NEHEMIAH 13 - Efik Old Bible With Sectional Headings

Nehemiah Abahade Mme Esen-Owo Efep ke Otu nditɔ Israel

1KE usen oro mmɔ etiŋ ŋwed Moses ke utɔŋ kpukpru owo; enyuŋ ekut nte ewetde ke esit, ete eyen Ammon ye eyen Moab ekuduk ke esop Abasi ke nsinsi:

2koro mmɔ mikadaha uyo ye mmɔŋ idisobo ye nditɔ Israel, edi eka ekekpe Balaam ebaŋa mmɔ, ete enye osuŋi mmɔ: edi Abasi nnyin akabare isuŋi oro edi eridiɔŋ.

3Edikem ndien, adaŋemi mmɔ ekopde ewuhɔ oro, mmɔ edianare kpukpru owo eke ebuahade ye Israel efep.

4Edi ini emi ekebemde ini emi iso, Eliashib oku, emi edide etubom mme ubet ufɔk Abasi nnyin, akamana iman ye Tobiah:

5onyuŋ ɔdiɔŋ akamba ubet ɔnɔ enye, emi mmɔ ekam enimde inuak-udia ke esit, ye frankin-cense, ye mkpoduoho, ye ɔyɔhɔ mbak ibokpot, ye eke wine, ye eke aran duop, emi ekewukde, ete enɔ mme Levite, ye mme ɔkwɔ-ikwɔ, ye mme etie-usuŋ, ye edimenere enɔ mme oku.

6Edi ke ofuri ini emi ŋkoduhe ke Jerusalem, koro ke ɔyɔhɔ isua Artaxerxes edidem Babylon edip ye duopeba, ami ŋkaka ke ɔtɔ edidem; ndien ke utit ndusuk usen, ŋkpe edidem ubɔk:

7ndien ndi ke Jerusalem ndifiɔk idiɔk-ŋkpɔ emi Eliashib akanamde abaŋa Tobiah, ke eridiɔŋ ubet ke okure ufɔk Abasi nnɔ enye.

8Ŋkpɔ oro onyuŋ ayat mi esit eti-eti: ndien nsioŋo kpukpru mkpoduoho ufɔk Tobiah ke ubet oro mfep, nduɔŋɔ.

9Ndien ndɔhɔ mmɔ, ndien mmɔ ediɔŋ ubet oro: ndien nda mkpoduoho ufɔk Abasi, ye inuak-udia, ye frankincense mbon ke esit.

10Ekem ami ndifiɔk nte ke ikɔnɔŋɔ mme Levite udeme mmɔ: ndien mme Levite, ye mme ɔkwɔ-ikwɔ emi enamde utom, ema efeŋe eka iŋwaŋ mmɔ.

11Ndien ntɔhɔ ye mme ebierikpe, nnyuŋ ndɔhɔ, nte, Enam didie ekpɔŋ ufɔk Abasi? Ndien mbon mmɔ ɔtɔ kiet, nnyuŋ nnim mmɔ ke itie mmɔ.

12Ndien ofuri Judah eda ɔyɔhɔ mbak ibokpot, ye eke obufa wine, ye eke aran, duop, edibon ke ufɔk-unim-ŋkpɔ.

13Ndien nda Shelemiah oku, ye Zadok ɔfiɔk-ŋwed, ye Pedaiah owo mme Levite kiet, nnim ke mme ese-ufɔk unim-ŋkpɔ: ndien Hanan eyen Zaccur, eyen Mattaniah, onyuŋ ɔbɔ mmɔ ubɔk, koro ebatde mmɔ ke mbon akpanikɔ; ndien mmɔ eyene ndideme nnɔ nditɔ-ete mmɔ.

14O Abasi mi, ti mi baŋa ŋkpɔ emi, kunyuŋ usɔhi mfɔnido mi emi ŋkanamde ye ufɔk Abasi mi, ye mme utom esie ufep.

15Ke ini oro ŋkut usuk owo ke Judah nte edigide ebiet-udigi wine, ke sabbath, enyuŋ ebiomde ebek, enyuŋ edoride ŋkpɔ ke edem ass, ebiom wine ŋko, ye grape, ye fig, ye kpukpru oruk mbiomo, nte enyuŋ edade mmɔ eduk ke Jerusalem ke usen sabbath: ndien nsua nnɔ mmɔ ke usen oro mmɔ enyamde ŋkpɔ udia.

