DEUTERONOMY 11 - Efik Old Bible With Sectional Headings

Utip Emi Odude ke Owo Ndikop Item

1MA ndien Jehovah Abasi fo, nyuŋ tiŋ enyin ke item esie ye mme ewuhɔ esie, ye mme item esie, ye mbet esie, kpukpru usen. Mbufo efiɔk ndien mfin emi:

2koro mendɔhɔke nditɔ mbufo emi mikɔfiɔkke, emi mikonyuŋ ikwe eritunɔ emi Jehovah Abasi mbufo ɔkɔtunɔde, ye ubom esie, ye ɔkpɔsɔŋ ubɔk esie,

3ye edimenere ubɔk esie, ye mme idiɔŋɔ esie, ye se enye akanamde Pharaoh edidem Egypt, ye ofuri isɔŋ esie, ke ufɔt Egypt;

4ye se enye akanamde mbon ekɔŋ Egypt, ye mme horse mmɔ, ye mme chariot mmɔ; koro enye akanamde mmɔŋ Ididuot Inyanŋ ɔtɔ ofuk mmɔ, nte mmɔ ebinede mbufo, Jehovah onyuŋ osobo mmɔ tutu osim mfin emi;

5ye se enye akanamde mbufo ke wilderness, tutu mbufo edisim ke ebiet emi;

6ye se enye akanamde Dathan ye Abiram, nditɔ Eliab, eyen Reuben: emi isɔŋ akaŋwaŋade inua esie emen, ye ufɔk mmɔ, ye tent mmɔ, ye kpukpru se mmɔ enyenede, ke ufɔt ofuri Israel:

7koro enyin mbufo ema ekut kpukpru ikpɔ ŋkpɔ emi Jehovah akanamde.

8Mbufo enim ndien kpukpru mme ewuhɔ emi ami ŋwukde mbufo mfin emi, man mbufo esɔŋɔ, enyuŋ eduk ekeda isɔŋ emi mbufo eyomde ndibe ŋkada enye nnyene;

9man mme usen mbufo enyuŋ ebigi ke isɔŋ emi Jehovah ɔkɔŋwɔŋɔde ɔnɔ mme ete mbufo, ete inɔ mmɔ ye nditɔ mmɔ, kpa isɔŋ emi ɔfiɔrɔde mmɔŋ-eba ye aran-ɔkwɔk.

10Koro isɔŋ emi afo akade do ndida enye nnyene, mibietke isɔŋ Egypt, emi afo okotode ke esit, emi afo ɔkɔtɔde mkpasip fo, onyuŋ adade ukot fo ɔnɔ enye mmɔŋ, nte ebresien:

11edi isɔŋ emi mbufo ebede eka do ndida enye nnyene, edi isɔŋ obot ye itihere, emi ɔŋwɔŋde mmɔŋ edim emi otode ke enyɔŋ:

12isɔŋ emi Jehovah Abasi fo akamade: Jehovah Abasi fo onyuŋ etiŋ enyin ke esit kpukpru ini, ɔtɔŋɔde ke eritɔŋɔ isua, tutu osim utit isua.

13Ndien ama ekem, edieke mbufo edikopde kpukpru mbet mi, emi ami mbetde mbufo mfin emi, enyuŋ ema Jehovah Abasi mbufo, enyuŋ enam ŋkpɔ esie ke ofuri esit mbufo ye ke ofuri ukpɔŋ mbufo,

14ndien nyenɔ edim isɔŋ mbufo ke ekem ini, akpa edim ye ekpere-edem, man afo obon ibokpot fo, ye obufa wine fo, ye aran fo.

15Nyenyuŋ nnam mbiet otibe ke iŋwaŋ fo ɔnɔ ufene fo, ndien afo eyedia ŋkpɔ ɔyuhɔ.

