NUMBERS 35 - Efik Old Bible With Sectional Headings

Mme Obio Emi ekenɔde Mme Levites

1EKEM Jehovah ɔdɔhɔ Moses ke una-isɔŋ Moab, ke mben Jordan Jericho, ete,

2Wuk nditɔ Israel, ete esioŋo obio iduŋ ke udeme emi mmɔ edinyenede, eda enɔ mme Levite; mbufo enyuŋ enɔ mme Levite mben isɔŋ emi akande obio oro okuk.

3Ndien mme obio oro eyedi ebiet iduŋ mmɔ; mben isɔŋ mmɔ eyenyuŋ edi eke ufene mmɔ, ye eke inyene mmɔ, ye eke kpukpru mme unam mmɔ.

4Ndien mben isɔŋ mme obio emi mbufo edinɔde mme Levite, etɔŋɔ ke ibibene obio ewɔrɔ tɔsin ibio idomo-okuk ekan ekuk.

5Ndien mbufo edomo tɔsin ibio idomo-okuk iba ke ufien, ye tɔsin ibio idomo-okuk iba ke edem usuk, ye tɔsin ibio idomo-okuk iba ke nnasia, ye tɔsin ibio idomo-okuk iba ke edem edere: ndien obio eyena ke ufɔt: emi edidi mben isɔŋ obio mmɔ.

6Ndien mme obio emi mbufo edinɔde mme Levite edidi obio-ubɔhɔ itiokiet, emi mbufo edinimde ete owot-owo efehe aka do: ndien mbufo eda obio aba ye iba edian ye mmɔ.

7Kpukpru obio emi mbufo edinɔde mme Levite edidi obio aba ye itiaita: kpa mmɔ ye mben isɔŋ mmɔ.

8Ndien ama edi mme mbio emi mbufo edisiode ke udeme nditɔ Israel enɔ: mbufo ebɔ mmɔ emi ewakde ediwak, enyuŋ ebɔ mmɔ emi miwakke esisit: yak kpukpru mmɔ esio ke mme obio mmɔ, nte ekemde ke udeme emi mmɔ edidade, enɔ mme Levite.

9Ndien Jehovah ɔdɔhɔ Moses, ete, Dɔhɔ ye nditɔ Israel,

10nyuŋ tiŋ nɔ mmɔ, ete, Ke adaŋemi mbufo ema ekebe Jordan eduk ke isɔŋ Canaan;

11mbufo enim obio eke edidide obio-ubɔhɔ mbufo; man owot-owo eke owotde owo ke ndudue, efehe aka do.

12Ndien mmɔ eyedi obio eke mbufo edidade ebɔhɔ osio-usiene: man owot-owo okukpa, tutu enye edi ikpe ke iso mbon esop.

13Ndien mme obio emi mbufo edinɔde, edidi obio-ubɔhɔ itiokiet mbufo:

14mbufo enɔ obio ita ke edem Jordan oko, enyuŋ enim obio ita ke isɔŋ Canaan, mmɔ eyedi obio-ubɔhɔ.

15Mme obio mbitiokiet emi edidi obio-ubɔhɔ nditɔ Israel, ye eke esen owo, ye eke oduduŋ ke otu mmɔ: kpaŋ kpukpru owot-owo ke ndudue ekpefehe eka do.

16Ndien edieke enye emende ŋkpɔ-ukwak ɔtɔ owo owot, enye edi owot-owo: owot-owo ntem okutre ndikpakpa.

17Onyuŋ edieke enye emende itiat eke ekemede ndiwot owo, ke ubɔk ɔtɔ owo owot, enye edi owot-owo: owot-owo ntem okutre ndikpakpa.

18Mme onyuŋ edieke enye emende eto eke ekemede ndiwot owo, ke ubɔk, oyibi owo owot, enye edi owot-owo: owot-owo okutre ndikpakpa.

19Edi osio-usiene iyip enyene ndiwot owot-owo: ini eke enye okutde enye, yak owot enye.

20Ndien edieke enye okokoide koi okim owo ke usua, mme etetie ebet, ndien otop ŋkpɔ ɔtɔ owo owot;

21mme adada ubɔk esie ɔtɔ enye ke usua owot: owo emi ɔkɔtɔde owo ntre okutre ndikpakpa; enye edi owot-owo: osio-usiene iyip enyene ndiwot owot-owo oro ke ini osimde enye.

22Edi edieke erikim oro ɔbɔhɔde bɔhɔ ɔnɔmɔ enye ke usua miduhe, mme otop ŋkpɔ ekededi ɔtɔ enye ke miketiehe tie ibet;

23mme otop itiat ekededi eke ekemede owo ndiwot, ke ini enye mikwe, ndien aka ɔkɔtɔ enye owot, ke midige owo usua esie, minyuŋ iyomke ndinam enye ŋkpɔ:

24yak mbon esop ekpe ndien ikpe ke ufɔt owot-owo oro ye osio-usiene iyip, nte mme ikpe emi esaŋade:

25ndien yak mbon esop enyaŋa owot-owo oro osio ke ubɔk osio-usiene iyip, mbon esop enyuŋ eyak enye afiak ke obio-ubɔhɔ esie, emi enye efehede aka do: ndien enye oduŋ do tutu akamba oku eke ekeyerede edisana aran, akpa.

26Edi edieke owot-owo oro ɔwɔrɔde ebe adaŋa obio-ubɔhɔ esie, eke enye efehede aka do:

27ndien osio-usiene iyip osim enye ke edem adaŋa obio ubɔhɔ esie, osio usiene iyip owot owot-owo oro, iyip idisɔpke enye:

28koro enye enyenede nditie ke obio ubɔhɔ esie tutu akamba oku oro akpa: ndien ke adaŋemi akamba oku oro akpade, owot-owo oro edinyɔŋ ke isɔŋ udeme esie.

29Mbufo eda ndien ŋkpɔ emi enim ke ewuhɔ ikpe ofuri emana mbufo, ke kpukpru ebiet iduŋ mbufo.

30Owo ekededi ama owot owo, yak eda uyo ntiense ewot owot-owo oro: edi owo kierakiet okudi ntiense ɔnɔ owo akpa.

31Ndien ŋko mbufo ekubɔ ŋkpɔ baba kiet ke ibuot uwem owot-owo eke odotde ndikpa: ekutre ndiwot enye.

32Ndien ŋko-ŋko mbufo ekubɔ ŋkpɔ baba kiet ke ibuot owo emi efehede aka ke obio-ubɔhɔ esie, man enye afiak okoduŋ ke isɔŋ, tutu oku akpa.

33Ndien ŋko mbufo ekubiat isɔŋ emi mbufo edude ke esit: koro iyip abiatde isɔŋ: ndien mmɔ idikemeke ndisio isop nnɔ isɔŋ mbaŋa iyip eke eduɔkde ke esit, ke mibɔhɔke ke iyip owo eke ɔduɔkde enye.

34Ekunyuŋ esabare isɔŋ emi mbufo eduŋde ke esit, emi ami ntiede enye ke ufɔt: koro ami Jehovah nduŋde ke otu nditɔ Israel.