2 NDIDEM 19 - Efik Old Bible With Sectional Headings

Abasi Anyaŋa Judah Osio ke Ubɔk Sennacherib

1EDIKEM ke ini edidem Hezekiah okopde, enye onyuŋ awai edisine-ŋkpɔ esien, onyuŋ esine ɔfɔŋ-ikpo ke idem,

2oduk ke ufɔk Jehovah. Enye onyuŋ ɔdɔŋ Eliakim, emi edide etubom ufɔk esie, ye Shebna andiwet ŋwed, ye mbiowo mme oku, ete esine ɔfɔŋ-ikpo ke idem, eka ke ɔtɔ prophet Isaiah eyen Amoz.

3Ndien mmɔ edɔhɔ enye, ete, Ntem ke Hezekiah ɔdɔhɔ ete, Mfin emi edi usen ukut, ye ufen, ye esuene: koro nnyin itie nte ŋwan oyomde ndiman eyen, ndien odudu uman iduhe.

4Ndusuk Jehovah Abasi fo eyekop kpukpru ikɔ Rabshakeh emi ete esie, edidem Assyria, ɔkɔdɔŋde ete edisuene Abasi uwem; eyenyuŋ asua ɔnɔ ikɔ emi Jehovah Abasi fo okokopde: menere ndien uyo fo kpe enye ubɔk nɔ nsuhɔ emi esuhɔde mi.

5Ntem ikɔt edidem Hezekiah eka ke ɔtɔ Isaiah.

6Ndien Isaiah ɔbɔrɔ mmɔ, ete, Ntem ke mbufo edidɔhɔ ete mbufo, ete, Ntem ke Jehovah ɔdɔhɔ, ete, Kufehe ikɔ oro afo okokopde, emi ikɔt edidem Assyria ekedade etɔk mi.

7Sese, nyesin enye spirit ke idem, ndien enye eyekop etop, onyuŋ afiak ke edem mmɔ; ndien nyenam enye ɔduɔ ke ofut ke edem mmɔ.

8Ekem Rabshakeh afiak okosim edidem Assyria nte enye aŋwanade ekɔŋ ye Libnah: koro enye okokopde ete ke enye ama adaha ke Lachish.

9Ndien adaŋemi enye okopde abaŋa Tirhakah edidem Ethiopia, ete, Sese, enye ke ɔwɔrɔ edi ekɔŋ ye afo, enye ɔtɔŋɔ ntak ɔdɔŋ mme isuŋ utom ke ɔtɔ Hezekiah, ete,

10Ntem ke mbufo edidɔhɔ Hezekiah, edidem Judah, ete, Kuyak Abasi fo emi afo ɔbuɔtde idemfo ye enye, abiaŋa fi, ete, Ididaha Jerusalem isin edidem Assyria ke ubɔk.

11Sese, afo omokop se ndidem Assyria ekenamde kpukpru mme idut ke erisobo mmɔ fap; nte afo edibɔhɔ ndien?

12Nte mme abasi mme idut oro mme ete mi ekebiatde, ekenyaŋa mmɔ, kpa Gozan, ye Haran, ye Rezeph, ye nditɔ Eden emi edude ke Telassar?

13Enye edidem Hamath, ye edidem Arpad, ye edidem obio Sepharvaim, ye Hena, ye Ivvah?

14Ndien Hezekiah ɔbɔ mme isuŋ utom ŋwed oro ke ubɔk, okot: Hezekiah onyuŋ aka ke ufɔk Jehovah, atat ŋwed oro onim ke iso Jehovah.

15Hezekiah onyuŋ anam mkpe-ubɔk ke iso Jehovah, onyuŋ ɔdɔhɔ, ete, Jehovah Abasi Israel, emi etiede ke otu mme cherubim, afo ke idem fo ikpɔŋ-ikpɔŋ edi Abasi kpukpru mme idut ke ererimbot; afo akanam enyɔŋ ye isɔŋ.

16Kpaŋ utɔŋ fo, O Jehovah, nyuŋ kop: tat enyin fo, O Jehovah, nyuŋ se: nyuŋ kop uyo Sennacherib, emi enye ɔkɔdɔhɔde edisuene Abasi uwem.

17Ke akpanikɔ, O Jehovah, ndidem Assyria ema ebiat mme idut ye isɔŋ mmɔ;

18ema enyuŋ esin mme abasi mmɔ ke ikaŋ: koro mmɔ mikedige abasi, edi edi se ubɔk owo ekenamde, kpa eto ye itiat: mmɔdo ekesobode mmɔ.

19Ke emi, ndien, O Jehovah Abasi nnyin, mbɔk, nyaŋa nnyin sio enye ke ubɔk, ndien kpukpru mme idut ererimbot eyefiɔk ete ke afo edi Jehovah Abasi, afo ikpɔŋ-ikpɔŋ.

