JEREMIAH 38 - Efik Old Bible With Sectional Headings

Esin Jeremiah ke Obube Edi Abasi Anam Esio Enye ke Ŋkaiso

1NDIEN Shephatiah eyen Mattan, ye Gedaliah eyen Pashhur, ye Jucal eyen Shelemiah, ye Pashhur eyen Malchijah ekop ikɔ oro Jeremiah eketinŋde ɔnɔ kpukpru owo, ete,

2Ntem ke Jehovah ɔdɔhɔ, ete, Owo eke etiede ke obio emi eyekpa ke ofut, ye ke biɔŋ, ye ke udɔŋɔ: ndien owo eke ɔwɔrɔde etiene mme Chaldean eyedu uwem: enye eyenyuŋ enyene uwem esie ke ŋkpɔ mbume, onyuŋ odu uwem.

3Ntem ke Jehovah ɔdɔhɔ ete, Iditreke ndida obio emi nsin mbon-ekɔŋ edidem Babylon ke ubɔk, ndien mmɔ eyeda enye.

4Ndien mbɔŋ oro edɔhɔ edidem, ete, Mbɔk, yak ewot owo emi: koro ntem ke enye anam ubɔk emem mbon-ekɔŋ emi esuhɔde ke obio emi, onyuŋ anam ubɔk emem kpukpru mbio-obio, ke eritiŋ oruk ikɔ emi nnɔ mmɔ: koro owo emi miyomke ifure mbio-obio emi, edi oyom idiɔk.

5Ndien edidem Zedekiah ɔdɔhɔ ete, Sese, enye mmɔdo ke ubɔk mbufo: koro midige edidem ekeme ŋkpɔ ye mbufo.

6Ndien mmɔ emum Jeremiah eka ekeduɔk ke obube Malchijah eyen edidem, emi odude ke okure ufɔk ukwak: ndien mmɔ eda idut esuhɔre Jeremiah. Ndien mmɔŋ iduhe ke obube oro, ke mibɔhɔke mbat odu. Ndien Jeremiah ɔbuhɔ ke mbat.

7Ndien Ebed-melech eyen Ethiopia, eunuch kiet emi odude ke ufɔk edidem, okop ete ke ekesin Jeremiah ke obube oro; ndien edidem etie ke inua otop Ben-jamin;

8ndien Ebed-melech oto ke ufɔk edidem, aka ɔkɔdɔhɔ edidem, ete,

9Ɔbɔŋ mi edidem, mbon oro ediɔk ndinam kpukpru se mmɔ enamde ye Jeremiah prophet, emi mmɔ eduɔkde ke obube: ndien enye eyekpa biɔŋ ke itie esie: koro baba udia miduhe aba ke obio.

10Ndien edidem eteme Ebed-melech eyen Ethiopia oro, ete, Sio owo edip ye duop ke ɔtɔ emi ye idem fo, ka kokot Jeremiah ke obube sio, ke enye mika-ikpaha.

11Ndien Ebed-melech ada mbon oro ke ubɔk esie, aka ke ufɔk edidem, ke ebiet emi odude ke idak ubet unim ŋkpɔ ndien osioŋo ntaha ɔfɔŋ ye ntaha edisine-ŋkpɔ ke esit; ndien mmɔ eda idut esuhɔre mmɔ enɔ Jeremiah ke obube.

12Ndien Ebed-melech eyen Ethiopia oro ɔdɔhɔ Jeremiah, ete, Men ndien ntaha ɔfɔŋ emi ye edisine-ŋkpɔ sin ke idak mkpafaha ubɔk fo, ke idak idut: ndien Jeremiah anam ntre.

13Ndien mmɔ ekot Jeremiah ke idut esio ke obube: ndien Jeremiah etie do ke okure ufɔk ukwak.

14Ndien Zedekiah edidem ɔdɔŋ ekeda Jeremiah prophet esɔk enye ke ɔyɔhɔ enyin-usuŋ ita emi odude ke ufɔk Jehovah; ndien edidem ɔdɔhɔ Jeremiah, ete, Ami mmɔŋ mbup fi ŋkpɔ kiet; kudip mi baba ikɔ kiet.

