NUMBERS 6 - Efik Old Bible With Sectional Headings

Mme Ewuhɔ Enɔde Mme Nazirite

1NDIEN Jehovah ɔdɔhɔ Moses, ete,

2Dɔhɔ ye nditɔ Israel, nyuŋ tiŋ nɔ mmɔ, ete, Ke adaŋemi eren mme ŋwan edikaŋade ata akaŋa Nazirite, ete ididianare idem esie inɔ Jehovah:

3Yak enye adianare idem esie ke wine ye mmin, okunyuŋ ɔŋwɔŋ vinegar wine, okunyuŋ ɔŋwɔŋ vinegar mmin, okunyuŋ ɔŋwɔŋ se efikde grape enyimi, okunyuŋ adia mbufa grape ye edisat.

4Kpukpru usen eke enye adianarede idem esie, enye okudia baba ofuri ŋkpɔ kiet eke enamde ke vine, edide mkpasip, onyuŋ edide ikpɔk.

5Ofuri ini eke enye akaŋade ete idianare idem esie, akaraŋ okutuk enye ke ibuot; yak enye edi edisana tutu mme usen emi enye adianarede idem esie ɔnɔ Jehovah ekure, onyuŋ ayak idet ibuot esie ɔkɔri.

6Enye okutuk okpo ke ofuri ini emi enye adianarede idem esie ɔnɔ Jehovah.

7Enye okusabare idem esie abaŋa ete esie, mme eka esie, mme eyen-eka esie eren, mme eyen-eka esie aŋwan, ke ini mmɔ ekpade: koro enye akadianarede ibuot esie ɔnɔ Abasi esie.

8Enye edi edisana owo Jehovah ofuri ini emi enye adianarede idem esie.

9Ndien edieke owo akpade ndisi mkpa ke ŋkaŋ esie, enye onyuŋ asabare ibuot eridianare esie; ndien, yak enye okporo idet esie ke usen eke enamde enye asana, ke ɔyɔhɔ usen itiaba ke enye edikporo idet.

10Ndien ekem ke ɔyɔhɔ usen itiaita, yak enye ada mbomo ŋkuku iba, mme nditɔ ibiom iba, ɔsɔk oku, ke enyin-usuŋ efe esop:

11ndien yak oku awa kiet ke uwa idiɔk ido, ye kiet eken ke edifɔp uwa, onyuŋ osio isop ɔnɔ enye: koro enye ama ekedue ke ikɔ akpa-mkpa; ndien anam ibuot esie asana ke usen oro.

12Ndien yak enye adianare mme usen eridianare esie ɔnɔ Jehovah, onyuŋ ada eyen erɔŋ isua kiet edi ke uwa isop: edi mme usen edem etak, koro eridianare esie akabiarade.

13Ndien emi edi ewuhɔ Nazarite, adaŋemi mme usen eridianare esie ekurede: yak eda enye edi ke enyin-usuŋ efe esop:

14ndien enye ada enɔ esie ɔsɔk Jehovah, eyen okukim isua kiet eke ɔfɔnde ama, ke edifɔp uwa, ye uman eyen erɔŋ isua kiet eke ɔfɔnde ama, ke uwa idiɔk ido, ye okukim kiet eke ɔfɔnde ama,

15ke uwa emem, ye akpan uyo eke leaven miduhe, obukpa eti ndom-uyo eke abuahade aran, ye mfefere uyo eyere aran, eke leaven miduhe, ye inuak-udia mmɔ, ye ediŋwɔŋ uwa mmɔ.

16Ndien yak oku ada mmɔ edi ke iso Jehovah, ndien awa uwa idiɔk ido esie, ye edifɔp uwa esie:

17Ndien enye ediwa okukim oro ɔnɔ Jehovah ke uwa emem, ye akpan-uyo oro leaven miduhe: oku onyuŋ awa inuak-udia esie, ye ediŋwɔŋ uwa esie.

18Ndien yak Nazirite oro okporo idet ibuot eridianare esie ke enyin-usuŋ efe esop, onyuŋ ada idet ibuot eridianare esie, esin ke ikaŋ emi odude ke idak uwa emem.

19Ndien yak oku ada afara okukim emi eketemde, ye obukpa uyo kiet eke leaven miduhe efep ke akpan, ye mfefere uyo kiet eke leaven miduhe, ndien emen mmɔ esin Nazirite oro ke ubɔk, ke enye ama okokporo idet eridianare esie:

20ndien yak oku ofuŋ mmɔ ke edifuŋ uwa ke iso Jehovah: emi edi edisana ŋkpɔ oku, ɔkɔrɔ ye ikɔŋesit emi efuŋde, ye afara emi emenerede ke enyɔŋ: ndien ke oro ebede, Nazirite oro emekeme ndiŋwɔŋ wine.

21Emi edi ewuhɔ Nazirite eke akaŋade enɔ esie ɔnɔ Jehovah abaŋa eridianare esie: kpa nte enye akaŋade akaŋa ntre ke enye edinam ke ewuhɔ eridianare esie.

22Ndien Jehovah ɔdɔhɔ Moses, ete, Dɔhɔ Aaron, ye nditɔ esie,

23ete, Ntem ke mbufo edidiɔŋ nditɔ Israel, edɔhɔ mmɔ ete,

24Jehovah akpakam ɔdiɔŋ fi, onyuŋ ekpeme fi;

25Jehovah akam anam iso esie ayama ɔnɔ fi, onyuŋ ɔfɔn ɔnɔ fi;

26Jehovah akam enen iso ye afo, onyuŋ ɔnɔ fi ifure.

27Ntem ke edida enyiŋ mi edori nditɔ Israel ke idem, ndien ami nyefɔn ye mmɔ.