20Ekem Isaiah eyen Amoz ɔdɔŋ ekedɔhɔ Hezekiah, ete, Ntem ke Jehovah Abasi Israel ɔdɔhɔ, ete, Mmokop se afo ekekpede mi ubɔk abaŋa Sennacherib edidem Assyria.

21Ikɔ emi Jehovah ɔdɔhɔde abaŋa enye edi emi; Adiaha Zion eyenɔwɔŋ esin fi ke ndek, onyuŋ asak fi nsahi; adiaha Jerusalem enyeŋe ibuot ke edem fo.

22Afo okosuŋi, okonyuŋ ɔtɔk anie? okonyuŋ emenere uyo fo ke enyɔŋ abaŋa anie? Okonyuŋ emenere enyin fo ke enyɔŋ? ke abaŋa Edisana Abasi Israel.

23Afo amada inua mme isuŋutom fo esuene Ɔbɔŋ, onyuŋ ɔdɔhɔ, ete, Ami nda ata ediwak chariot mi ndɔk ke enyɔŋ ikpɔ obot, ye ke ŋkaŋ Lebanon; ndien nyekpeŋe edikoŋ cedar esie, ye edimek fir esie; nyenyuŋ nsim ata nsom esie, ye eti iŋwaŋ akai esie.

24Ami mma ntibi isɔŋ, nnyuŋ ŋŋwɔŋ esen idut, nnyuŋ nda ikpa-ukot mi nnam kpukpru akpa Egypt esat.

25Nte afo ukokopke ete ke ŋkanam enye ke eyo oko, ŋkonyuŋ mbot enye ke ini eset? Ke emi ke nnam enye osu, ndien afo eyedi se idisobode, inam obio ibibene ekabare edi ndon.

26Ndien mme andiduŋ mmɔ ikɔsɔŋke ubɔk, mmɔ edikhe, nsia onyuŋ oyomo mmɔ; mmɔ ekabare edi ikɔŋ ikɔt, awawa ikɔŋ, mbiet ɔkɔm ufɔk, ye ibokpot eke akpade ke mika-ikɔrike.

27Edi mmɔfiɔk itie fo, ye eriwɔrɔ fo, ye eriduk fo, ye nte afo ayatde esit ye ami.

28Koro afo ayatde esit ye ami, koro iseri fo ama onyuŋ ɔdɔk ediduk mi ke utɔŋ; mmɔdo ndisinde fi mkpanuen mi ke ibuo, ye uruk mi ke mkpɔk-inua fo; ndien nyenam fi afiak ke usuŋ oro afo akasaŋade ke esit edi.

29Ndien emi edi idiɔŋɔ fo, Mbufo edia se itibede ke idem esie mbun, enyuŋ edia se itibede ke idem esie ebem; ndien ke ɔyɔhɔ isua ita mbufo ewari mkpasip enyuŋ ekpeŋe; enyuŋ etɔ iŋwaŋ-vine, enyuŋ edia mfri mmɔ.

30Ndien ubak ufɔk Judah emi ɔbɔhɔde, onyuŋ ɔsuhɔde, eyetɔŋɔ ntak omum oduŋ esie ke isɔŋ, onyuŋ oŋwum idem ke enyɔŋ:

31koro mmɔ eke esuhɔde eyeto ke Jerusalem; ubak eke ɔbɔhɔde eyenyuŋ oto ke obot Zion, ufup Jehovah eyenam emi.

32Mmɔdo ntem ke Jehovah ɔdɔhɔ abaŋa edidem Assyria, ete, Enye ididukke ke obio emi, idinyuŋ itopke baba idaŋ kiet isin do, inyuŋ idaha otu-ekɔŋ idi enye ke iso, inyuŋ ibokke ibombom inɔ enye.

33Enye eyesaŋa ɔnyɔŋ ke usuŋ oro akasaŋade edi, ndien ididukke ke obio emi: uyo Jehovah edi emi.

34Ami nyenyuŋ ŋkpeme obio emi, nnyuŋ nnyaŋa enye mbaŋa idem mi, ye David owo mi.

35Edikem ke okoneyo oro angel Jehovah ɔwɔrɔ, okowot tɔsin, tɔsin owo ke itie ikie ye anaŋ ye ition ke nna-ekɔŋ Assyria: ndien adaŋemi mmɔ ebakde edemere ke usenubɔk, sese, kpukpru mmɔ edi okpo.

36Ekem Sennacherib edidem Assyria adaha ɔnyɔŋ aka ɔkɔduŋ ke Nineveh.

37Ekem ke ini enye ɔbɔŋde akam ke ufɔk Nisroch abasi esie, Adrammelech ye Sharezer nditɔ esie ewot enye ke ofut; ndien mmɔ ebɔhɔ eka isɔŋ Ararat. Ndien Esar-haddon eyen esie ada ubɔŋ ke itie esie.