JEREMIAH 4 - Efik Old Bible With Sectional Headings

Ikot Abasi Ɔnɔde Nditɔ Israel Ete Ewɔŋɔde Ekpɔŋ Idiɔk

1JEHOVAH ɔdɔhɔ ete, O Israel, afo ama afiak edi, fiak tiene mi: ama onyuŋ emen ŋkpɔ mbubiam fo ke iso mi efep, afo udusehekede.

2Afo onyuŋ ɔŋwɔŋɔ ete, Ma Jehovah, ke akpanikɔ ye ke ikpe ye ke edinen ido; ndien mme idut eyeda Enye ediɔŋ idem-mmɔ, enyuŋ ebure mbure ke Enye.

3Koro ntem ke Jehovah ɔdɔhɔ mbio Judah ye Jerusalem, ete, Mbufo efuŋ obufa iŋwaŋ ke idem mbufo, ndien ekusuan mkpasip ke ikɔt.

4O mbio Judah, ye mme andiduŋ Jerusalem, mbufo ena mbobi enɔ Jehovah, enyuŋ esibe esit mbufo edut efep: mbak ifiopesit mi ediwɔrɔ nte ikaŋ, onyuŋ ata, ndien baba owo kiet eke onimede iduhe, abaŋa mme idiɔk ido mbufo.

5Mbufo etiŋ ke Judah, enyuŋ ebuk ke Jerusalem, enyuŋ edɔhɔ, enyuŋ efuri ukorowo ke isɔŋ; efiori ɔkpɔsɔŋ, enyuŋ edɔhɔ ete, Mbufo esop idem, ndien yak nnyin iduk ke mme obio ibibene.

6Mbufo emenere banner ke enyɔŋ ke Zion: efeŋe itɔk: ekutuak eda: koro ami mmɔŋ nda idiɔk ye akwa ŋwure ke edem edere ndi.

7Lion oto ke mfuhɔ ikɔt esie ɔdɔk, andisobo mme idut onyuŋ otibi isaŋ; oto ke ebiet esie, ete inim isɔŋ fo ke nsobo; mme mbio fo eyebiara, ndien baba owo kiet eke oduŋde ididuhe.

8Mbufo eda ɔfɔŋ-ikpo ebɔbɔ ke idem ebaŋa ŋkpɔ emi, etuaŋa enyuŋ eseme: koro ifiopesit Jehovah midiwɔŋɔ-kede ikpɔŋ nnyin.

9Jehovah onyuŋ, ɔdɔhɔ, ete, Ama ekem ke usen oro, esit eyeduɔ edidem, esit eyenyuŋ ɔduɔ mbɔŋ; idem eyenyuŋ akpa mme oku, mme prophet eyenyuŋ eyik.

10Ndien ami ndɔhɔ, nte, Ah, Ɔbɔŋ Jehovah! ŋkɔm afo ama abiaŋa mbio-obio emi ye Jerusalem eti-eti, ete, Mbufo eyenyene emem: ndien ofut omosim ukpɔŋ (nnyin).

11Ke ini oro eyedɔhɔ mbio-obio emi ye Jerusalem, ete, Edifiop ofum ŋkokoŋo ebiet ke wilderness ke edi ke usuŋ adiaha oruk mi, idige ndisak, inyuŋ idige ndinam asana;

12ofum eke akande mme mmɔ emi eyesim mi: ke emi ŋko ami nyenɔ uyo ikpe mbaŋa mmɔ.

13Sese, enye eyedɔk nte mbubit enyɔŋ, mme chariot esie eyenyuŋ ebiet oyobio: horse esie esɔp ukot nte ntrukpom.

14Ɔdɔdiɔk ye nnyin koro emesobo nnyin. O Jerusalem, yet esit fo idiɔk-ŋkpɔ fep, man enyaŋa fi. Adaŋa didie ke mme idiɔk ekikere fo ediduŋ fi ke esit?

15Koro uyo otode ke Dan etiŋ onyuŋ oto ke obot Ephraim obuk nnanenyin.

16Mbufo etɔt mme idut; sese, mbufo ekwɔrɔ ebaŋa Jerusalem, ete ke mbon ukuk-obio eto ke anyan idut edi, enyuŋ emenere uyo mmɔ efiori ebaŋa mme obio Judah.

17Kpa nte mme ekpeme-iŋwaŋ, kpa ntre ke mmɔ edikan enye ekuk: koro enye ama ɔsɔŋ ibuot ye ami; Jehovah ɔdɔhɔ.

18Usuŋ fo ye ido fo enam ŋkpɔ emi enɔ fi; emi oto ke idiɔk ido fo, koro enye ododoro, koro osimde fi ke esit.

19Nsia mi! nsia mi! ɔwɔŋ esit mi abiak mi; esit mi eseme ɔnɔ mi; ndidopke uyo, koro, O ukpɔŋ mi, ŋkopke uyo ukorowo ye mkpo ekɔŋ.

20Mmɔ ebuk ŋwure ekɔrɔ ke ŋwure: koro ofuri isɔŋ amabiara: mme tent mi emebiara ke isɔrɔ kiet, mme ikpehe mi emebiara ke idaha kiet.

21Adaŋa didie ke ndikut banner, nnyuŋ ŋkop uyo ukorowo?

22Koro ikɔt mi edide ndisime, mmɔ ifiɔkke mi; mmɔ edi nditeŋ nditɔ, inyuŋ inyeneke ibuot; etim efiɔk ndinam idiɔk, edi ifiɔkke ndinam eti.

23Nse isɔŋ, ndien, sese, isɔŋ edi ikpikpu ye ukpɔk; nse ikpa-enyɔŋ, ndien uŋwana iduhe ke esit.

24Nse ikpɔ obot, ndien sese, mmɔ enyek, kpukpru ŋkpri obot enyuŋ efefum.

25Nse ndien, sese, baba owo kiet iduhe, kpukpru inuen enyɔŋ emenyuŋ edaŋa.

26Nse, ndien, sese, eti iŋwaŋ amakabare edi wilderness, kpukpru obio esie enyuŋ ewure ke iso Jehovah, ye ke iso ata ifiopesit esie.

27Koro ntem ke Jehovah ɔdɔhɔ ete, Ofuri isɔŋ eyebiara; edi ndinamke mma.

28Emi eyesin isɔŋ atua, esin ikpa-enyɔŋ ke enyɔŋ ebire: koro mmɔdɔhɔ, mmaduak, ndien ndituaha mkpɔfiɔk, ndinyuŋ ŋkabakede ŋkpɔŋ enye.

29Uyom mme horse ye eke mme otop-utiga eyesin ofuri obio efeŋe: mmɔ eduk ke mfuhɔ ikɔt, enyuŋ edɔk ke ikpɔ itiat: ekpɔŋ kpukpru obio, baba owo kiet eke oduŋde mmɔ ke esit inyuŋ iduhe.

30Ndien afo andibiara edinam didie? Koro afo eyesine ididuot: koro afo eyeda mbana-ŋkpɔ o-gold abana idem, koro afo adade stibium awai enyin fo: eyenam idem fo eye ikpikpu: mmɔ eke emade fi esin fi, eyeyom uwem fo.

31Koro ŋkopde uyo ebiet aŋwan uman, ubiak ebiet eke ŋwan eke amande akpan eyen, uyo adiaha zion, enye eŋwek, anyan ekaubɔk esie; ete, “Mbɔm mi ndien: koro mme owot-owo esinde ukpɔŋ akpa mi.”