EZEKIEL 42 - Efik Old Bible With Sectional Headings

Ufɔk Iba Emi Edade Ekpere Temple

1NDIEN enye ada mi ɔwɔrɔ oduk ke akwa okure usuŋ edem edere; onyuŋ ada mi oduk ke ubet emi asakde iso ese ebiet eridianare mfep, emi onyuŋ asakde iso ese ufɔk eken ke edem edere-edere.

2Inua-otop edem edere odu ke iso uniɔŋ ibio-idomo-okuk ikie; ubom onyuŋ edi ibio-idomo-okuk aba ye duop.

3Gallery kiet ekem iso ye gallery eken ke mme deck mbita, ekem iso ye ibio-idomo-okuk edip emi edude ke esa, onyuŋ ekem iso ye deck-itiat emi enyenede akwa okure.

4Ebiet eke owo asaŋade, ekem ibio-idomo okuk ke ubom onyuŋ odu ke iso mme ubet (oku), usuŋ ibio-idomo okuk ikie; ndien inua-otop mmɔ ese edem edere.

5Ndien mme ubet enyɔŋ-enyɔŋ edi ibio (koro mme gallery esibede mmɔ ubak efep) ekan mmɔ emi edude ke idak, ye mmɔ emi esinede ke ufɔt ufɔk eken oro:

6koro mmɔ enamde mmɔ esin ke deck ita; ndien mmɔ inyeneke adaha ebiet mme adaha okure: mmɔdo enye afarade akan eke idak ye eke esine-ufɔt, ekpɔŋ isɔŋ.

7Ndien ama edi ibibene emi odude ke esien, ekem iso ye ubet (oku), ese akwa okure, ke iso mme ubet: uniɔŋ esie edi ibio-idomo-okuk aba ye duop.

8Koro uniɔŋ ubet emi edude ke akwa okure edi ibio-idomo-okuk aba ye duop; ndien sese, ibio-idomo-okuk ikie edu ke iso temple.

9Ndien enyin-usuŋ edem usiaha-utin odu ke idak ubet emi, nte owo otode ke akwa okure oduk mmɔ ke esit.

10Mme ubet emi edu ke ubara ibibene okure usuŋ edem usiaha-utin, ke iso ebiet eridianare mfep; ye ke iso ufɔk eken oro.

11Ndien usuŋ odu mmɔ ke iso, ebiet mme ubet usuŋ oro edude edem edere, ekem ye uniɔŋ mmɔ ye ubom mmɔ: ndien kpukpru ebiet mmɔ eke owo ɔwɔrɔde ke esit ekem ke oruk mmɔ ye mme enyin-usuŋ mmɔ.

12Onyuŋ asaŋa ye mme enyin-usuŋ ubet emi edude ke edem usuk: inua-otop ke ibuot usuŋ, usuŋ (emi anade) ke iso edinen ibibene, usuŋ edem usiaha-utin nte owo odukde mmɔ ke esit.

13Ndien enye ɔdɔhɔ mi, ete, Mme ubet edem edere, ye mme ubet edem usuk emi edude ke iso ebiet eridianare mfep, mmɔ edi edisana ubet emi mme oku emi esaŋade ekpere Jehovah edidiade ata edisana ŋkpɔ do: mmɔ eyenim ata edisana ŋkpɔ do, ye inuak-udia, ye uwa idiɔk ido, ye uwa ndudue: koro ebiet oro edide edisana.

14Adaŋemi mme oku edukde, mmɔ ekuto ke edisana ebiet eka ke akwa okure: ndien do ke mmɔ edinim edisine-ŋkpɔ mmɔ emi mmɔ enamde ŋkpɔ ke esit; koro mmɔ edide edisana; yak mmɔ esine edisine-ŋkpɔ eŋwen, ndien esaŋa ekpere ke eke mbio-obio.

15Ekem ke enye ama okodomo ufɔk esit ama, enye ada mi ɔwɔrɔ ke usuŋ inua-otop emi esede usuŋ edem usiaha-utin; ndien odomo enye akan okuk.

16Odomo edem usiaha-utin ke eto idomo, ekem eto ikie ition, ke eto idomo, akan okuk.

17Enye odomo edem edere-edere, eto ikie ition, ke eto idomo, akan okuk.

18Odom edem usuk-usuk, eto ikie ition, ke eto idomo.

19Enye ɔwɔŋɔre aka edem usop-utin, ndien odomo eto ikie ition, ke eto idomo.

20Odomo enye ke edem mbinaŋ: ibibene akan enye ofuri-ofuri okuk, uniɔŋ edi eto ikie ition, ubom onyuŋ edi eto ikie ition, man abahare eke Abasi ke eke owo.