chariot ikaŋ ke eyɔhɔ ke obot ekan Elisha ekuk.

18Ndien adaŋemi mmɔ esuhɔrede etiene enye, Elisha ekpe Jehovah ubɔk, ete, Mbɔk, nam enyin okim mbio emi. Ndien enye anam enyin okim mmɔ ke uyo Elisha.

19Ndien Elisha ɔdɔhɔ mmɔ, ete, Emi idige usuŋ, emi inyuŋ idige obio: mbufo etiene mi ke edem, ndien nyeda mbufo ŋkowut owo emi mbufo eyomde. Ndien enye ada mmɔ aka ke Samaria.

20Edikem adaŋemi mmɔ edukde Samaria, Elisha ɔdɔhɔ, ete O Jehovah, tat mme mmɔ emi enyin, man ekut. Ndien Jehovah atat mmɔ enyin, ndien mmɔ ekut. Ndien, sese, mmɔ edu ke ufɔt Samaria.

21Ndien ke ini edidem Israel okutde mmɔ, enye obup Elisha, ete, Ete mi, nte ŋwot mmɔ? nte ŋwot mmɔ?

22Ndien enye ɔbɔrɔ ete, Kuwot: wot mmɔ eke afo omumde ke ofut fo ye utiga fo. Da uyo ye mmɔŋ nim ke iso mmɔ, man mmɔ eta, enyuŋ eŋwɔŋ; ndien yak mmɔ enyɔŋ etiene ete mmɔ.

23Ndien enye etem akamba udia ɔnɔ mmɔ: ndien adaŋemi mmɔ ediade enyuŋ eŋwɔŋde, enye ayak mmɔ enyɔŋ etiene ete mmɔ. Ntre udim Syria itɔŋɔke aba ntak iduk ke isɔŋ Israel.

24Edikem ke ŋkpɔ emi ema ekebe, Ben-hadad edidem Syria obon kpukpru mbon-ekɔŋ esie, ndien ɔdɔk aka akakan Samaria okuk.

25Ekem akamba akaŋ odu ke Samaria: ndien, sese, mmɔ ekan enye ekuk, tutu ibuot ass akpa shekel silver anaŋ, ɔkɔti ke pint kiet onyuŋ akpa shekel silver ition.

26Edikem ke ini edidem Israel asaŋade ke enyɔŋ ibibene ebe, ŋwan kiet eseme ɔnɔ enye, ete, Mbɔk ɔbɔŋ mi, O edidem, nyaŋa.

27Ndien enye ete, Ih ih, Jehovah akpakam anyaŋa fi. Nda nso nnyaŋa fi? mme se itode ke ɔtɔ ubek-ibokpot? mme ke unyimi-wine?

28Ndien edidem obup ŋwan oro, ete, Nsinam fi? Ndien enye ɔbɔrɔ, ete, ŋwan emi ɔkɔdɔhɔ mi, ete, Nɔ eyen fo, nnyin ita enye mfin emi, ndien iyeta eyen mi mkpɔŋ.

29Ntre ke nnyin iketem eyen mi, inyuŋ ita enye: ndien ami ndɔhɔ enye ke edem usen, nte, Da eyen fo di, nnyin ita enye: edi enye omodip eyen esie.

30Edikem adaŋemi edidem okopde uyo aŋwan oro, enye awai ɔfɔŋ-idem esie; enye onyuŋ asaŋa ke ibibene ebe, ndien kpukpru owo ekut, ndien, sese, ɔfɔŋ-ikpo esine enye ke idem ke esit. Ndien enye ɔdɔhɔ ete,

31Yak Abasi anam mi ntem, onyuŋ anam aka iso, edieke ibuot Elisha eyen Shaphat edisuk adade enye ke idem mfin emi.

32Ndien Elisha etie ke ufɔk esie, mbiowo enyuŋ etie ye enye: ndien edidem osio owo ke iso esie ɔdɔŋ utom: edi ke isuŋ oro mika-isimke enye, sese, enye ɔdɔhɔ mbiowo oro, ete, Mbufo ese nte eyen owot-owo emi ɔdɔŋde, ete edibigi mi ibuot! Mbufo ese: ke ini isuŋ oro edide, mbufo eberi usuŋ, enyuŋ enuk enye ke enyin-usuŋ efep: nte ntim-ikpat ete esie itieneke enye ke edem?

33Ndien ke ini enye osuk ɔdɔhɔde ye mmɔ, sese, isuŋutom oro ɔsuhɔre osim enye. Ndien enye (edidem) ɔdɔhɔ ete, Sese, ukut emi oto Jehovah: ndinam didie nsuk mbet Jehovah ŋka iso?