2 SAMUEL 1 - Efik Old Bible With Sectional Headings

David Etie Ikpo Abaŋa Ŋkpa Saul ye Jonathan Ufan Esie

1EDIKEM adaŋemi Saul ama akapa, ke David ama okonyuŋ asuan Amalek afiak edi, ke David ama okonyuŋ etie ke Zikglag ke usen iba;

2edikem ke ɔyɔhɔ usen ita sese, owo kiet oto ke na-ekɔŋ emi Saul odude, edi ndien edisine-ŋkpɔ esie ewaha, ntɔŋ onyuŋ odoro enye ke ibuot: edikem ke adaŋemi enye osimde David, enye ɔduɔ ke isɔŋ atuak ibuot.

3Ndien David obup enye, ete, Afo oto mmɔŋ? Ndien enye ɔbɔrɔ enye, ete, Ŋkefeghe ke nna-ekɔŋ Israel mbɔhɔ.

4Ndien David obup enye, ete, Ŋkpɔ oro ɔkɔwɔrɔ didie? mbɔk tiŋ nɔ mi. Ndien enye ɔbɔrɔ ete, Kpukpru owo emefeŋe ke ekɔŋ, ediwak owo emenyuŋ eduɔŋɔ ekpa; Saul ye Jonathan eyen esie enyuŋ ekpa nko.

5Ndien David ɔdɔhɔ akparawa oro etiŋde ɔnɔ enye ntre, ete, Afo ada nso ɔfiɔk ete ke Saul ye Jonathan eyen esie emekpa?

6Ndien akparawa oro etiŋde ɔnɔ enye ntre, ete, ŋkodu ke obot Gilboa, ndien, sese, Saul ke ebere idem ke eduat esie; ndien, sese, mme chariot ye mbon horse ke esɔp ebine enye.

7Ndien enye akabare iso ese mi, onyuŋ okot mi, ndien ami ndɔhɔ nte, Se mi mi.

8Ndien enye obup mi, ete, Afo edi anie? Ndien mbɔrɔ enye, nte,

9Ami ndi eyen Amalek. Ndien enye ɔdɔhɔ mi, ete, Mbɔk, saŋa kpere mi, nyuŋ wot mi, koro isiɔŋ omumde mi: koro nsuk ŋkokop odudu uwem ke idemmi.

10Ndien nsaŋa ndiana enye, nnyuŋ ŋwot enye, koro ntimde mfiɔk nte ke enye ikpekeme ndidu uwem, adaŋemi enye ama ɔduɔ ntre: ndien mmen anyanya emi ayarade enye ke ibuot, ye okpoho emi esinde enye ke ubɔk, nda mmɔ ndisɔk ɔbɔŋ mi.

11Ndien David, ye kpukpru owo emi edude ye enye, emum edisine-ŋkpɔ mmɔ ewai.

12Ntre ke mmɔ eseme, enyuŋ etua eyet, enyuŋ etre udia, tutu osim ke mbubreyo, ebaŋa Saul, ye Jonathan eyen esie, ye ikɔt Jehovah, ye ufɔk Israel; koro mmɔ eduɔŋɔde ke ofut.

13Ndien David ɔdɔhɔ akparawa oro ɔkɔbukde mbuk ɔnɔ enye, ete, Afo oto mmɔŋ? Ndien enye ɔbɔrɔ ete, Ami ndi eyen esen owo,eyen Amalek.

14Ndien David ɔdɔhɔ enye, ete, Nsinam afo mukefeheke ndinyan ubɔk fo ŋwot enye emi Jehovah ekeyetde aran?

15Ndien David okot akparawa kiet edi, onyuŋ ɔdɔhɔ ete, Saŋa kpere kokim enye. Ndien enye okim enye owot.

16David onyuŋ ɔdɔhɔ enye, ete, Iyip fo ɔsɔp idemfo: koro edi inua fo eketiŋ adian fi, ete, Ami ŋwot enye emi Jehovah ekeyetde aran.

17Ekem David ɔkwɔ ikwɔ emi abaŋa Saul ye Jonathan eyen esie:

18onyuŋ eteme, ete ekpep nditɔ Judah ikwɔ utiga: sese, emewet enye esin ke ŋwed Jasher (nti owo).

19O Israel, ubɔŋ amakpa afai ke ŋkokoŋo ebiet fo: Oh, mbon uko emeduɔŋɔ!

20Mbufo ekutiŋ ke Gath, ekubuk mbuk ke aŋwa Ashkelon; mbak nditɔ mme Philistine iban edidat esit, mbak nditɔ mbon-edut iban edibre mbre.

21Mbufo ikpɔ obot ke Gilboa! ekuyak mbara, ye edim, ye iŋwaŋ edimenere uwa, edu mbufo ke esit: koro do ke ekeduɔk otu-ekɔŋ mbon-uko; otu-ekɔŋ Saul iyereke aran.

22Utiga Jonathan ifiakke edem, ofut Saul inyuŋ ikabakede ukpɔk, ito ke iyip mme akpaŋa afai, ye ikpɔŋ mbon-uko.

23Saul ye Jonathan ema, enyuŋ enem, kiet eken ke uwem mmɔ, ndien ibahakede mmɔ ke mkpa mmɔ: mmɔ esɔsɔp ekan ntrukpom, esɔŋ idem ekan lion.

24Mbufo, nditɔ Israel iban, etua Saul eyet, emi ekesinde mbufo ididuot ɔfɔŋ ye ŋkpɔ inemesit ke idem; emi ɔkɔkɔnɔde ɔfɔŋidem mbufo ŋkpɔ mbana o gold.

25Mbɔm! mbon uko emeduɔŋɔ ke ufɔt ekɔŋ. Jonathan amakpa afai ke ŋkokoŋo ebiet fo.

26Esit ayat mi abaŋa fi, eyenete mi Jonathan; afo ama enem mi eti-eti: ima oro afo akamade mi edi utibe, akan ima iban.

27Mbɔm! mbon uko emeduɔŋɔ, ŋkpɔ-ekɔŋ emenyuŋ esobo.