1 NDIDEM 22 - Efik Old Bible With Sectional Headings

Micaiah Asiak Uduak Abasi Ete ke Eyekan Edidem Ahab ye Jehoshaphat ke Ekɔŋ

1NDIEN mmɔ etie ke isua ita; ekɔŋ iduhe ke ufɔt Syria ye nditɔ Israel.

2Edikem ke ɔyɔhɔ isua ita, Jehoshaphat edidem Judah ɔsuhɔre aka ke ebiet edidem Israel.

3Ndien edidem Israel ɔdɔhɔ ikɔt esiemɔ, ete, Nte mbuifo ifiɔkke ite ke Ramoth-gilead enyene nnyin, ndien nnyin idodop, ikaha ikada enye edidem Syria ke ubɔk?

4Ndien enye obup Jehoshaphat, ete, Nte afo onyime ndisaŋa ye ami, ŋka ekɔŋ ke Ramoth - gilead? Ndien Jehoshaphat ɔdɔhɔ edidem Israel, ete, Ami nnam nte afo anamde, ikɔt mi nte ikɔt fo, mme horse mi nte horse fo.

5Ndien Jehoshaphat ɔdɔhɔ edidem Israel, ete, Mbɔk, bup uyo Jehovah mfin emi.

6Ndien edidem Israel obon mme prophet, owo ikie inaŋ, ɔtɔ kiet, ndien obup mmɔ, ete, Nte ŋka ekɔŋ ke Ramoth-gilead, mme ŋkuka? Ndien mmɔ ebɔrɔ ete, Dɔk: ndien Ɔbɔŋ eyeda enye esin edidem ke ubɔk.

7Ndien Jehoshaphat ɔdɔhɔ ete, Nte prophet Jehovah eke nnyin ikpebupde enye, iduhe aba mi?

8Ndien edidem Israel ɔbɔrɔ Jehoshaphat, ete, Osuk kaŋa owo kiet, Micaiah eyen Imlah, emi nnyin ikemede ndida enye mbup Jehovah: edi ami mmasua enye: koro enye misitiŋke eti prophecy ibaŋa mi, ke mibɔhɔke idiɔk. Ndien Jehoshaphat ɔdɔhɔ, ete, Edidem okudɔhɔ ntre.

9Ekem edidem Israel okot adidaha kiet edi, onyuŋ ɔdɔhɔ enye, ete, Wara kada Micaiah eyen Imlah di.

10Ndien edidem Israel ye Jehoshaphat edidem Judah etie kiet kiet ke ebekpo mmɔ, esine edisine-ŋkpɔ ubɔŋ, ke ntaŋwaŋ ebiet ke inua-otop Samaria: ndien kpukpru prophet oro ke etetiŋ prophecy ke iso mmɔ.

11Zedekiah eyen Chenaanah ama onyuŋ anam nduk ukwak ɔnɔ idem esie; ndien enye ɔdɔhɔ ete, Ntem ke Jehovah ɔdɔhɔ ete, Afo eyeda mme mmɔ emi onuk Syria tutu osobo mmɔ ama.

12Ndien kpukpru prophet oro etiŋ prophecy ntem, ete, Dɔk ka ke Ramoth-gilead, nyuŋ kut unen: koro Jehovah eyeda enye esin edidem ke ubɔk.

13Ndien isuŋutom oro akakade ndikot Micaiah edi, ɔdɔhɔ enye, ete, Mbɔk, sese, mme prophet eda inua kiet etiŋ nti ikɔ enɔ edidem: mbɔk, yak ikɔ fo edi nte ikɔ owo mmɔ kiet, nyuŋ tiŋ se ifɔnde.

14Ndien Micaiah ɔdɔhɔ ete, Ma uwem Jehovah, se Jehovah edidɔhɔde mi, oro ke nditiŋ.

15Ekem enye osim edidem Ndien edidem ɔdɔhɔ enye, ete, Micaiah, nte nnyin ika ekɔŋ ke Ramoth Gilead, mme itre ndika? Ndien enye ɔbɔrɔ enye, ete, Dɔk; nyuŋ kut unen: ndien Jehovah eyeda enye esin edidem ke ubɔk.

16Ndien edidem ɔdɔhɔ enye, ete, Adaŋa didie ke ami ndiwuk fi, nte okutiŋ ke mibɔhɔke akpanikɔ unɔ mi ke enyiŋ Jehovah?

17Ndien enye eken ɔdɔhɔ ete, Ŋkokut ofuri Israel, nte esuanade ke ikpɔ obot, nte erɔŋ eke minyeneke ekpeme: ndien Jehovah ɔdɔhɔ ete, Mme mmɔ emi inyeneke ɔbɔŋ: yak kpukpru mmɔ efiak ke ufɔk mmɔ ke ifure.

18Ndien edidem Israel ɔdɔhɔ Jehoshaphat, ete, Nte ŋkɔdɔhɔke fi, nte ke enye isitiŋke eti prophecy ibaŋa mi, edi idiɔk?

19Ndien enye ɔdɔhɔ ete, Kam kop ndien uyo Jehovah: ŋkokut Jehovah nte enye etiede ke ebekpo esie, kpukpru mme udim enyɔŋ enyuŋ ekpere enye eda ke nnasia ye ke ufien.

20Ndien Jehovah ɔdɔhɔ enye ete, Anie editap Ahab, man enye ɔdɔk aka ɔkɔduɔ ke Ramoth-gilead? Ndien kiet ɔdɔhɔ ntem, kiet eken onyuŋ ɔdɔhɔ ntem.

