1EKEM ɔbɔŋ-aŋwan Sheba okop etop Solomon, ndien enye adaha aka ke Jerusalem ndidomo Solomon ke ŋke, asaŋa ye ata akamba udim, ye camel eke ebiomde ufuɔŋkpɔ, ye ata ediwak gold, ye itiat eke esɔŋde urua: ndien adaŋemi enye osimde ɔtɔ Solomon, enye ada kpukpru se idude enye ke esit, eneme ye enye.
2Ndien Solomon asiak kpukpru ikɔ esie ɔnɔ enye: baba ikɔ kiet idibeke Solomon eke enye misiakke inɔ enye.
3Ndien ɔbɔŋ-aŋwan Sheba okut ifiɔk Solomon, ye ufɔk oro enye ɔkɔbɔpde,
4ye udia okpokoro esie, ye itie ikɔt esie, ye idaha mme asaŋutom esie, ye edisine-ŋkpɔ mmɔ; ye mme andikama wine esie, ye edisine-ŋkpɔ mmɔ; ye udigukot esie, emi enye ɔdɔkde ke ufɔk Jehovah; ndien ukpɔŋ akpa enye ke idem.
5Ndien enye ɔdɔhɔ edidem, ete, Se ŋkokopde ke edem nnyin, ebaŋa ikɔ fo ye ifiɔk fo, edi akapanikɔ:
6edi ŋkenimke inɔ mmɔ ke akpanikɔ tutu ndidi, enyin mi emenyuŋ ekut; ndien, sese, iketiŋke baba ubak akwa ifiɔk fo emi inɔ mi: afo emebe etop oro ŋkokopde.
7Ɔfɔfɔn ɔnɔ mbio fo, onyuŋ ɔfɔn ɔnɔ ikɔt fo, emi edade ke iso fo kpukpru ini, enyuŋ ekop ifiɔk fo.
8Etoro Jehovah Abasi fo, emi amade fi, onyuŋ odori fi ke ebekpo esie, nte edidem Jehovah Abasi fo: koro Abasi fo amade Israel ke erinam mmɔ esɔŋ eda ke nsinsi, oro esin enye onim fi ke edidem mmɔ, man afo ekpe ikpe eke enende nen.
9Ndien enye ɔnɔ edidem talent gold ikie ye edip, ye ata ediwak ufuɔŋkpɔ, ye nsɔŋ-urua itiat: ndien oruk ufuɔŋ-ŋkpɔ nte oro ɔbɔŋ-aŋwan Sheba ɔnɔde Solomon iduhe.
10Ndien ŋko ikɔt Huram ye ikɔt Solomon, emi edade gold ke Ophir edi, eda eto algum, ye nsɔŋ-urua itiat, edi.
11Ndien edidem ada eto algum oro, anam udigukot ke ufɔk Jehovah, ye ke ufɔk edidem, ye harp, ye psaltery, ɔnɔ mbon-ikwɔ: akananam ikwe oruk oro ke isɔŋ Judah.
12Ndien edidem Solomon ɔnɔ ɔbɔŋ-aŋwan Sheba kpukpru se inemde enye esit, eke enye ebeŋede, ɔkɔrɔ ke se enye adade ɔsɔk edidem. Ndien enye asaŋa ye ikɔt esie ɔnyɔŋ ke edem mmɔ.
13Ndien udobi gold emi osimde Solomon ke isua kiet edi talent gold ikie itiokiet, ye ata, ye itiokiet;
14ɔkɔrɔ ke se mbon urua, ye mbon mbubine ekam edade edi. Kpukpru mbɔŋ Arabia, ye mme andikara mme idut ekam enyuŋ eda gold ye silver esɔk Solomon.
15Ndien edidem Solomon odom gold anam otu-ekɔŋ ikie iba; shekel edidom gold ikie itiokiet eduk ke otu-ekɔŋ kiet.
16Enye onyuŋ odom gold anam ŋkpri otu-ekɔŋ ikie ita: shekel gold ikie ita eduk ke otu kiet. Ndien edidem emen mmɔ onim ke ufɔk akai Lebanon.
17Edidem onyuŋ anam akwa ebekpo ke oduk-enin, onyuŋ ada edisana gold ofuk enye.
18Ebekpo oro enyene udigukot itiokiet, ye udorukot o-gold, eke emumde ebekpo, ye ubɔk ke edem mbiba ke ebiet emi etiede lion iba enyuŋ eda ke ŋkaŋ ubɔk oro.
19Lion duopeba enyuŋ eda do ke udigukot itiokiet ke edem mbiba; akanam inamke oruk emi ke baba idut kiet.
20Ndien kpukpru uŋwɔŋ-ŋkpɔ edidem Solomon edi gold, kpukpru ŋkpɔ nduŋ ufɔk akai Lebanon enyuŋ edi edisana gold; silver iduhe; ibatke enye ke ŋkpɔ ke eyo Solomon.
21Koro ubom edidem akade Tarshish ye ikɔt Huram: mme ubom Tarshish edi ini kiet ke isua ita, ini kiet ke isua ita, ebiom gold, ye silver ye oduk-enin, ye ebɔk, ye mme peacock.
22Ntem ke edidem Solomon okpon akan kpukpru ndidem ererimbot ke inyene, ye ke ifiɔk.
23Kpukpru ndidem ererimbot enyuŋ eyom iso Solomon, ete ikop ifiɔk esie, eke Abasi ekesinde enye ke esit.
24Ndien kpukpru mmɔ enyuŋ eda enɔ mmɔ edi, ŋkpɔ silver, ye ŋkpɔ gold ye edisine-ŋkpɔ, ye ŋkpɔ-ekɔŋ, ye ufuɔŋkpɔ, ye horse, ye mule, ibat nte esiakde ke isua ke isua.
25Solomon onyuŋ enyene tɔsin ufɔk horse ye chariot ke itie inaŋ, ye tɔsin mbon horse duopeba; ndien enye onim ubak mmɔ ke mme obio chariot, ye ubak ke Jerusalem ke ɔtɔ edidem.
26Enye onyuŋ akara kpukpru ndidem, ɔtɔŋɔde ke Akpa tutu osim ke isɔŋ mme Philistine, ye ke adaŋa Egypt.
27Ndien edidem anam silver etie ke Jerusalem nte itiat, onyuŋ anam cedar awak nte sycomore emi edude ke una-isɔŋ edem inyaŋ.
28Mmɔ enyuŋ eda horse ke Egypt, ye ke kpukpru mme idut, edisɔk Solomon.
29Ndien ama edi ikɔ Solomon emi esuhɔde, mbemiso ye akpatre, nte ikewetke mmɔ isin ke ŋwed Nathan prophet, ye ke ŋwed prophecy Ahijah Shilonite, ye ke ŋkukut Iddo okut-ŋkukut emi ebaŋade Jeroboam eyen Nebat?
30Ndien Solomon edi edidem ofuri Israel ke Jerusalem ke isua aba.
31Ekem Solomon ɔsuhɔre ana ye mme ete esie ede, ndien ebuk enye ke obio David ete esie: ndien Rehoboam eyen esie ada ubɔŋ ke itie esie.
Who We AreWhat We EelieveWhat We Do
2025 by iamachristian.org,Inc All rights reserved.