16Nditɔ Tyre enyuŋ eduŋ ke esit, eda iyak, ye kpukpru oruk ŋkpɔ-urua, edinyam enɔ nditɔ Judah, ye ke Jerusalem ke usen sabbath.

17Ndien ntɔhɔ ye mbɔŋ Judah, nnyuŋ ndɔhɔ mmɔ, nte, Nso idiɔk ido edi emi mbufo enamde, enyuŋ ebiat usen sabbath?

18Nte idige ntre ke mme ete mbufo ekenam, ndien Abasi nnyin ada ofuri ukut emi etiene nnyin, ye obio emi? Ndien mbufo edediɔŋ eda iyaresit edori Israel ke eribiat sabbath.

19Edikem ke adaŋemi eyo ɔtɔŋɔde ndifuk owo idem ke inua-otop Jerusalem, ke mika-ikemke kaŋa ke sabbath, ndɔhɔ mmɔ, nte ekɔbi usuŋ, nnyuŋ ndɔhɔ nte, ekusio mmɔ tutu sabbath ebe: nnyun nnim ndusuk mkparawa mi, nte ese inua-otop, man mbiomo okuduk ke usen sabbath.

20Ndien mbon urua, ye mmɔ eke enyamde kpukpru oruk ŋkpɔ-urua, edaŋ ke edem Jerusalem ini kiet ye utim ikaba.

21Ndien ami nsua nnɔ mmɔ, nnyuŋ ndɔhɔ mmɔ, nte, Ke didie ke mbufo edaŋ ke edem ibibene? Mbufo ema etɔŋɔ ntak enam ntre, nyenam mbufo ŋkpɔ. Toto ke ini oro mmɔ idige aba ke sabbath.

22Ndien ndɔhɔ mme Levite, nte enam idem mmɔ esana, ndien edi edikpere inua-otop, man etim enim usen sabbath. Ti mi, O Abasi mi, baŋa ŋkpɔ emi ŋko, nyuŋ tua mi mbɔm ke akwa ima fo.

23Ndien ŋko ke ini oro ŋkut usuk mme Jew emi ekedɔde iban Ashdod, ye eke Ammon, ye eke Moab;

24ndien ndtɔ mmɔ etiŋ ubak usem Ashdod, inyuŋ ifiɔkke ndisem usem mme Jew, edi nte usem obio mbiba asaŋade.

25Ndien ntɔhɔ ye mmɔ, nnyuŋ nsua nnɔ mmɔ, nnyuŋ mmia ndusuk mmɔ, nnyuŋ ndibere mmɔ idet, nnyuŋ nnam mmɔ etomo Abasi, nte, Mbufo ekuda nditɔ-iban mbufo enɔ nditɔ-iren mmɔ, ekuŋyuŋ eda nditɔ-iban mmɔ enɔ nditɔ-iren mbufo, ye idem mbufo.

26Nte idige ŋkpɔ emi ekesin Solomon edidem Israel anam idiɔk ido? ndien baba edidem kiet eke ebietde enye ikoduhe ke otu ediwak mme idut, emi Abasi esie akamade enye, Abasi onyuŋ onim enye ke edidem ofuri Israel: edi isen iban oro enam kpa enye edue.

27Nte nnyin idikop inɔ mbufo, ndien, inyuŋ inam ofuri akamba idiɔk ido emi, inyuŋ idue Abasi nnyin ke eridɔ isen iban?

28Ndien eyen Joiada, eyen Eliashib akamba oku, kiet okokoro ukot ye Sanballat Horonite: mmɔdo mbinde enye ke idem mi mfep.

29O Abasi mi, ti mmɔ, koro mmɔ esabarede itie oku, ye ediomi itie oku, ye eke mme Levite.

30Ntre ke nsioŋo kpukpru isen owo mfep, nnam mmɔ (eken) esana, nnyuŋ nda ŋka mme oku, ye eke mme Levite, nnim ke itie-ukpeme, kpukpru owo kiet kiet ke itie utom mmɔ:

31ye ke eke enɔ ifia ke ini eke ekedoride, ye ke akpa mfri. O Abasi mi, ti mi ke mfɔn.