1 NDIDEM 1 - Efik Old Bible With Sectional Headings

Mfina Emi Okodude ke Ufɔk David Kabaŋa Owo Emi Edidide Edidem

1EKEM David edidem akabare edi akani owo esim ediwak isua, ndien mmɔ eda ufuhɔ-ŋkpɔ efuk enye, edi enye ikopde ufiop.

2Ndien ikɔt esie edɔhɔ enye, ete: Yak eyom eyen-aŋwan eke edide eyenɔwɔŋ enɔ edidem ɔbɔŋ mi, man enye ada ke iso edidem, onyuŋ ɔbɔk enye, onyuŋ ana ke ikpanesit fo, man ɔbɔŋ mi edidem okop ufiop.

3Ndien mmɔ eyom ediye eyen-aŋwan ke ofuri adaŋa Israel, ndien ekut Abishag ŋwan a-Shunem, enyuŋ eda enye esɔk edidem.

4Eyen aŋwan oro onyuŋ eye eti-eti, enye Eyen-onyuŋ ɔbɔk edidem, onyuŋ anam ŋkpɔ ɔnɔ enye: edi edidem ifiɔkke enye.

5Ndien Adonijah eyen Haggith emenere idem esie, ete, Ami nyeda ubɔŋ: enye onyuŋ otim chariot ye horse ɔnɔ idemesie, ye owo aba ye duop eke efeŋede enye ke iso.

6Ndien ete esie akanam iyatke enye esit, ete, Anam didie afo anam ntem? enye onyuŋ edi ata ediye owo; ndien eka esie aman enye adian Absalom.

7Ndien enye eneme nneme ye Joab eyen Zeruiah, ye Abiathar oku, ndien mmɔ etiene Adonijah eŋwam enye.

8Edi Zadok oku, ye Benaiah eyen Jehoiada, ye prophet Nathan, ye Shimei, ye Rei, ye mbon-uko oro David enyenede isaŋake ye Adonijah.

9Ndien Adonijah owot ŋkpri ufene, ye enaŋ, ye unam eke esehede, ke ɔtɔ itiat Zoheleth, emi ekperede En-rogel, onyuŋ okot kpukpru nditɔ-ete esie, kpa nditɔ edidem, ye kpukpru owo Judah eke edide ikɔt edidem;

10edi ikotke prophet Nathan, ye Benaiah, ye mbon-uko oro, ye Solomon eyenete esiemɔ.

11Ekem Nathan prophet ɔdɔhɔ Bath-sheba eka Solomon, ete, Nte afo uka-ukopke, ete ke Adonijah eyen Haggith amada ubɔŋ, ndien David ɔbɔŋ nnyin ifiɔkke?

12Mbɔk kam di, yak nteme fi item, man afo anyaŋa uwem fo, ye uwem Solomon eyen fo.

13Ka koduk ke ɔtɔ edidem David, nyuŋ dɔhɔ enye, ete, Nte afo, ɔbɔŋ mi, O edidem, ukɔŋwɔŋɔke unɔ ofin aŋwan fo, ete, “Solomon eyen fo iditreke nditiene mi edem nda ubɔŋ, enye eyenyuŋ etie ke ebekpo mi?” Anam didie ndien Adonijah ada ubɔŋ?

14Sese, ke ini afo osuk enemede nneme do ye edidem, ami ŋko nyetiene fi edem nduk, nnyuŋ nsɔŋɔ ikɔ fo.

15Ekem Bath-sheba oduk etiene edidem ke ubet nna: ndien edidem edi ata akani owo: Abishag ŋwan-a-Shunem onyuŋ anam ŋkpɔ ɔŋɔ edidem.

16Ndien Bathsheba ɔnuhɔ, onyuŋ atuak ibuot ɔnɔ edidem. Ndien edidem obup ete, Nso ŋkpɔ ke afo oyom?

17Ndien enye ɔdɔhɔ edidem, ete, Ɔbɔŋ mi, afo okotomo Jehovah Abasi fo ɔnɔ ofin ŋwan fo, ete, “Solomon eyen fo iditreke nditiene mi edem nda ubɔŋ, enye eyenyuŋ etie ke ebekpo mi.”

