1KE adaŋemi Jehovah Abasi fo edidade fi oduk ke isɔŋ emi afo akade do ndida enye nnyene, edinyuŋ ebinde ediwak mme idut ke iso fo efep, mme Hittite, ye mme Girgashite, ye mme Amorite, ye mme Canaanite, ye mme Perizzite, ye mme Hivite, ye mme Jebusite, mme idut itiaba emi ekponide enyuŋ ewakde ekan fi;
2ndien adaŋemi Jehovah Abasi fo edidade mmɔ onim ke iso fo; afo onyuŋ akan mmɔ, kutre ndisobo mmɔ; kunam ediomi ye mmɔ, kunyuŋ utua mmɔ mbɔm:
3kunyuŋ unam ndɔ ye mmɔ kuda eyen fo aŋwan unɔ eyen-eren esie, kunyuŋ uda eyen esie aŋwan unɔ eyen-eren fo.
4Koro mmɔ eyenam eyen-eren fo akabare etre nditiene mi, ndien mmɔ eyenam ŋkpɔ abasi efen: ndien iyaresit Jehovah eyefiop ye mbufo, enye eyeyuŋ awara ndisobo fi.
5Edi mbufo enam ntem ye mmɔ; ewuri mme itie-uwa mmɔ, enyuŋ ebom mme adaha mmɔ, enyuŋ esiak eto-mkpe mmɔ, enyuŋ efɔp edisɔi mbiet mmɔ ke ikaŋ.
6Koro afo edide edisana ikɔt Jehovah Abasi fo: Jehovah Abasi fo ama emek fi ete edi ata ikɔt imɔ akan kpukpru mme idut emi edude ke iso ererimbot.
7Idige koro mbufo ekewakde ekan kpukpru mme idut, ekesin Jehovah ama mbufo, onyuŋ emek mbufo: koro mbufo ekpekpri ekan kpukpru mme idut:
8edi koro Jehovah amade mbufo, onyuŋ etiŋde enyin ke uŋwɔŋɔ emi enye ɔkɔŋwɔŋɔde ɔnɔ mme ete mbufo, esin Jehovah akada ɔkpɔsɔŋ ubɔk osioŋo mbufo efep, onyuŋ afak mbufo osio ke ubɔk ufin, ye ke ubɔk Pharaoh edidem Egypt.
9Fiɔk, ndien, ete ke Jehovah Abasi fo edi ata Abasi, Abasi akpaniko emi onimde ediomi ye ima ye mmɔ eke emade enye, enyuŋ enimde mbet esie, ke tɔsin emana;
10onyuŋ osiode usiene ye mme asua enye ke iso esie, ke ndisobo mmɔ: enye idinamke ubigi ye owo eke asuade enye, eyesio usiene ɔnɔ enye ke iso esie.
11Nim ndien mbet, ye mme ewuhɔ ye mme item, emi ami ntemede fi mfin emi, man afo anam mmɔ.
12Ndien ama ekem, koro mbufo edikpaŋde utɔŋ ke mme item emi, enyuŋ enimde, enyuŋ enamde mmɔ Jehovah Abasi fo eyeda ediomi ye ima emi enye ɔkɔŋwɔŋɔde ɔnɔ mme usɔ, ekpeme ɔnɔ fi:
13ndien enye eyema fi, onyuŋ ɔdiɔŋ fi, onyuŋ anam fi ɔtɔt: onyuŋ ɔdiɔŋ mfri idibi fo, ye mfri isɔŋ fo, ye ibokpot fo, ye ɔbufa wine fo, ye aran fo, ye nditɔ enaŋ fo, ye nditɔ ŋkpri ufene fo, isɔŋ emi enye ɔkɔŋwɔŋɔde ɔnɔ mme usɔ, ete iyenɔ fi.
14Eyefɔn fi akan kpukpru mme idut: ada eren ye ada ŋwan ididuhe ke otu fo, ye ke otu ufene fo.
15Jehovah eyenyuŋ osio fi kpukpru udɔŋɔ ke idem efep, idinyuŋ idaha baba idiɔk udɔŋɔ Egypt kiet, eke afo ɔfiɔkde inam fi; edi enye eyeda mmɔ anam kpukpru owo eke esuade fi.
16Ndien afo eyedia kpukpru mme idut eke Jehovah Abasi fo edinɔde fi; enyin fo okutua mmɔ mbɔm: kunyuŋ unam ido mme abasi mmɔ: koro oro eyekɔk afia ɔnɔ fi.
17Ke afo edidɔhɔde ke esit fo, ete, Mme idut emi ewak ekan mi; ndikeme didie ndibin mmɔ mfep?
18Kufehe mmɔ: tim ti se Jehovah Abasi fo akanamde Pharaoh, ye ofuri Egypt;
19ikpɔ ndomo emi enyin fo okokutde, ye mme idiɔŋɔ, ye mme utibe ŋkpɔ, ye ɔkpɔsɔŋ ubɔk, ye edimenere ubɔk, emi Jehovah Abasi fo akadade osio fi; kpasuk ntre ke Jehovah Abasi fo edinam ye kpukpru mme idut emi ndik mmɔ edinamde fi.
20Ndien ŋko Jehovah Abasi fo eyedɔŋ atat ke otu mmɔ, tutu mmɔ eke esuhɔde, enyuŋ edibede fi ekure tak-tak.
21Kudikhe ke iso mmɔ: koro Jehovah Abasi fo odude ke otu fo, akwa Abasi ye Abasi uteŋe.
22Ndien Jehovah Abasi fo eyebin mme idut emi efep ke iso fo nsit nsit: udukemeke ndisobo mmɔ tak ini kiet, mbak mme unam ikɔt ediwak ekan fi.
23Ndien Jehovah Abasi fo eyeda mmɔ onim ke iso fo, eyenyuŋ ada akamba ndutime otimere mmɔ, tutu mmɔ esuana ema.
24Enye eyenyuŋ emen mbɔŋ mmɔ esin fi ke ubɔk, ndien afo eyesobo enyiŋ mmɔ efep ke idak enyɔŋ: baba owo kiet idikemeke ndida fi ke iso, tutu afo asuan mmɔ.
25Mbufo eda edisɔi ŋkpɔ mbiet mme abasi mmɔ efɔp ke ikaŋ: kuyom silver ye gold eke ɔfuhɔde mmɔ ke idem, kunyuŋ uda enye ke idem fo, mbak enye edisin afia amia fi: koro Jehovah Abasi fo esede enye ke ŋkpɔ mbubiam.
26Kunyuŋ uda ŋkpɔ mbubiam uduk ke ufɔk fo, mbak afo edikabare edi ŋkpɔ nsobo ebiet enye: kam sasua enye, nyuŋ bat enye ke ŋkpɔ mbubiam: koro enye edide ŋkpɔ nsobo.
Who We AreWhat We EelieveWhat We Do
2025 by iamachristian.org,Inc All rights reserved.
