MME HEBREW 13 - Efik Old Bible With Sectional Headings

Utom Emi Enemde Abasi Esit

1YAK ima mbufo ye nditɔ-ete osuk amana ada.

2Ekufre ndikama isen owo, koro ndusuk owo ema esaŋa ntem eda mme angel eduk ufɔk, idiɔŋɔke.

3Eti mmɔ emi edude ke ŋkpɔkɔbi, nte ŋkpɔ eke ekɔbide mbufo ye mmɔ; enyuŋ eti mmɔ emi ekutde utuk, sia mbufo ŋko edude ke ikpɔhidem.

4Yak kpukpru owo ebat ndɔ ke ŋkpɔ eke ekponode ekunyuŋ esabare bed ndɔ; koro Abasi eyekpe ikpe ye mbon use ye mme esin-efibe.

5Ekukɔmɔ ke ima inyene; enemesit ye se mbufo enyenede; koro Abasi ɔdɔhɔde ete, Ndikpuhu fi, ndinyuŋ ŋkpɔŋke fi.

6Ntre ke nnyin imekeme ndisɔŋɔ esit ndɔhɔ ete,

Jehovah edi Andiŋwam mi, ndifeheke ndik:

Nso ke owo edikeme ndinam mi?

7Eti mmɔ emi ekadade mbuot usuŋ, emi eketiŋde ikɔ Abasi enɔ mbufo. Etim ese se uwem mmɔ ɔwɔrɔde ke akpatre, enyuŋ ekpebe mbuɔtidem mmɔ.

8Jesus Christ etie ukem-ukem, mkpɔŋ, ye mfin, ye ke nsinsi.

9Ekuyak nsio-nsio esen ukpepŋkpɔ osio mbufo ke itie mbufo. Ɔfɔn esit enyene nsɔŋ-nda ke mfɔn Abasi, okuda ke nsio-nsio oruk udia; koro ido oro ikodorike mmɔ emi esaŋade esit.

10Nnyin imenyene itie-uwa eke mmɔ emi esaŋade utom ke Ataya minyeneke unen ndidia ŋkpɔ ke esit.

11Koro emen obukidem mme unam oro akwa oku adade iyip mmɔ oduk ke Edisana Ebiet nte uwa mme idiɔk ido efɔp ke ikaŋ ke edem nna.

12Mmɔdo Jesus ŋko akakpade ke edem inua-otop obio, man Enye anam mbio-obio esana ke iyip Esiemɔ.

13Eyak nnyin ndien iwɔŋɔ itiene Enye ke edem nna, ibiom esuene Esie.

14Koro nnyin inyeneke obio eke edibigide ke edem emi, edi nnyin iyom obio eke edidide.

15Yak nnyin iwa uwa ekɔm inɔ Abasi kpukpru ini ke enyiŋ Jesus, kpa mfri mkpɔk-inua eke ekponode enyiŋ Esie.

16Ekufre ndinam eti ŋkpɔ ndinyuŋ mfɔn ido ye owo; koro oruk uwa emi enemde Abasi esit.

17Ekop uyo mme andida mbufo usuŋ, enyuŋ esuk ibuot enɔ mmɔ; koro mmɔ ekpemede eyom ufɔn ukpɔŋ mbufo, nte mmɔ emi enyenede ndinɔ Abasi ibat; man mmɔ enam utom ke idara, ekunam ke mfuhɔ; koro emi midorike udori inɔ mbufo.

18Ebɔŋ akam ebaŋa nnyin; koro nnyin imobure ifiɔk ite, imenyene esit emi mibiomke nnyin ke baba ŋkpɔ kiet, imonyuŋ iyom ndidu uwem nte ɔfɔnde ke kpukpru usuŋ.

19Ndien nsɔŋɔ mbeŋe mbufo nte edɔdiɔŋ enam ntem, man ekpenam ŋwara mfiak ntiene mbufo.

20Ndien Abasi emem, emi akanamde akwa Ekpeme-erɔŋ asaŋa ye iyip nsinsi ediomi eset ke mkpa,

21kpa Ɔbɔŋ nnyin Jesus Christ akpakam ɔnɔ mbufo kpukpru nti ŋkpɔ eda enam se Enye amade, onyuŋ anam utom ke esit nnyin, nte ɔfɔnde Enye ke enyin, oto ke Jesus Christ. Ubɔŋ enyene Enye ke nsinsi-nsinsi. Amen.

22Nnɔ mbufo uyo, nditɔ-ete mi, nte, enyime ndibɔ item emi ntemede mbufo. Koro edi ibibio ŋwed ke nnɔ esɔk mbufo.

23Nyom mbufo efiɔk ete ema esana Timothy eyen-ete nnyin eyak. Edieke enye ediwarade edi, nyesaŋa ye enye ndise mbufo.

24Ekɔm kpukpru mme andida mbuot usuŋ ye kpukpru ikɔt Abasi. Mmɔ emi etode Italy ekɔm mbufo.

25Mfɔn akpakam odu ye kpukpru mbufo. Amen.