18Ndien, sese, ke emi Adonijah ke ada ubɔŋ; ndien ke emi, ɔbɔŋ mi,

19O edidem, afo ufiɔkke. Enye ama onyuŋ owot enaŋ, ye edisehe unam, ye ŋkpri ufene ediwak, ama onyuŋ okot kpukpru nditɔ edidem, ye Abiathar oku, ye Joab etubom mbon-ekɔŋ: edi ikotke Solomon owo fo.

20Ndien, ɔbɔŋ mi, O edidem, enyin ofuri Israel ese fi, ete afo owut mmimɔ owo eke editienede ɔbɔŋ mi edidem etie ke ebekpo.

21Ndien ama ekem, adaŋemi ɔbɔŋ mi edidem edinade ye mme ete esie ede, ami ye eyen mi Solomon iyedi mbon isop.

22Ndien, sese, adaŋemi enye osuk enemede ye edidem, prophet Nathan onyuŋ oduk.

23Ndien mmɔ esian edidem, ete, Sese Nathan prophet mi. Ndien enye ebe oduk ke iso edidem, onyuŋ ɔnuhɔ ɔnɔ edidem okubi iso esie ke isɔŋ.

24Ndien Nathan ɔdɔhɔ ete, Obɔŋ mi, O edidem, nte afo ɔkɔdɔhɔ, ete, Adonijah etiene fi ada ubɔŋ, onyuŋ etie ke ebekpo fo?

25Koro enye ɔmɔsuhɔre mfin emi, aka okowot enaŋ, ye edisehe unam, ye ŋkpri ufene ediwak, omonyuŋ okot kpukpru nditɔ edidem, ye mme etubom mbon-ekɔŋ, ye Abiathar oku; ndien, sese, mmɔ ke ededia, ke enyuŋ eŋwɔŋ ke iso esie, enyuŋ edɔhɔ ete, Yak Adonijah edidem odu uwem.

26Edi enye ikokotke mi owo fo, ye Zadok oku, ye Benaiah eyen Jehoiada, ye Solomon owo fo,

27Nto oruk ŋkpɔ emi etiede ntem oto ɔbɔŋ mi edidem, ndien afo uwutke ikɔt fo owo eke editienede ɔbɔŋ mi edidem etie ke ebekpo?

28Ndien David edidem ɔbɔrɔ ete, Mbufo ekot Bath-sheba enɔ mi. Ndien enye ebe oduk ke iso edidem, onyuŋ ada ke iso edidem.

29Ndien edidem ɔŋwɔŋɔ ete, Ma uwem Jehovah, emi akafakde ukpɔŋ mi osio ke kpukpru nnanenyin,

30kpa nte ŋkotomode Jehovah Abasi Israel nnɔ fi, nte ke Solomon eyen fo iditreke nditiene mi nda ubɔŋ, ke enye eyenyuŋ etie ke ebekpo mi ke ibuot mi; ke ntem ke ntreke ndinam mfin emi.

31Ndien Bath-sheba ɔnuhɔ okubi iso esie ke isɔŋ, onyuŋ atuak ibuot ɔnɔ edidem, ete, Yak ɔbɔŋ mi, O ediden David, akam odu uwem ke nsinsi.

32Ekem edidem David ɔdɔhɔ ete, Mbufo ekot Zadok oku, ye Nathan prophet, ye Benaiah eyen Jehoiada, enɔ mi. Ndien mmɔ edi ke iso edidem.

33Ndien edidem ɔdɔhɔ mmɔ, ete, Mbufo eda ikɔt ɔbɔŋ mbufo ye esaŋa mbufo enyuŋ edori Solomon eyen mi ke mule emi edide okimmɔ, enyuŋ eda enye esuhɔre eka ke Gihon:

34ndien yak Zadok oku ye Nathan prophet eyet enye aran do enim ke edidem Israel: mbufo enyuŋ eda obukpoŋ efuri, enyuŋ edɔhɔ, ete, Yak Solomon edidem odu uwem.

35Ndien mbufo etiene enye edok, yak enye ɔsuhɔre etie ndien ke ebekpo mi: enye eyenyuŋ ada ubɔŋ ke ibuot mi: mma nnyuŋ ŋwuk nte, yak enye edi ɔbɔŋ Israel ye Judah.