16Mbufo ekpeme idem, mbak esit edibiaŋa mbufo, mbufo edinyuŋ ekabare enam ido mme abasi eŋwen, enyuŋ enuhɔ enɔ mmɔ;

17ndien Jehovah edifiop esit ye mbufo, enye onyuŋ omum ikpa-enyɔŋ, akpan edim okudi, onyuŋ akpan isɔŋ okuŋwum mfri esie; mbak edinyuŋ ewara ndisobo mbufo efep ke eti isɔŋ emi Jehovah ɔnɔde mbufo.

18Mbufo eda ndien ikɔ emi esin ke esit mbufo, ye ke ukpɔŋ mbufo, enyuŋ etebe mmɔ edian ke ubɔk mbufo nte idiɔŋɔ, yak mmɔ enyuŋ ena mbufo ke ufɔt enyin ke ŋkpɔ ɔkpɔ-iso.

19Mbufo enyuŋ eda mmɔ eteme nditɔ mbufo, enyuŋ edɔhɔ ebaŋa mmɔ ke ini afo etiede ke ufɔk fo, ye ke asaŋade ke usuŋ, ye ke anade ke isɔŋ, ye ke edemerede ke idap.

20Nyuŋ wet mmɔ ke obubɔk enyin-usuŋ ufɔk fo, ye ke itim fo:

21man usen mbufo, ye usen nditɔ mbufo ekpebigi ke isɔŋ emi Jehovah ɔkɔŋwɔŋɔde ɔnɔ mme ete mbufo, ete iyenɔ mmɔ, adaŋa ini nte enyɔŋ ofukde isɔŋ.

22Koro edieke mbufo edikpemede kpukpru mme ewuhɔ emi ami ŋwukde mbufo, enyuŋ enim mmɔ, enyuŋ ema Jehovah Abasi mbufo, enyuŋ esaŋa ke kpukpru usuŋ esie, enyuŋ eyire ye enye;

23ndien Jehovah eyebin kpukpru mme idut emi ke iso mbufo efep, mbufo eyenyuŋ eda mme idut emi ekponide enyuŋ esɔŋɔde ekan mbufo, enyene.

24Kpukpru ebiet eke ikpat ukot mbufo edidigide ke esit, eyenyene mbufo: adaŋa mbufo eyetɔŋɔ ke wilderness, ye ke Lebanon, ye ke akpa, idem akpa Euphrates, tutu akatuak ke inyaŋ ke edem usop-utin.

25Baba ofuri owo kiet idikemeke ndida ke iso mbufo: Jehovah Abasi mbufo eyenam kpukpru mme idut emi mbufo edisaŋade ke esit, ebak mbufo, enyuŋ edikhe mbufo, kpa nte enye ɔkɔdɔhɔde mbufo.

26Sese mfin emi mmada ufɔn ye isuŋi nnim mbufo ke iso;

27ufɔn, edieke mbufo edikopde kpukpru mme ewuhɔ Jehovah Abasi mbufo emi ami ŋwukde mbufo mfin emi:

28ye isuŋi, edieke mbufo midikopde ewuhɔ Jehovah Abasi mbufo, edi ewaha ekpɔŋ usuŋ emi ami ntemede mbufo mfin emi, enyuŋ etiene mme abasi efen, eke mbufo mikɔfiɔkke.

29Ndien ama ekem, adaŋemi Jehovah Abasi fo edidade fi oduk ke isɔŋ emi afo akade do ndida enye nnyene, dori ufɔn emi ke obot a Gerizim, nyuŋ dori isuŋi obot Ebal.

30Nte mmɔ iduhe ke edem Jordan oko, ke edem usop-utin, ke isɔŋ mme Canaanite emi eduŋde ke itihere Jordan, ikem ye Gilgal, ikpere mme terebinth Moreh?

31Koro mbufo eyebe Jordan ekeduk, man eda isɔŋ emi Jehovah Abasi mbufo ɔnɔde mbufo, mbufo eyenyuŋ eda enye enyuŋ eduŋ ke esit.

32Mbufo ekpeme ndien, ndinim kpukpru mme ewuhɔ, ye mme item emi ami nnimde ke iso mbufo mfin emi.