2 NDIDEM 18 - Efik Old Bible With Sectional Headings

Hezekiah Akara ke Judah

1EDIKEM ke ɔyɔhɔ isua Hoshea eyen Elah edidem Israel ita, Hezekiah eyen Ahaz, edidem Judah, ada ubɔŋ.

2Enye osim isua edip ye ition ke ini enye adade ubɔŋ; onyuŋ edi edidem ke Jerusalem isua edip ye usukkiet. Ndien enyiŋ eka esie ekere Abi eyen Zachariah aŋwan.

3Ndien enye anam se inende ke iso Jehovah, kpa nte David ete esie akanamde kpukpru.

4Enye abiat mme edikoŋ ebiet efep, onyuŋ obom mme adaha, onyuŋ asiak mme eto-mkpe, onyuŋ ada urukikɔt okpoho oro Moses akanamde, anuak mbai-mbai, koro nditɔ Israel ekam efɔpde incense enɔ enye tutu osim usen oro: ndien enye okot enye, ete Nehustan (okpoho).

5Enye ɔbuɔt idemesie ye Jehovah Abasi Israel; baba owo kiet inyuŋ ibietke enye ke otu kpukpru ndidem Judah oro etienede enye ke edem, ye ke otu mmɔ oro ekebemde enye iso.

6Ndien enye eyire ye Jehovah, inyuŋ itreke nditiene enye, edi onim mbet esie oro Jehovah eketemede Moses.

7Ndien Jehovah odu ye enye; enye okut unen ke kpukpru ebiet emi enye ɔwɔrɔde: enye onyuŋ ɔsɔŋ ibuot ye edidem Assyria, inyuŋ inamke ŋkpɔ inɔ enye.

8Enye asuan mme Philistine tutu osim ke Gaza, ye adaŋa esie, ɔtɔŋɔde ke tower mbon-ukpeme, tutu osim ke obio ibibene.

9Edikem ke ɔyɔhɔ isua edidem Hezekiah inaŋ, oro edi ɔyɔhɔ isua Hoshea eyen Elah edidem Israel itiaba, Shalmaneser edidem Assyria ɔdɔk edi ke Samaria edikan enye okuk.

10Ekem mmɔ eda enye ke utit isua ita, ke ɔyɔhɔ isua Hezekiah itiokiet, oro edi ɔyɔhɔ isua Hoshea edidem Israel usukkiet, mmɔ eda Samaria.

11Ndien edidem Assyria ataŋ Israel ɔnyɔŋ ke Assyria, okonim mmɔ ke Halah, ye ke Habor, ke mben akpa Gozan; ye ke mme obio Media:

12koro mmɔ mikekopke uyo Jehovah Abasi mmɔ, edi ebiat ediomi esie, ye kpukpru se Moses owo Jehovah eketemede, minyuŋ ikopke, inyuŋ inamke.

13Ekem ke ɔyɔhɔ isua edidem Hezekiah duopenaŋ, Sennacherib edidem Assyria ɔdɔk edi ekɔŋ ye kpukpru obio Judah emi enyenede ibibene, onyuŋ ada mmɔ.

14Ndien Hezekiah edidem Judah ɔdɔŋ ekedɔhɔ edidem Assyria ke Lachish, ete, Mma ndue; fiak edem kpɔŋ mi; nyebiom se afo edidoride mi. Ndien edidem Assyria odori Hezekiah edidem Judah talent silver ikie ita, ye talent gold edip ye duop.

15Ndien Hezekiah ada ofuri silver emi ekutde ke ufɔk Jehovah, ye ke ebiet unim-inyene edidem ɔnɔ enye.

16Ke ini oro Hezekiah osibe gold efep ke mme itim temple Jehovah, ye ke mme obubɔk enyin-usuŋ, emi Hezekiah edidem Judah okokubide, onyuŋ ada enye ɔnɔ edidem Assyria.

17Ekem, edidem Assyria etie ke Lachish ɔdɔŋ Tartan, ye Rabsaris, ye Rab-shakeh, ete eda akwa udim-ekɔŋ eka ke ɔtɔ edidem Hezekiah ke Jerusalem. Ndien mmɔ edɔk eka ke Jerusalem. Ekem adaŋemi mmɔ edɔkde esim do, mmɔ eda ke mben udiɔŋ mmɔŋ enyɔŋ-enyɔŋ mkpɔdiɔhɔ-mmɔŋ emi odude ke ɔkpɔ-usuŋ iŋwaŋ ɔdiɔŋ-ɔfɔŋ.

18Ndien adaŋemi mmɔ ekotde edidem edi, Eliakim eyen Hilkiah, emi edide etubom ufɔk, ye Shebnah andiwet ŋwed, ye Joah eyen Asaph andiwet ŋkpɔ obio, ewɔrɔ etiene mmɔ.

19Ndien Rabshakeh ɔdɔhɔ mmɔ, ete, Mbufo edɔhɔ ndien Hezekiah, ete, Ntem ke akwa edidem, kpa edidem Assyria ɔdɔhɔ, ete, Ewe mbuɔtidem edi emi afo ɔbuɔtde?