36Ndien Benaiah eyen Jehoiada ɔbɔrɔ edidem, ete, Amen: yak Jehovah Abasi ɔbɔŋ mi edidem ɔdɔhɔ ntre ŋko.

37Kpa nte Jehovah okodude ye ɔbɔŋ mi edidem, kpa ntre yak enye odu ye solomon, onyuŋ anam ebekpo esie okpon akan ebekpo ɔbɔŋ mi, edidem David.

38Ndien Zadok oku, ye Nathan prophet, ye Benaiah eyen Jehoiada, ye mme Cherethite, ye mme Pelethite, esuhɔre, mmɔ enyuŋ eda Solomon edori ke mule edidem David, enyuŋ eda enye eka ke Gihon.

39Zadok oku onyuŋ osio nduk aran ke efe, aka ekeyet Solomon ke idem.Mmɔ enyuŋ efuri obukpoŋ; ndien kpukpru owo edɔhɔ ete, Yak edidem Solomon odu uwem.

40Ekem kpukpru owo etiene enye ke edem edɔk; mmɔ enyuŋ efuri ifiom, enyuŋ edara akamba idaresit: uyom mmɔ onyuŋ asiak isɔŋ.

41Ndien Adonijah ye kpukpru mmɔ emi enye okokotde, emi edude ye enye, ekop ke ini mmɔ ema ekedia ŋkpɔ ema. Ndien adaŋemi Joab okopde uyo obukpoŋ, enye ɔdɔhɔ ete, Nsinam uyom ofutde ke obio ntem?

42Ke ini enye osuk ɔdɔhɔde, sese, Jonathan eyen Abiathar oku edi: ndien Adonijah ɔdɔhɔ enye, ete, Be duk; koro afo edide owo uko, onyuŋ ada eti ikɔ edi.

43Ndien Jonathan ɔbɔrɔ Adonijah, ete, Ŋkɔm ɔbɔŋ nnyin edidem David omonim Solomon ke edidem.

44Edidem omonyuŋ ɔdɔŋ Zadok oku, ye Nathan prophet, ye Benaiah eyen Jehoiada, ye mme Cherethite, ye mme Pelethite esaŋa ye enye, mmɔ ema enyuŋ edori enye ke mule edidem:

45Zadok oku ye Nathan prophet ema enyuŋ eyet enye aran enim ke edidem ke Gihon; enyuŋ eto do edɔk, ke esio mkpo, obio onyuŋ ofut. Enye uyom oro mbufo ekekopde.

46Solomon omonyuŋ ɔsuhɔre etie ke ebekpo edidem.

47Ndien ikɔt edidem ŋko ema eka eketoro ɔbɔŋ nnyin, edidem David, ete, Yak Abasi fo ofori enyiŋ Solomon akan enyiŋ fo, onyuŋ anam ebekpo esie okpon akan ebekpo fo: ndien edidem etie ke bed atuak ibuot.

48Ntem ke edidem onyuŋ ɔdɔhɔ ŋko, ete, Mmɔkɔm Jehovah Abasi Israel, emi ɔnɔde owo eke etiede ke ebekpo mi mfin emi, enyin mi enyuŋ ekut.

49Ndien kpukpru mmɔ oro ekekotde, emi edude ye Adonijah edige enyuŋ edaha ke enyɔŋ enyɔŋ eke mmɔ.

50Ndik Solomon onyuŋ anam Adonijah, ndien enye adaha ke enyɔŋ, aka okomum nduk itie-uwa.

51Ekem etiŋ enɔ Solomon, ete, Sese, ndik edidem Solomon ke anam Adonijah; sese, enye onyuŋ omum ndɔk itie-uwa, ete, Yak Solomon edidem akaŋa akaŋa ɔnɔ mi mfin emi, ete ke imɔ idiwotke owo imɔ ke ofut.

52Ndien solomon ɔdɔhɔ ete, Edieke enye anamde nte eti owo, idet esie ndomo kiet ididuɔhɔ ke isɔŋ: edi ema ekut idiɔk ido ye enye, enye eyekpa.

53Ekem edidem Solomon ɔdɔŋ ekeda enye ke itie-uwa esuhɔre edi. Ndien enye edi edituak ibuot ɔnɔ Solomon edidem: ndien Solomon ɔdɔhɔ enye, ete, Nyɔŋ ke ebiet fo.