1NDIEN Enye ete mmɔ, Ke akpanikɔ ke ndɔhɔ mbufo Ndusuk owo edu ke otu mmɔ emi edade mi, emi miditabike mkpa tutu mmɔ ekut Ubɔŋ Abasi nte edide ke odudu.
2Ekem ke usen itiokiet ema ekebe, Jesus ada Peter, ye James, ye John, ɔdɔk ke akwa obot ke idem mmɔ ikpɔŋ:
3ndien mbiet Esie ɔkpuhɔre ke iso mmɔ edisine-ŋkpɔ Esie onyuŋ akabare esem afia eti-eti adaŋa nte baba ɔdiɔŋ-ɔfɔŋ kiet ke isɔŋ mikemeke ndinam.
4Ndien Elijah ye Moses ebiɔŋɔ mmɔ ke iso: mmɔ enyuŋ eneme nneme ye Jesus.
5Ndien Peter ɔbɔrɔ Jesus ete, Rabbi, ɔfɔn nnyin ndidu mi: yak nnyin inyuŋ ibɔp ataya ita: kiet enyene Fi, kiet enyene Moses kiet onyuŋ enyene Elijah.
6Koro enye mifiɔkke se ɔkpɔbɔrɔde: koro akwa ndik omumde mmɔ.
7Ndien ikpa enyɔŋ edi edifuk mmɔ; uyo onyuŋ oto ke ikpa-enyɔŋ ɔwɔrɔ ete, Emi edi edima Eyen Mi: ekop uyo Esie.
8Ndien idaha oro, ke ini mmɔ esuande enyin ese, mmɔ ikwe owo aba ye mmɔ, ke mibɔhɔke Jesus ikpɔŋ.
9Ndien nte mmɔ etode ke obot esuhɔre, Jesus owuk mmɔ ete, ekutiŋ se ekekutde enɔ baba owo kiet, ibɔhɔke ke ini eke Eyen Owo edisetde ke mkpa.
10Ndien mmɔ emum ikɔ oro ekama, enyuŋ ebup kiet eken se eriset ke mkpa oro ɔkpɔwɔrɔde.
11Mmɔ enyuŋ ebup Enye ete, Mme scribe edɔhɔ ete, Elijah enyene ndibem iso ndi.
12Enye ɔdɔhɔ mmɔ ete, Ke akpanikɔ Elijah ke ebem iso edi edidiɔŋ kpukpru ŋkpɔ: edi ekanam didie ewet ebaŋa Eyen Owo ete, Enye eyekut ediwak ukut, idinyuŋ idaha Enye ikɔm ŋkpɔ?
13Edi ndɔhɔ mbufo nte Elijah ededi ama, mmɔ ema enyuŋ enam ye enye se mmɔ emade, kpa nte ewetde ebaŋa enye.
14Ekem ke ini mmɔ esimde mbet, mmɔ ekut akamba otu owo nte ekande mmɔ ekuk, ye mme scribe nte enenide eneni ye mmɔ.
15Ndien idaha oro, ke ini ofuri otu owo ekutde Enye, idem akpa mmɔ eti-eti, mmɔ enyuŋ efehe etiene Enye ekekɔm Enye.
16Enye obup mmɔ ete, Mbufo eneni nso ye mmɔ?
17Ekem owo kiet ke ufɔt otu oro ɔbɔrɔ Enye ete, Andikpep, ŋkada eyen eren mi, emi enyenede spirit imum, nsɔk Fi;
18ndien ɔtɔ nte spirit oro omumde enye, osio enye ɔduɔk ke isɔŋ, enye onyuŋ osio efot, onyuŋ ata edet, idem onyuŋ ɔdɔdiɔŋ ɔdiɔk enye: mmonyuŋ ndɔhɔ mbet Fo nte ebin enye eduɔk, edi mmɔ ikemeke.
19Edi Jesus ɔbɔrɔ mmɔ ete, O emana emi ananade mbuɔtidem, adaŋa didie ke ndidu ye mbufo? adaŋa didie ke ndime ime ye mbufo? da enye sɔk Mi. Mmɔ eda enye esɔk Jesus.
20Ke ini eyen oro okutde Jesus, idaha oro spirit esiŋere enye idiɔk-idiɔk, enye onyuŋ ɔduɔ ke isɔŋ amiaŋa, osio efot.
21Jesus obup ete esie ete, Ebigi adaŋa didie nte ŋkpɔ emi ɔkɔtɔŋɔ ndinam enye? Ete ɔdɔhɔ ete, Toto ke uyen.
22Spirit onyuŋ awawak ndisio enye nduɔk ke ikaŋ ye ke mmɔŋ, ete iwot enye: edi edieke Afo ekemede ndinam ŋkpɔ, tua nnyin mbɔm, nyuŋ ŋwam nnyin.
23Jesus ɔbɔrɔ enye ete, Edieke ekemede ndibuɔt idem! Kpukpru ŋkpɔ ekeme ndiwɔrɔ nnɔ enye emi ɔbuɔtde idem.
24Idaha oro ete eyen oro ofiori ete, Mmɔbuɔt idem; ŋwam unana mbuɔtidem mi.
