MATTHEW 20 - Efik Old Bible With Sectional Headings

Mbon-utom Ke Iŋwaŋ-Vine

1 KORO Obio Ubɔŋ Heaven ebiet ete-ufɔk kiet, emi abakde ɔwɔrɔ ke usenubɔk ndikpe mbon-utom nsin ke iŋwaŋ-vine esie.

2Ndien ke enye ama okodiomi ye mbon-utom ndinɔ mmɔ okut kiet ke usen kiet, enye ɔdɔŋ mmɔ eka ke iŋwaŋ vine.

3Ekem ke ini ekperede ɔyɔhɔ hour usuk-kiet ke usenubɔk, enye ɔwɔrɔ okut mmɔ efen edade ke aŋwa-urua efen-efen, onyuŋ ɔdɔhɔ mmɔ ete,

4Mbufo ŋko eduk ke iŋwaŋ-vine, ndien nyenɔ mbufo se inende. Ndien mmɔ eka.

5Ke ini ekperede ufɔt uwemeyo, ye ebe ufɔt uwem-eyo hour ita, enye ɔtɔŋɔ ntak ɔwɔrɔ anam kpasuk ntre.

6Edi ke ini ekperede ɔyɔhɔ hour ition ke mbubreyo enye ɔwɔrɔ okut owo efen edade do, onyuŋ ɔdɔhɔ mmɔ ete, Nsinam mbufo ekadade mi ɔfuri usen efen-efen?

7Mmɔ ete enye, Koro baba owo kiet mikekpehe nnyin utom.

8Enye ete mmɔ, Mbufo nde eduk ke iŋwaŋ-vine. Ekem ke ini osimde mbubreyo, enyene-iŋwaŋ-vine ɔdɔhɔ akama-ukpɔhɔre esie ete, Kot mbon-utom edi, nyuŋ nɔ mmɔ okuk mmɔ, ɔtɔŋɔde ke ekperedem osim ebe-iso.

9Ndien ke ini mmɔ emi ekokotde mmɔ ke ini ekperede ɔyɔhɔ hour ition ke mbubreyo edide, mmɔ ebɔ owo kiet okuk kiet, owo kiet okuk kiet.

10Edi ke ini mme ebe-iso edide, mmɔ edori enyin ete ke mme imɔ iyebɔ ikan; mmɔ enyuŋ ebɔ kpa ukem-ukem, owo kiet okuk kiet, owo kiet okuk kiet.

11Edi ke adaŋemi mmɔ ebɔde, mmɔ esuk ete-ufɔk oro uyo ete,

12Mme ekperedem emi ema enam utom hour kiet kpɔt, ndien afo anam mmɔ edi ukem ye nnyin, emi ikobiomde mbiomo usen inyuŋ ifɔbɔde eyo.

13Edi enye ɔbɔrɔ owo mmɔ kiet ete, Ufan, ntukke fi: nte ukodiomike ye ami ke okuk kiet?

14Men se inyenede fi, nyɔŋ; edi uduak mi ndinɔ ekperedem emi kpa nte nnɔde fi.

15Nte inenke ami ndida se inyenede mi nnam nte mmade? me nte enyin fo ɔdiɔk, koro ami mfɔnde ido?

16Ntre ke mme ekperedem eyebem iso, mme ebe-iso eyenyuŋ ekpere edem.

17Edi nte Jesus asaŋade ɔdɔk ke Jerusalem, Enye ada mbet duopeba esihere ada ŋkaŋ kiet; ndien ke usuŋ Enye ɔdɔhɔ mmɔ ete,

18Sese, nnyin imɔŋ idɔk ika Jerusalem; ndien eyeda Eyen Owo eyak enɔ ikpɔ oku ye mme scribe, mmɔ eyenyuŋ ebiom Enye ikpe,

19Ete iwot Enye, eyenyuŋ eyak Enye enɔ mme Gentile, ete esak Enye nsahi, enyuŋ emia enye, ewot ke cross: ndien Abasi eyenam Enye eset ke mkpa ke ɔyɔhɔ usen ita.

20Ekem eka nditɔ Zebedee ye nditɔ esie etiene Enye edituak ibuot enɔ Enye, ebeŋe Enye ŋkpɔ.

21Jesus ɔdɔhɔ enye ete, Oyom nso? Ŋwan oro ɔdɔhɔ Enye ete, Nɔ uyo ete nditɔ mi iba emi editie, kiet ke ubɔk nasia Fo, kiet ke ufien, ke Obio Ubɔŋ Fo.

22Edi Jesus ɔbɔrɔ ete, Mbufo ifiɔkke se ebeŋede. Nte mbufo emekeme ndiŋwɔŋ cup emi Ami ndiŋwɔŋde? Mmɔ ete Enye, Nnyin imekeme.

23Enye ɔdɔhɔ mmɔ ete, Ke akpanikɔ mbufo eyeŋwɔŋ cup Mi: edi nditie ke ubɔk nasia Mi ye ke ufien inyeneke Mi ndinɔ, edi enyene mmɔ emi Ete Mi okonimde oro ɔnɔ.

24Edi ke adaŋa emi mbet duop ekopde, esit ayat mmɔ kabaŋa nditɔ-eka iba oro.

25Edi Jesus okot mmɔ edi, onyuŋ ɔdɔhɔ mmɔ ete, Mbufo efiɔk ete, mme andikara mme Gentile esɔŋ ubɔk ekara mmɔ, ikpɔ owo mmɔ enyuŋ ebre odudu ye mmɔ.

26Ididige ntre ke otu mbufo; edi owo ekedede eke oyomde ndikabare ŋkpon ke otu mbufo eyedi asaŋa-utom mbufo;

27owo ekededi eke onyuŋ oyomde ndidi ebe-iso owo ke otu mbufo eyeduk ufin ɔnɔ mbufo

28kpa nte Eyen Owo mikedige, man enam ŋkpɔ enɔ Enye edi man Enye anam ŋkpɔ ɔnɔ owo, onyuŋ ɔnɔ uwem Esie ndifak ediwak owo.

29Ndien nte mmɔ ewɔrɔde ke Jericho, akamba otu owo etiene Enye.

30Ndien sese, mbon nnan iba emi etiede ke mben-usuŋ, ke ini mmɔ ekopde ete Jesus asaŋa ebe, efiori ete, Ɔbɔŋ, Afo Eyen David, tua nnyin mbɔm.

31Edi otu owo esua enɔ mmɔ, ete, ekibi inua; edi mmɔ edɔdiɔŋ efiori ete, Ɔbɔŋ, Afo Eyen David, tua nnyin mbɔm.

32Ndien Jesus atuak ada okot mmɔ edi, ete mmɔ, Mbufo eyom ete nnam nso nnɔ mbufo?

33Mmɔ ete Enye, Ɔbɔŋ, iyom etat nnyin enyin.

34Edi Jesus okop mbɔm, otuk mmɔ enyin; ndien ndo-ndo oro mmɔ ekut usuŋ enyuŋ etiene Enye.