1EKEM adaŋemi mmɔ ema ekema kpukpru ŋkpɔ emi, ofuri Israel eke edude do, ewɔŋɔ eka ke mme obio Judah, ekenuak mme adaha, enyuŋ esiak mme eto-mkpe, enyuŋ ewuri mme edikoŋ ebiet, ye mme itie-uwa, efep ke ofuri Judah, ye Benjamin, ye Ephraim, ye Manasseh, tutu ekure ema. Ndien kpukpru nditɔ Israel efiak kiet kiet ke ebiet esie, ke mme obio mmɔ.
2Ekem Hezekiah otim ŋka mme oku ye eke mme Levite onim ke ŋka mmɔ, kpukpru mme oku ye mme Levite nte utom mmɔ edide, ke eke edifɔp uwa, ye uwa emem, ndinam ŋkpɔ, nnyuŋ ŋkɔm, nnyuŋ ŋkwɔ itoro ke inua-otop nna Jehovah;
3ye udeme eke esiode ke inyene edidem enɔ ke edifɔp uwa, kpa edifɔp uwa usenubɔk ye eke mbubreyo, ye edifɔp uwa mme sabbath, ye eke mbufa ɔfiɔŋ, ye eke mme usɔrɔ emi ekedoride, kpa nte ekewetde ke ŋwed mbet Jehovah.
4Enye onyuŋ ɔdɔhɔ mmɔ eke eduŋde ke Jerusalem, ete enɔ udeme mme oku ye eke mme Levite, man mmɔ esɔŋɔ emum ido Jehovah ekama.
5Ekem adaŋemi ikɔ oro ɔwɔrɔde, nditɔ Israel eda ediwak akpa ibokpot, ye wine, ye aran, ye aran-ɔkwɔk, ye kpukpru mbuŋwum iŋwaŋ edi; mmɔ enyuŋ eda ɔyɔhɔ ubak kpukpru ŋkpɔ duop edi ediwak.
6Ndien ama edi nditɔ Israel ye eke Judah eke eduŋde ke mme obio Judah, mmɔ ŋko esio ɔyɔhɔ ubak duop ke enaŋ, ye ke erɔŋ, ye ɔyɔhɔ ubak duop ke edisana ŋkpɔ eke enimde enɔ Jehovah Abasi mmɔ, eda mmɔ edi edikubi otu-otu.
7Mmɔ etɔŋɔ ndikubi otu ke ɔyɔhɔ ɔfiɔŋ ita, ndien ema ke ɔyɔhɔ ɔfiɔŋ itiaba.
8Ekem adaŋemi Hezekiah ye mbɔŋ edide edikut mme otu oro, mmɔ ekɔm Jehovah ye ikɔt esie Israel.
9Ndien Hezekiah obup mme oku ye mme Levite ikɔ mme otu oro.
10Ndien Azariah ɔbɔŋ oku, eyen ufɔk Zadok, ɔbɔrɔ enye, ete, Toto nte mmɔ eketɔŋɔ ndida enɔ nduk ke ufɔk Jehovah, nnyin idadia iyuhɔ, inyuŋ isuhɔ ediwak: koro Jehovah ɔdiɔŋde ikɔt esie; ndien se isuhɔde edi otu emi.
11Ndien Hezekiah ɔdɔhɔ, ete etim ubet ke ufɔk Jehovah; ndien mmɔ etim, ndien eda enɔ oro,
12ye ɔyɔhɔ mbak duop, ye mme edisana ŋkpɔ, eduk ke esit kiet: ndien Conaniah Levite edi etubom mmɔ, Shimei eyen-ete esie onyuŋ edi udiana.
13Ndien Jehiel, ye Azaziah, ye Nahath, ye Asahel, ye Jerimoth, ye Jozabad, ye Eliel, ye Ismachiah, ye Mahath, ye Benaiah, etiene Conaniah ye Shimei eyen-ete esie, edi mme ese-utom, kpa nte Hezekiah edidem, ye Azariah etubom ufɔk Abasi okowukde.
14Ndien Kore eyen Imnah Levite kiet, etie-usuŋ ke edem usiaha-utin, edi etubom ŋkpɔ emi enɔde Abasi ke ima esit, man edeme enɔ Jehovah, ye ata edisana ŋkpɔ.
15Ndien Eden, ye Miniamin, ye Jeshua, ye Shemaiah, ye Amariah, ye Shecaniah esaŋa utom enɔ enye ke obio mme oku, man enye ada akpanikɔ edeme ŋkpɔ ɔnɔ nditɔ-ete esie, ŋkani owo, ye nditɔwɔŋ, ke ŋka mmɔ:
16adian ye ŋwed enyiŋ irenowo mmɔ, ɔtɔŋɔde ye eyen isua ita, ye mmɔ eke ebede oro, kpukpru mmɔ eke edukde ke ufɔk Jehovah, nte udeme kpukpru usen asaŋade, ke utom mmɔ, ke idaha mmɔ, ye ke ŋka mmɔ;
17ye ŋwed emana mme oku ŋko, nte ufɔk mme ete mmɔ esaŋade, ye mme Levite, ɔtɔŋɔde ke owo isua edip, ye mmɔ eke ebede oro, ke idaha mmɔ, ye ke ŋka mmɔ;
18ye ŋwed emana kpukpru ŋkpri nditɔwɔŋ mmɔ, ye iban mmɔ, ye nditɔ-iren mmɔ, ye nditɔ-iban mmɔ, ke ofuri esop: koro ke akpanikɔ mmɔ ke mmɔ etim ekama edisana ŋkpɔ:
19ndien nditɔ Aaron mma oku ke iŋwaŋ mben obio mmɔ, ke obio, ke obio, enyene owo eke asiakde mmɔ enyiŋ, ete eda udeme enɔ kpukpru iren-owo ke otu mme oku, ye kpukpru owo eke ewetde mmɔ esin ke ŋwed emana ke otu mme Levite.
20Ndien Hezekiah anam ntem ke ofuri Judah, onyuŋ anam se ifɔnde, inyuŋ inende, inyuŋ idide akpanikɔ, ke iso Jehovah Abasi esie.
21Ye ke kpukpru se enye ɔtɔŋɔde ndinam ke utom ufɔk Abasi, ye ke mme ewuhɔ, ye ke mbet, ke eritiene Abasi esie, enye anam ke ofuri esit esie, onyuŋ okut unen.
Who We AreWhat We EelieveWhat We Do
2025 by iamachristian.org,Inc All rights reserved.