25Edi ke ini Jesus okutde nte otu owo ekibede edi, Enye asua ɔnɔ edidehe spirit ete enye. Afo spirit imum ye inan, mmowuk fi, wɔrɔ enye ke idem, kunyuŋ uduk enye ke idem aba.
26Ekem spirit ofiori, onyuŋ esiŋere enye eti-eti, ɔwɔrɔ enye ke idem: ndien eyen oro ɔsuhɔ, tutu ediwak owo edɔhɔ ete, enye ama akpa.
27Edi Jesus omum enye ke ubɔk, emenere enye: ndien enye adaha ke enyuŋ.
28Ekem ke ini Enye odukde ke ufɔk, mbet Esie ebup Enye ke ndibe ete, Nsinam nnyin mikekemeke ndibin enye nduɔk?
29Edi Enye ete mmɔ, Oruk emi ikemeke ndiwɔrɔ, ibɔhɔke ke akam.
30Ekem mmɔ ewɔrɔ do esaŋa ebe ke Galilee; ndien Enye iyomke owo ekededi ɔfiɔk.
31Koro Enye ekpepde mbet Esie ŋkpɔ, ete mmɔ, Emayak Eyen Owo esin mme owo ke ubɔk, ndien mmɔ eyewot Enye; ndien ke ini ewotde Enye, usen ita ema ebe, Enye eyeset.
32Edi mmɔ ifiɔkke se ikɔ oro ɔwɔrɔde, onyuŋ anam mmɔ ndik ndibup Enye.
33Ekem mmɔ edi ke Capernaum; ndien ke ini Enye odude ke ufɔk, Enye obup mmɔ ete, Mbufo ekeneni nso ke usuŋ?
34Edi mmɔ edodop; koro ke usuŋ mmɔ ekeneni ye kiet eken, ete, mme anie ke otu mme imɔ okpon akan,
35Ndien Enye etetie, okot mbet duopeba edi, onyuŋ ɔdɔhɔ mmɔ ete, Edieke owo ekededi oyomde ndidi ebe iso, enye enyene ndikpere edem, ndinyuŋ nsaŋa utom nnɔ kpukpru mmɔ eken,
36Ndien Enye ada ekpri eyen ɔwɔŋ onim ke ufɔt mmɔ; onyuŋ emen enye akama ke ubɔk Esie,
37onyuŋ ɔdɔhɔ mmɔ ete, Owo ekededi eke adarade kiet ke otu oruk ŋkpri nditɔwɔŋ emi ke enyiŋ Mi adara Mi: ndien owo ekededi eke adarade Mi, idige Ami ke adadara, edi Enye emi ɔkɔdɔŋde Mi.
38John ete Enye, Andikpep, nnyin ikokut owo ebinde mme demon ɔduɔk ke enyiŋ Fo, nnyin inyuŋ ikpan enye, koro enye misaŋake ye nnyin.
39Edi Jesus ete, Ekukpan enye: koro baba owo kiet iduhe eke anamde utom odudu ke enyiŋ Mi, edinyuŋ ekemede ndisɔp inua ntiŋ idiɔk ndian Mi.
40Koro owo eke mibiɔŋɔke nnyin adada ye nnyin.
41Koro owo ekededi eke edinɔde mbufo cup mmɔŋ eŋwɔŋ ke ntak enyiŋ Mi, koro mbufo enyenede Christ, ke akpanikɔ ke ndɔhɔ mbufo, enye iditreke tre ndibɔ utip esie.
42Ndien owo ekededi eke edisinde kiet ke otu ŋkpri nditɔwɔŋ emi enimde ke akpanikɔ ɔduɔ, ɔfɔn akan ye enye nte ekpadade akwa itiat ukɔk-ŋkpɔ ekɔŋɔ enye ke itɔŋ, enyuŋ etop enye eduɔk ke inyaŋ.
43Ndien edieke ubɔk fo esinde fi ɔduɔ, sibe enye fep:
44ɔfɔn fi ndiduk ke uwem ye unan akan ndikpenyene ubɔk iba nduk ke hell ke nsisi ikaŋ.
45Onyuŋ edieke ukot fo esinde fi ɔduɔ, sibe enye fep:
46ɔfɔn fi ndidi mbuŋɔ nduk ke uwem akan ndikpenyene ukot iba, ndien eduɔk fi ke hell.
47Onyuŋ edieke enyin fo esinde fi ɔduɔ, wubere enye duɔk: ɔfɔn fi ndida enyin kiet nduk ke Obio Ubɔŋ Abasi akan ndikpenyene enyin iba, ndien eduɔk fi ke hell;
48ke ɔtɔ eke ndɔŋ mmɔ mikpaha, ikaŋ minyuŋ inimeke.
49Koro eyetuk kpukpru owo ikaŋ, nte etukde uwa inuŋ.
50Inuŋ ɔfɔn: edi inuŋ ama akabare adaba, mbufo edida nso enam enye enem? Enyene inuŋ ke esit mbufo, enyuŋ etie ke emem ye kiet eken.
Who We AreWhat We EelieveWhat We Do
2025 by iamachristian.org,Inc All rights reserved.
