1EKEM ŋwan kiet ke otu iban nditɔ mme prophet eseme ɔnɔ Elisha, ete, Ebe mi, owo fo, amakpa; afo omonyuŋ ɔfiɔk ete ke owo fo edi owo eke abakde Jehovah: ndien owo-ebuɔt esie emedi ndida nditɔ-iren mi iba ke idemesie nnim ke ifin.
2Ndien Elisha ɔdɔhɔ enye, ete, Afo oyom ete nnam nso nnɔ fi? Sian mi se afo enyenede ke ufɔk. Ndien ŋwan oro ete, Ofin aŋwan fo inyeneke baba ŋkpɔ kiet ke ufɔk, ke mibɔhɔke aran ke ekpeme.
3Ndien enye ɔdɔhɔ ete, Wɔrɔ ka buɔt mbɔhiduŋ fo abaŋ kpa ukpɔk abaŋ; kubuɔt esisit.
4Ndien duk ke ufɔk fo, beri usuŋ baha idemfo, ye nditɔ fo ke ufɔk, ndien tɔhɔ sin ke kpukpru abaŋ emi, ndien men eke ɔyɔhɔde nim edem kiet.
5Ndien ŋwan ɔnyɔŋ ɔkpɔŋ enye, eberi usuŋ abaha idemesie ye nditɔ esie ke ufɔk: ndien mmɔ eda abaŋ esɔk enye, enye onyuŋ ɔtɔhɔ aran esin.
6Edikem adaŋemi mme abaŋ eyɔhɔde, enye ete eyen esie, Da abaŋ efen sɔk mi. Ndien eyen ɔdɔhɔ enye, ete, Abaŋ efen iduhe.
7Ndien aran ekpehe. Ndien ŋwan oro aka eketiŋ ɔnɔ owo Abasi. Ndien enye ɔdɔhɔ ete, Ka kanyam aran oro sio isɔn fo, Ndien afo ye nditɔ fo eda se isuhɔde edu uwem.
8Edikem ke usen kiet, Elisha ebe aka Shunem emi ɔbɔŋ-aŋwan kiet odude do; ndien ŋwan oro esin enye aka akadia ŋkpɔ. Edikem adaŋa ini nte enye ebebe, enye awaha do adia ŋkpɔ.
9Ekem ŋwan oro ɔdɔhɔ ebe esie, ete, Sese, mbɔk, mmɔfiɔk nte ke enye emi ebede nnyin kpukpru ini, edi eti owo Abasi.
10Mbɔk, yak nnyin idiɔŋ ekpri ubet enyɔŋ ibibene, inyuŋ inim bed do, ye okpokoro, ye ifum, ye utuenikaŋ, inɔ enye: Ndien ama ekem ke ini enye edide ke ɔtɔ nnyin, enye ediwaha oduk do.
11Edikem ke usen kiet, enye osim do, awaha oduk ke ubet enyɔŋ osuhɔre ana do.
12Ndien enye (Elisha) ɔdɔhɔ Gehazi, akparawa esie, ete, Kot Shunammite emi edi ken.
13Ndien adaŋemi enye okotde enye, enye edida enye ke iso. Ndien enye (Elisha) ete enye, Dɔhɔ ŋwan oro, ndien, ete, Sese, afo ama ada ofuri ekikere emi ekere nnyin; afo oyom ete ndinam nso ŋkpɔ nnɔ fi? Nte afo enyene ndidɔhɔ ikɔ ye edidem mme etubom mbon-ekɔŋ?
14Ndien ŋwan ete, Ami nduŋ ke otu oruk mi. Ndien enye ɔdɔhɔ ete, Nso naŋa ke nnyin ikeme ndinam nnɔ ŋwan emi? Ndien Gehazi ɔbɔrɔ, ete, Enye inyeneke baba eyen kiet, ndien ebe esie edi akani eren.
15Ndien enye ete, Kot enye edi, Ndien adaŋemi enye okotde ŋwan edi, ŋwan edida ke enyin-usuŋ.
16Ndien Elisha ɔdɔhɔ ete, Ke adaŋa ini ntem ke ebem afo edidek eyeneren. Ndien ŋwan ete, Ɔbɔŋ mi, owo Abasi, kubiaŋa ofin aŋwan fo.
17Ekem ŋwan oro oyomo, onyuŋ aman eyen-eren ke ini nte enye okodoride, ke ebem, kpa nte Elisha ɔkɔdɔhɔde enye.
18Ndien adaŋemi eyen oro okponde, edikem ke usen kiet, enye etiene ete esie ɔwɔrɔ aka ke ɔtɔ mme ekpeŋe ibokpot.
19Ndien enye ɔdɔhɔ ete esie, ete, Ibuot mi! Ibuot mi! Ndien ete ɔdɔhɔ akparawa kiet, ete, Men enye sɔk eka esie.
20Ndien enye emen eyen ada ɔsɔk eka esie: ndien enye etie eka ke edɔŋ tutu osim ufɔt uweme-eyo, ndien akpa.
21Ndien eka ɔdɔk okonim enye ke bed owo Abasi oro, onyuŋ esin usuŋ abaha enye, onyuŋ ɔwɔrɔ.
22Ndien enye okot ebe esie, ete, Mbɔk, dɔŋ akparawa kiet etiene mi, ye ass kiet, man mfehe ŋka ɔtɔ owo Abasi, mfiak ndi.
23Ndien ebe ɔdɔhɔ ete, Afo anam didie aka ɔtɔ esie mfin emi? Ke idige obufa ɔfiɔŋ, inyuŋ idige sabbath. Ndien enye ɔbɔrɔ ete, Ke ɔfɔfɔn.