15Ndien Jeremiah ɔdɔhɔ Zedekiah, ete, Mma ndɔhɔ fi, nte afo uduwotke mi? Ndien mma nnɔ fi item, nte afo eyekop uyo mi?

16Ndien edidem Zedekiah ɔŋwɔŋɔ ɔnɔ Jeremiah ndibe-ndibe, ete, Ma uwem Jehovah emi anamde nnyin idi ukpɔŋ emi, ndiwotke fi ndinyuŋ nsinke fi ke ubɔk mmɔ eke eyomde uwem fo.

17Ndien Jeremiah ɔdɔhɔ Zedekiah, ete, Ntem ke Jehovah Abasi mme udim Abasi Israel ɔdɔhɔ, ete, Edieke afo edinyimede ndiwɔrɔ ntiene ikpɔ owo edidem Babylon, ukpɔŋ fo eyedu uwem, ndien obio emi iditaha ikaŋ; afo ye ufɔk fo eyenyuŋ edu uwem:

18edi munyimeke ndiwɔrɔ ntiene ikpɔ owo edidem Babylon, obio emi eyesine mme Chaldean ke ubɔk: ndien mmɔ eyefɔp enye ke ikaŋ, afo udunyuŋ ubɔhɔke mmɔ ke ubɔk.

19Ndien edidem Zedekiah ɔdɔhɔ Jeremiah ete, Ami mfehe mme Jew emi ekedianade ye mme Chaldean, mbak edida mi esin mmɔ ke ubɔk, ndien mmɔ edituhɔ mi.

20Ndien Jeremiah ɔdɔhɔ ete, Mmɔ idisinke. Mbɔk, kop uyo Jehovah ke se ami ndɔhɔde fi; ndien eyefɔn fi, ukpɔŋ fo eyenyuŋ odu uwem.

21Edi afo munyimeke ndiwɔrɔ, emi edi ikɔ emi Jehovah ɔkɔwutde mi:

22“Ndien, sese, eyeda kpukpru iban emi esuhɔde ke ufɔk edidem Judah ewɔrɔ esɔk ikpɔ owo edidem Babylon: ndien iban oro eyedɔhɔ ete, ‘Mme ufan fo ekesin fi anam ntem, ekenyuŋ ekan fi: ukot fo emebuhɔ ke mbat, enyuŋ efiak edem.’

23Ntem ke mmɔ edisioŋo kpukpru iban fo ye nditɔ fo esɔk mme Chaldean: ndien afo udubɔhɔke mmɔ ke ubɔk: koro ubɔk edidem Babylon eyemum fi: afo eyenyuŋ ɔfɔp obio emi ke ikaŋ.”

24Ndien Zedekiah ɔdɔhɔ Jeremiah, ete, Kuyak baba owo kiet ɔfiɔk ikɔ emi, ndien afo udukpaha.

25Edi edieke ikpɔ owo oro edikopde ete ke ami ŋkeneme ye afo, ndien edi ke ɔtɔ fo, enyuŋ ebup fi, ete, Mbɔk, sian nnyin se afo ɔkɔdɔhɔde edidem, kudip nnyin, ndien nnyin idiwotke fi; edidem okonyuŋ ɔdɔhɔ fi didie?

26Ndien dɔhɔ mmɔ, ete, Ami ŋkɔsuhɔre mkpe-ubɔk mi nnim ke iso edidem, nte enye okuyak mi mfiak ŋka ufɔk Jonathan ŋkakpa do.

27Ekem kpukpru mbɔŋ oro esim Jeremiah edibup enye: ndien enye etiŋ ɔnɔ mmɔ nte ekemde ye kpukpru ikɔ emi edidem eketemede. Ndien mmɔ isioroke enye uyo: koro baba owo kiet mikokopke ŋkpɔ oro.

28Ndien Jeremiah etie ke okure ufɔk ukwak, tutu osim usen emi edade Jerusalem. Enye onyuŋ odu do ke ini emi edade Jerusalem.