NUMBERS 29 - Efik Old Bible With Sectional Headings

Mme Uwa Obufa Isua

1NDIEN ŋko ke ɔyɔhɔ ɔfiɔŋ itiaba, ke akpa usen ɔfiɔŋ, ke mbufo edisop edisana esop; ekunam baba ubɔk-utom kiet: mbufo enim enye ke usen erifuri ukorowo.

2Ndien mbufo ewa edifɔp uwa enɔ Jehovah ke edinem utebe; abak enaŋ kiet, ye okukim kiet, ye nditɔ erɔŋ isua kiet kiet itiaba, eke efɔnde ema:

3ye inuak-udia mmɔ ke omer eti ndom-uyo ita, eke abuahade ye aran, ke enaŋ omer iba ke okukim,

4ewa omer kierakiet ye eyen erɔŋ kiet, ke ofuri nditɔ erɔŋ mbitiaba oro:

5ye okpo ebot kiet ke uwa idiɔk ido, eke edade esio isop mbufo:

6ekɔrɔ ke edifɔp uwa, ye inuak-udia esie, ye ediŋwɔŋ uwa mmɔ, nte ido mmɔ asaŋade, ke edinem utebe, uwa ikaŋ Jehovah.

7Ndien ke ɔyɔhɔ usen duop, ke ɔyɔhɔ ɔfiɔŋ itiaba emi, ke mbufo edisop edisana esop; ndien mbufo etuk esit mbufo: ekunam baba ubɔk-utom kiet ke esit:

8edi mbufo ewa edifɔp uwa enɔ Jehovah ke edinem utebe: ke abak enaŋ kiet, ye okukim kiet, ye nditɔ erɔŋ isua kiet kiet itiaba; mbufo eyom eke efɔnde ema:

9ye inuak-udia mmɔ ke eti mdom-uyo eke abuahade ye aran, omer ita esaŋa ke enaŋ kiet, omer iba ke okukim,

10ewa omer kierakiet ye eyen erɔŋ kiet, ke ofuri nditɔ erɔŋ mbitiaba oro:

11ye okpo ebot kiet ke uwa idiɔk ido: ekɔrɔ ke uwa idiɔk ido usio-isop, ye nsinsi edifɔp uwa, ye inuak-udia esie, ye ediŋwɔŋ uwa mmɔ.

12Ndien ke ɔyɔhɔ usen efut, ke ɔyɔhɔ ɔfiɔŋ itiaba, ke mbufo edisop edisana esop; ekunam baba ubɔk-utom kiet; edi enim usɔrɔ enɔ Jehovah ke ofuri usen itiaba:

13ndien mbufo ewa edifɔp uwa, kpa uwa ikaŋ, enɔ Jehovah, edinem utebe; ke abak enaŋ duopeta, ye okukim iba, ye nditɔ erɔŋ isua kiet kiet duopenaŋ; yak mmɔ efɔn ema:

14ye inuak-udia mmɔ, ke eti ndom-uyo emi aran esinede ke esit, omer ita esaŋa ye enaŋ kiet kiet, ke ofuri enaŋ duopeta oro, omer iba ke okukim kiet kiet, ke okukim mbiba oro,

15ewa omer kiet kiet ye eyen erɔŋ kiet ke ofuri nditɔ erɔŋ duopenaŋ oro:

16ye okpo ebot kiet ke uwa idiɔk ido; ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

17Ndien ke udiana-akpa usen (mbufo enyuŋ ewa) abak enaŋ duopeba, ye okikum iba, ye nditɔ erɔŋ isua kiet kiet duopanaŋ, eke efɔnde ema:

18ye inuak-udia mmɔ, ye ndiŋwɔŋ uwa, mmɔ, ke eke enaŋ, ye ke eke okukim, ye ke eke nditɔ erɔŋ, ke adaŋa ibat mmɔ, nte ido mmɔ asaŋade:

19ye okpo ebot kiet ke uwa idiɔk ido; ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa mmɔ.

20Ndien ke ɔyɔhɔ usen ita, (mbufo enyuŋ ewa) enaŋ duopekiet, ye okukim iba, ye nditɔ erɔŋ isua kiet kiet duopenaŋ, eke efɔnde ema:

21ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke eke nditɔ erɔŋ,

22ke adaŋa ibat mmɔ, ye nte ido mmɔ asaŋade: ye okpo ebot kiet ke uwa idiɔk ido, ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

23Ndien ke ɔyɔhɔ usen inaŋ, (mbufo ewa) enaŋ duop ye okukim iba, ye nditɔ erɔŋ isua kiet kiet duopenaŋ, eke efɔnde ema:

24ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke eke nditɔ erɔŋ, ke adaŋa ibat mmɔ, ye nte ido mmɔ asaŋade: ye okpo ebot kiet, ke ibat mmɔ, nte ido mmɔ asaŋade:

25ye okpo ebot kiet, ke uwa idiɔk ido: ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

26Ndien ke ɔyɔhɔ usen ition, (mbufo ewa) enaŋ usukkiet, ye okukim iba, ye nditɔ erɔŋ isua kiet kiet duopenaŋ, eke efɔnde ema:

27ye inuak-udia mmɔ, ye ediŋwɔŋ uwa mmɔ, ke eke enaŋ, ye eke okukim, ye ke eke nditɔ erɔŋ, ke adaŋa ibat mmɔ, ye nte ido mmɔ asaŋade:

28ye okpo ebot kiet ke uwa idiɔk ido; ekɔrɔ ke nsinsi edifɔp uwa, ye inuak-udia esie, ye endiŋwɔŋ uwa esie.

29Ndien ke ɔyɔhɔ usen itiokiet, (mbufo ewa) enaŋ itiaita, ye okukim iba, ye nditɔ erɔŋ isua kiet kiet duopenaŋ, eke efɔnde ema:

30ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke eke nditɔ erɔŋ, ke adaŋa ibat mmɔ, ye nte ido mmɔ asaŋade:

31ye okpo ebot kiet, ke uwa idiɔk ido; ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

32Ndien ke ɔyɔhɔ usen itiaba, (mbufo ewa) enaŋ itiaba, ye okukim iba ye nditɔ erɔŋ isua kiet kiet duopenaŋ, eke efɔnde ema:

33ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke eke nditɔ erɔŋ, ke adaŋa ibat mmɔ, ye nte ido mmɔ asaŋade:

34ye okpo ebot kiet ke uwa idiɔk ido ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

35Ke ɔyɔhɔ usen itiaita, mbufo enim usɔrɔ: ekunam baba ubɔk-utom kiet:

36mbufo enyuŋ ewa edifɔp uwa, kpa uwa ikaŋ, ke edinem utebe, enɔ Jehovah: abak enaŋ kiet, ye okukim kiet, ye nditɔ erɔŋ isua kiet kiet itiaba, eke efɔnde ema:

37ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke nditɔ erɔŋ, ke adaŋa ibat mmɔ, ye nte ido edide:

38ye okpo ebot uwa idiɔk ido kiet; ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

39Mbufo enam ŋkpɔ emi enɔ Jehovah ke ini emi edoride enɔ mbufo, ekɔrɔ ke mme akaŋa mbufo, ye ke uwa ima mbufo, ye ke edifɔp uwa mbufo, ye ke inuak-udia mbufo, ye ke ediŋwɔŋ uwa mbufo, ye ke mme uwa emem mbufo.

40Ndien Moses emen kpukpru etiŋ ɔnɔ nditɔ Israel, kpa nte Jehovah eketemede Moses.