ISAIAH 14 - Efik Old Bible With Sectional Headings

Judah Efiak Enyɔŋɔ Edi Isɔŋ Mmɔ

1KORO Jehovah eyedɔŋ Jacob esit, onyuŋ ɔtɔŋɔ ntak emek Israel, onyuŋ onim mmɔ ke isɔŋ mmɔ: ndien isen owo eyedian idem ye mmɔ, enyuŋ esop idem mmɔ ye ufɔk Jacob.

2Ndien mbio-obio eyemen mmɔ eda edi ke ebiet mmɔ: ufɔk Israel eyenyuŋ ada mmɔ enyene ke isɔŋ Jehovah, onim ke ifin iren ye ifin iban: ntre ke mmɔ editaŋ mme mmɔ emi eketaŋde mmɔ efep; enyuŋ ekara mme mmɔ emi eketukde mmɔ.

3Ndien ama ekem ke usen emi Jehovah edisiode fi ke ndutuhɔ fo, ye ke nyomo-nsia fo, ye ke ɔkpɔsɔŋ ufin emi enimde fi, efep, ɔnɔ fi nduɔk-odudu,

4ndien afo eyemenere ikwɔ emi abaŋa edidem Babylon; onyuŋ ɔdɔhɔ ete,

5Anam didie andituk oro atak! obio gold atak! Jehovah omobuŋ esaŋ mme anam-idiɔk, ye mmɔnyɔ mbɔŋ,

6eke ɔkɔtɔde mme obio ke ikpahesit, osuk ɔtɔtɔ, idopke, onyuŋ akande mme idut ke iyaresit, osuk ɔkɔbɔ, inyuŋ itreke.

7Ofuri ekondo ke ana suŋ, ɔduɔk odudu; mmɔ esio mkpo idara.

8Mme cypress ŋko edara ebaŋa fi, ye mme cedar Lebanon ŋko, ete, “Ke emi afo ɔmɔduɔ, baba owo kiet eke ekpide nnyin ididɔkke aba itiene nnyin.”

9Obio ekpo ke idak otime abaŋa fi, ɔbiɔŋɔre ke ini afo edide: enye edemere mbukpo ɔnɔ fi, kpa kpukpru ikpɔ owo ererimbot; anam kpukpru ndidem ererimbot edaha ke ebekpo mmɔ eda.

10Kpukpru mmɔ eyeyere, enyuŋ edɔhɔ fi, ete, “Emie afo ŋko amakabare mfum-mfum kpa nte nnyin, afo omonyuŋ ebiet nnyin?”

11Emeda ubɔŋ fo esuhɔre ke obio ekpo, uyom mme harp fo: emebri fi ndɔŋ ke idak, utuŋ onyuŋ ofuk fi ke idem.

12Ŋwan ima ɔfiɔŋ, eyen usiere, afo anam didie oto ke enyɔŋ ɔduɔ! Emekpi fi eduɔk ke isɔŋ, kpa afo emi ɔkɔsɔŋde akan mme idut.

13Ndien afo ɔkɔdɔhɔ ke esit fo, ete, “Nyedɔk ke enyɔŋ, nyemenere ebekpo mi nnim ke enyɔŋ ŋkan ntantafiɔŋ Abasi: nnyuŋ ntie ke obot emi mmɔ esopde esop, ke edem edere-edere:

14nyedɔk ŋkan ŋkokoŋo mbubit enyɔŋ; nyenim idem mi nte Ata Edikoŋ.”

15Edi eyesuhɔre fi ke obio ekpo tutu osim edem obube.

16Mmɔ eke edikutde fi eyewuk enyin ese fi, enyuŋ etim ekere fi, ete, “Nte edi owo emi eketimere ererimbot, okonyuŋ anam mme idut enyek idem;

17anam ekondo akabare edi wilderness, onyuŋ owuri mme obio esie; inyuŋ isanake mbuot ekɔŋ esie iyak eka edem mmɔ?”

18Kpukpru ndidem mme idut, kpukpru mmɔ, ena ke ubɔŋ, kiet kiet ke ufɔk mmɔ:

19edi emesio fi ke udi fo eduɔk, nte ŋkɔk eto eke etopde eduɔk, ɔfuhɔ mme ɔduɔŋɔ obom, kpa mmɔ emi ekimde mmɔ ke ofut, emi esuhɔrede esim ke mme itiat obube; nte okpo eke edigide ke ukot.

20Afo ududianake ye mmɔ ke udi, koro afo ebiatde isɔŋ fo, onyuŋ owotde ikɔt fo: idikotke enyiŋ ubon mme oburobut owo ke nsinsi.

21Mbufo etim mkpa afai enɔ nditɔ esie, ebaŋa mme idiɔk ido mme ete mmɔ; ekuyak mmɔ edaha ke enyɔŋ eda ererimbot enyene, enyuŋ ebɔp obio eyɔhɔ ke iso isɔŋ.

22Jehovah mme udim onyuŋ ɔdɔhɔ, ete, Nyedaha ke enyɔŋ nnam ikɔ ye mmɔ, nyenyuŋ nsibe enyiŋ, ye nsuhɔ, ye eyen, ye ubon, ke Babylon mfep.

23Uyo Jehovah edi emi. Nyenyuŋ nnim enye ke se ebiɔŋ adade enyene, ye ke mkpɔdiɔhɔ-mmɔŋ: nnyuŋ nda ifiet nsobo ŋkpɔri enye mfep. Uyo Jehovah mme udim edi emi.

24Jehovah mme udim ɔmɔŋwɔŋɔ, ete, Iditreke ndiwɔrɔ kpa nte ŋkekerede; onyuŋ osu kpa nte ŋkaduakde:

25ndinuak Asshur ke isɔŋ emi, ndien nyedigi enye ke enyɔŋ ikpɔ obot mi: ndien ɔkpɔnɔ esie eyekibe mmɔ ke idem efep, mbiomo esie eyenyuŋ obiomore mmɔ ke afara.

26Emi edi uduak emi ekeduakde ebaŋa ofuri ererimbot: emi onyuŋ edi ubɔk emi enyanarede ke enyɔŋ kpukpru mme idut.

27Koro Jehovah mme udim amaduak, ndien anie edinam enye okpu? Enye omonyuŋ anyanare ubɔk esie, ndien anie edinuk enye afiak?

28Ema etiŋ uyo Abasi emi ke isua oro edidem Ahaz akpade.

29O Philistia, kudat esit baba, koro eto oro akamiade fi ɔbuŋɔde: koro ibɔm eyewɔrɔ ke oruŋ uruk-ikɔt, ndien mfri esie eyedi edisak urukikɔt eke efede.

30Ndien ikpan mbon unana eyedia ŋkpɔ, mme ubuene eyenyuŋ esuhɔre ena ke mbuɔtidem; ndien nyewot oruŋ fo ke biɔŋ, ndien enye eyewot nsuhɔ fo.

31Tua, O inua-otop; seme, O obio; Philistia, afo amatara kpukpru: koro nsuŋikaŋ otode ke edere, ndien baba owo eke adianarede iduhe ke otu mme udim-ekɔŋ esie.

32Edibɔrɔ ndien mme isuŋutom mme idut didie? Ete ke Jehovah omowuk Zion, ndien mbon ukut ke otu ikɔt esie ebɔhɔ eka do.