2 NDIDEM 21 - Efik Old Bible With Sectional Headings

Manasseh Akara ke Judah

1MANASSEH ekedi eyen isua duopeba ke ini enye adade ubɔŋ, ndien enye akara nte edidem ke Jerualem ke isua aba ye efut.

2Enyiŋ eka esie onyuŋ ekere Hephzi-bah. Ndien enye anam idiɔk ke iso Jehovah, ekem ye mbubiam mme idut oro Jehovah okosiode efep ke iso nditɔ Israel.

3Koro enye ɔtɔŋɔde ntak ɔbɔp mme edikoŋ ebiet oro Hezekiah ete esie okowuride; onyuŋ anam itie-uwa ɔnɔ Baal, onyuŋ anam edisɔi ŋkpɔ Asherah, kpa nte Ahab edidem Israel akanamde; onyuŋ atuak ibuot ɔnɔ ofuri udim-enyɔŋ, onyuŋ anam ŋkpɔ mmɔ.

4Enye onyuŋ anam itie-uwa ke ufɔk Jehovah, emi Jehovah ɔkɔdɔhɔde, ete, Ke Jerusalem ke ndinim enyiŋ mi.

5Ntre ke enye anam itie-uwa ɔnɔ ofuri udim-enyɔŋ ke esien mbiba ke ufɔk Jehovah.

6Enye onyuŋ anam eyen esie ebe oduk ke ikaŋ, onyuŋ ebre idiɔŋ ikpa-enyɔŋ, ye idiɔŋ urukikɔt, onyuŋ onim mme ebre-idiɔŋ ekpo, ye mme ɔfiɔkŋpɔ owo: enye awak ndinam se idiɔkde ke iso Jehovah, onyuŋ ayat enye esit,

7Onyuŋ ada edisɔi ŋkpɔ Asherah oro enye akanamde, onim ke ufɔk oro Jehovah ɔkɔdɔhɔde David ye Solomon eyen esie, ete, Nyenim enyiŋ mi ke nsinsi ke ufɔk emi, ye ke Jerusalem emi mmekde ke otu kpukpru esien Israel.

8Ndien nditɔŋɔke aba ntak mmen ikpat Israel mfep ke isɔŋ emi ŋkɔnɔde mme ete mmɔ; ke mmɔ ema etim enam kpukpru se ŋketemede mmɔ.

9Edi mmɔ ikekopke: ndien Manasseh esin mmɔ ewaha eka ekenam idiɔk ekan mme idut oro Jehovah okosobode ke iso nditɔ Israel efep.

10Ndien Jehovah ebe ke inua ikɔt esie mme prophet etiŋ ikɔ, ete,

11Koro Manasseh, edidem Judah, akanamde mbubiam ŋkpɔ emi, onyuŋ ɔdiɔkde akan kpukpru se mme Amorite oro ekebemde enye iso ekenamde, onyuŋ esin Judah ediɔk ke nsu-nsu abasi esie:

12Mmɔdo ntem ke Jehovah Abasi Israel ɔdɔhɔ, ete, Sese, ami mmɔŋ nda idiɔk-ŋkpɔ ntiene Jerusalem ye Judah emi utɔŋ mbiba ediduatde kpukpru owo eke ekopde.

13Nyenyuŋ nda uruk Samaria, ye plummet ufɔk Ahab nnyanare ke Jerusalem: nyenyuŋ ŋkwɔhɔre Jerusalem, nte owo ɔkwɔhɔre usan, ke ɔkwɔhɔre, onyuŋ akabare okubi.

14Nyenyuŋ mmen ubak udeme mi emi ɔsuhɔde, nduɔk, nnyuŋ nda mmɔ nsin mme asua mmɔ ke ubɔk: ndien mmɔ eyedi se kpukpru mme asua mmɔ ebumede edia;

15koro mmɔ enamde idiɔk ke iso mi, enyuŋ eyatde mi esit, ɔtɔŋɔde ke usen nte mme ete mmɔ eketode ke Egypt ewɔŋɔ, tutu osim mfin emi.

16Ndien ŋko Manasseh ɔkɔduɔk iyip ata ediwak owo eke miduehe isop, tutu ɔyɔhɔ ke Jerusalem, ɔtɔŋɔde ke utit emi tutu osim utit oko; ɔkɔrɔ ye mme idiɔk ido esie oro enye esinde Judah enam, ke erinam idiɔk ke iso Jehovah.

17Ndien ama edi ikɔ Manasseh emi esuhɔde, ye kpukpru se enye akanamde, ye mme idiɔk ido esie emi enye akanamde, nte ikewetke mmɔ isin ke ŋwed ikɔ eyo ndidem Judah?

18Ekem Manasseh ɔsuhɔre ana ye mme ete esie ede, onyuŋ ɔbuhɔ ke iŋwaŋ esa ufɔk esie, ke iŋwaŋ esa Uzza. Ndien Amon eyen esie ada ubɔŋ ke itie esie.

19Amon osim isua edip ye iba ke ini enye adade ubɔŋ; ndien enye edi edidem ke Jerusalem ke isua iba. Ndien enyiŋ eka esie ekere Meshullemeth, eyen Haruz a Jotbah.

20Enye onyuŋ anam idiɔk ke iso Jehovah, kpasuk nte Manasseh ete esie akanamde.

21Enye onyuŋ asaŋa ke kpukpru usuŋ emi ete esie akasaŋade, onyuŋ anam ŋkpɔ nsu-nsu abasi oro ete esie akanamde ŋkpɔ mmɔ, onyuŋ atuak ibuot ɔnɔ mmɔ:

22onyuŋ ɔkpɔŋ Jehovah Abasi mme ete esie; inyuŋ isaŋake ke usuŋ Jehovah.

23Ndien ikɔt Amon eduk odu ebaŋa enye, enyuŋ ewot edidem ke ufɔk esiemɔ.

24Ekem mbio-obio ewot kpukpru mmɔ oro ekedukde odu ebaŋa edidem Amon. Mbio-obio enyuŋ eda Josiah eyen esie, enim ke edidem ke itie esie.

25Ndien ama edi ikɔ Amon emi esuhɔde, emi enye akanamde, nte ikewetke mmɔ isin ke ŋwed ikɔ eyo ndidem Judah?

26Ndien mmɔ ebuk enye ke udi esie ke iŋwaŋ esa Uzza: ndien Josiah eyen esie ada ubɔŋ ke itie esie.