20Afo ɔdɔhɔ (edi edi ikɔ ikpɔk-inua) ete, Mmenyene item ye odudu ekɔŋ. Afo ɔbuɔt idem fo ye anie, ndien, eke esinde fi ɔsɔŋɔ ibuot ye ami?

21Sese, afo ke ɔbuɔt idemfo ke esaŋ nnyanyaŋa emi anuahade, kpa Egypt, emi owo ekpeberi idemesie ke esit, eyeduk enye ke ubɔk okim: ntem ke Pharaoh edidem Egypt etie kpukpru mmɔ eke ebuɔtde idem mmɔ ye enye.

22Ndien emi mbufo edidɔhɔde mi, ete, Nnyin ke ibuot idem nnyin ye Jehovah Abasi nnyin, nte idige enye ke Hezekiah okosio mme edikoŋ ebiet esie ye mme itie-uwa esie efep, okonyuŋ ɔdɔhɔ Judah ye Jerusalem, ete, Mbufo ebɔŋ akam ke iso itie-uwa emi ke Jerusalem.

23Di, ndien, di ŋwana ye ɔbɔŋ mi, edidem Assyria, ndien nyenɔ fi tɔsin horse iba, edieke afo ekemede ndidori owo ke esit ke idem fo.

24Afo edinam didie ndien akabare iso adidaha kiet ke otu ŋkpri ikɔt ete mi, onyuŋ ɔbuɔt idem fo ye Egypt ke ikɔ chariot ye mbon horse?

25Nte ndɔk ndi ŋko ke ebiet emi ndisobo enye, ke mitoho Jehovah? Jehovah ɔkɔdɔhɔ mi, ete, Dɔk ka isɔŋ emi, nyuŋ sobo enye.

26Ndien Eliakim eyen Hilkiah, ye Shebnah, ye Joah edɔhɔ Rabshakeh, ete, Mbɔk, neme ye nnyin ikɔt fo ke usem Syria: koro nnyin imokop enye: edi kuneme ye nnyin ke usem mme Jew ke utɔŋ mme mmɔ emi etiede ke enyɔŋ ibibene.

27Ndien Rabshakeh ɔdɔhɔ mmɔ, ete, Nte ɔbɔŋ mi ɔmɔdɔŋ mi ete nditiŋ ikɔ emi nnɔ ɔbɔŋ fo ye afo? ŋkutiŋ nnɔ mme mmɔ emi etiede ke enyɔŋ ibibene, nte ke mmɔ editiene mbufo edia ifuɔ mmɔ, enyuŋ eŋwɔŋ ikim mmɔ?

28Ndien Rabshakeh ada do ofiori ke ɔkpɔsɔŋ uyo ke usem mme Jew, onyuŋ ɔdɔhɔ, ete, Mbufo ekop uyo akwa edidem, kpa edidem Assyria;

29ntem ke edidem ɔdɔhɔ ete, Mbufo ekuyak Hezekiah abiaŋa mbufo: koro enye midikwe nte osiode mbufo ke ubɔk imɔ:

30ekunyuŋ eyak Hezekiah esin mbufo ebuɔt idem ye Jehovah, ete, Jehovah iditreke ndinyaŋa nnyin, idinyuŋ idaha obio emi isin edidem Assyria ke ubɔk.

31Ekukop uyo Hezekiah: koro ntem ke edidem Assyria ɔdɔhɔ, ete, Mbufo enam emem ye ami, enyuŋ ewɔŋɔ etiene mi, ndien kpukpru owo edia vine mmɔ, ye fig mmɔ, kpukpru owo enyuŋ eŋwɔŋ mmɔŋ ke obube mmɔ:

32tutu ami ndi ndida mbufo nnyɔŋ ke isɔŋ emi ebietde isɔŋ mbufo, kpa isɔŋ ibokpot, ye eke wine, isɔŋ uyo ye eke iŋwaŋ-vine, isɔŋ aran-olive ye eke aran-ɔkwɔk, man mbufo edu uwem, ekukpaŋa: mbufo ekukop, ndien, uyo Hezekiah, ke ini enye atapde mbufo, ete, Jehovah eyenyaŋa nnyin.

33Nte abasi mme idut ekededi ama anyaŋa mme idut esie osio ke ubɔk edidem Assyria?

34Enye mme abasi Hamath, ye eke Arpad? Enye mme abasi Sepharvaim, ye eke Hena, ye eke Ivvah? Nte mmɔ ema enyaŋa Samaria esio mi ke ubɔk?

35Edi mme anie ke otu kpukpru abasi mme idut ekenyaŋa idut mmɔ esio mi ke ubɔk, eke Jehovah akpanyaŋade Jerusalem osio mi ke ubɔk?

36Edi kpukpru owo edop uyo, inyuŋ ibɔrɔke enye baba ikɔ kiet: koro edidem eketemede ete, Mbufo ekubɔrɔ enye.

37Ekem Eliakim eyen Hilkiah emi edide etubom ufɔk, ye Shebna andiwet ŋwed, ye Joah eyen Asaph andiwet ŋkpɔ obio, ewai edisine-ŋkpɔ mmɔ, etiene Hezekiah, eketiŋ ikɔ Rabshakeh enɔ enye.