24Ekem ŋwan ɔdiɔŋ ass, onyuŋ ɔdɔhɔ akparawa esie, ete, Bin ka: kusuk ubɔk ubin unɔ mi ke mmendidɔhɔke fi.
25Ntem ke enye asaŋa aka okosim owo Abasi oro ke obot Carmel.Edikem ke ini owo Abasi okutde enye anyan usuŋ, enye ɔdɔhɔ Gehazi akparawa esie, ete, Sese,
26Shunammite emi ko: fehe, ndien, kosobo ye enye, nyuŋ bup enye, Nte ɔfɔn ye afo? Nte ɔfɔn ye uberi?
27Nte ɔfɔn ye eyen? Ndien ŋwan ɔbɔrɔ, ete, Ɔfɔn. Ekem enye osim owo Abasi ke obot, onyuŋ omum enye ukot: edi Gehazi asaŋa ekpere, ete inuk enye ifep. Edi owo Abasi ɔdɔhɔ ete, Kpɔŋ enye: koro esit ayatde enye: ndien Jehovah omodip mi, inyuŋ isianke mi.
28Ndien ŋwan ɔdɔhɔ ete, Nte ŋkebeŋe ɔbɔŋ mi eyen? Nte ŋkɔdɔhɔke fi, nte okubiaŋa mi?
29Ndien Elisha ɔdɔhɔ Gehazi, ete, Bɔbɔ mbɔbɔ ke isin, nyuŋ da esaŋ mi ke ubɔk fo, ka: okut owo ke usuŋ, kukɔm enye; owo onyuŋ ɔkɔm fi, kuyere enye; ndien dori eyen oro esaŋ mi ke iso.
30Ndien eka eyen ɔdɔhɔ ete, Ma uwem Jehovah, ma uwem ukpɔŋ fo ŋko, ndikpɔŋke fi. Ndien enye adaha ke enyɔŋ, asaŋa ye ŋwan oro.
31Edi Gehazi ebem mmɔ iso, aka okodori eyen oro esaŋ ke iso; edi baba uyo iduhe, mkpaŋ-utɔŋ inyuŋ iduhe. Ndien enye afiak okosobo ye enye, onyuŋ ɔdɔhɔ enye, ete, Eyen oro idemekede.
32Ekem ke ini Elisha odukde ke ufɔk, sese, eyen amakpa, ana ke bed esie.
33Ndien enye oduk eberi usuŋ abaha mmɔ mbiba,
34onyuŋ ekpe Jehovah ubɔk. Ndien enye ɔdɔk akana eyen oro ke idem, adian inua esie ke inua eyen, adian enyin esiemɔ ke enyin eyen, adian ubɔk esiemɔ ke ubɔk eyen; onyuŋ okubɔ enye ke idem; ndien idem eyen oro akabare ofiop.
35Ndien enye afiak akasaŋa ke ufɔk ini kiet ke edem emi, ye ini kiet ke edem eken; ndien ɔdɔk ɔkɔkubɔ enye ke idem; ndien eyen oro asia utim ikatiaba, eyen onyuŋ atat enyin esie.
36Ndien enye okot Gehazi, onyuŋ ɔdɔhɔ ete, Kot Shunammite oro edi. Ndien enye okot enye edi. Ndien adaŋemi enye odukde ke ɔtɔ esie, enye ɔdɔhɔ ete,
37Men eyen fo. Ndien ŋwan oduk ɔkɔduɔ enye ke ukot, ɔnuhɔ ke isɔŋ, onyuŋ emen eyen esie ɔwɔrɔ.
38Ekem Elisha afiak aka ke Gilgal; akaŋ onyuŋ odu ke isɔŋ; nditɔ mme prophet enyuŋ etie enye ke iso: ndien enye ɔdɔhɔ owo esie, ete, Tem akamba eso ke ikaŋ, nyuŋ tem udia nɔ nditɔ mme prophet.
39Ndien owo kiet ɔwɔrɔ oduk ke ikɔt eketet ikɔŋ, ndien enye okut vine ikɔt, onyuŋ etet mfri esie ɔyɔhɔ ke ɔfɔŋ-idem esie, ada edi edikpok esin ke eso ikɔŋ: koro midiɔŋɔke mmɔ.
40Ekem mmɔ ekɔp enɔ mmɔ, ete edia. Edikem ke ini mmɔ ediade udia oro, mmɔ efiori ete, Mkpa mmɔ ke eso, O owo Abasi. Ndien mmɔ ikwe nte ediade.
41Edi enye ete, Mbufo eda, ndien, ndom-uyo edi. Ndien enye esin ke eso; ndien ɔdɔhɔ ete, Kɔp nɔ mmɔ man edia. Ndien baba idiɔk-ŋkpɔ kiet iduhe ke eso.
42Ekem owo oto ke Baal-shalisha edi, ada uyo akpa mfri ɔsɔk owo Abasi, kpa uyo a barley edip, ye editim ibokpot ke ekpat esie. Ndien enye ɔdɔhɔ ete, Nɔ kpukpru owo man edia.
43Ndien owo esie ɔdɔhɔ ete, Ndinam didie nnim emi ke iso owo ikie? Ndien enye ete, Nɔ kpukpru owo, ete edia: koro ntem ke Jehovah ɔdɔhɔ ete,
44Mmɔ eyedia, enyuŋ esuhɔ. Ntre ke enye onim mmɔ ke iso, ndien mmɔ edia, enyuŋ esuhɔ, ke uyo Jehovah.
Who We AreWhat We EelieveWhat We Do
2025 by iamachristian.org,Inc All rights reserved.