21Ekem spirit kiet oto edida ke iso Jehovah, onyuŋ ɔdɔhɔ ete, Ami nyetap enye.

22Ndien Jehovah obup enye, ete, Ke nso? Ndien enye ɔbɔrɔ ete, Nyewɔrɔ ŋkakabare ndi spirit nsu ke inua kpukpru prophet esie. Ndien enye ete, Afo eyetap, eyenyuŋ ekeme ŋko:

23Wɔrɔ kanam ntre. Mmɔdo, sese, Jehovah emesin kpukpru mme prophet fo emi spirit nsu ke inua, Jehovah onyuŋ ɔdɔhɔ idiɔk abaŋa fi.

24Edi Zedekiah eyen Chenaanah asaŋa ekpere okoyibi Micaiah ke mfuk, onyuŋ ɔdɔhɔ ete, Ke usuŋ ewe ke spirit Jehovah ɔkpɔŋ mi, ebe editiŋ ikɔ inɔ fi?

25Ndien Micaiah ɔbɔrɔ ete, Sese, afo eyekut ke usen emi afo edidukde ke esit ubet okodibe.

26Ndien edidem Israel ɔdɔhɔ ete, Mum Micaiah, da enye fiak kɔnɔ Amon etubom obio, ye Joash eyen edidem;

27nyuŋ dɔhɔ ete, Ntem ke edidem ɔdɔhɔ ete, Mbufo esin owo emi ke ufɔk ukwak, enyuŋ eda uyo ukut, ye mmɔŋ ukut ebɔk enye, tutu ami ndi ke ifure.

28Ndien Micaiah ɔdɔhɔ ete, Afo ama afiak ke ifure, Jehovah ikadaha inua mi itiŋ. Enye onyuŋ ɔdɔhɔ ete, Mbufo akpaimɔ ekop.

29Ndien edidem Israel ye Jehoshaphat edidem Judah edɔk eka ke Ramoth-gilead.

30Ndien edidem Israel ɔdɔhɔ Jehoshaphat, ete, Nyefuk idem mi nduk ke ekɔŋ; edi afo sine ɔfɔŋ-idem ubɔŋ fo. Ndien edidem Israel ofuk idem esie oduk ke ekɔŋ.

31Edi edidem Syria ama eketeme mme etubom mme chariot esie, owo edip ye duopeba, ete, Mbufo ekuŋwana ekɔŋ ye ekpri, ekunyuŋ ŋwana ye akamba, ke mibɔhɔke edidem Israel ikpɔŋ-ikpɔŋ

32Edikem adaŋemi mme etubom mme chariot ekutde Jehoshaphat, mmɔ edɔhɔ ete, Ŋkɔm enye edi edidem Israel. Ndien mmɔ ewɔŋɔre eka ndiŋwana ye enye: ndien Jehoshaphat ofiori.

33Edikem adaŋemi mme etubom mme chariot ekutde ete ke enye idige edidem Israel, mmɔ efiak edem etre ndibine enye.

34Ekem owo kiet odudi utiga ikoho-koi, etiga edidem Israel ke ɔtɔ isobo ŋkpɔ ikpan-esit: ndien enye ɔdɔhɔ etubom chariot esie, ete, Kabare ubɔk fo, da mi wɔrɔ ke ekɔŋ; koro ndade unan.

35Ndien ekɔŋ ɔdɔdiɔŋ ɔsɔŋ ubɔk ke usen oro: mmɔ enyuŋ emum edidem ekama ada ke chariot esie ke iso mme Syrian, ndien enye akpa ke mbubreyo: iyip onyuŋ ɔwɔrɔ ke unan ɔduɔ ke esit chariot.

36Ekem ke ini usop-utin, mfiori asaŋa ke ufɔt nna, ete, Yak kpukpru owo enyɔŋɔ ke obio mmɔ ye edem mmɔ.

37Ntre ke edidem akpa, ndien osim Samaria; ndien mmɔ ebuk edidem ke Samaria.

38Ekem owo eyet chariot oro ke mkpɔdiɔhɔ-mmɔŋ samaria; ndien mme ebua edei iyip esie; mmɔ enyuŋ eyet ŋkpɔ-ekɔŋ esie; ke uyo Jehovah oro enye ɔkɔdɔhɔde.

39Ndien ama edi ikɔ Ahab eke esuhɔde, ye kpukpru se enye akanamde, ye ufɔk oduk-enin emi enye ɔkɔbɔpde, ye kpukpru obio oro enye ɔkɔbɔpde, nte ikewetke mmɔ isin ke ŋwed ikɔ eyo edidem Israel?

40Ntem ke Ahab ɔsuhɔre ana ye mme ete esie ede; ndien Ahaziah eyen esie ada ubɔŋ ke itie esie.

41Ndien Jehoshaphat eyen Asa ada ubɔŋ Judah, ke ɔyɔhɔ isua Ahab edidem Israel inaŋ.

42Jehoshaphat osim isua edip ye efut ke ini enye adade ubɔŋ; ndien enye edi edidem ke Jerusalem ke isua edip ye ition. Enyiŋ eka esie ŋko onyuŋ ekere Azubah eyen Shilhi.

43Enye onyuŋ asaŋa ke kpukpru usuŋ Asa ete esie; ikabakede ikpɔŋ enye, edi anam se inende ke iso Jehovah: edi isioho mme edikoŋ ebiet ifep; mbio-obio esuk ewa uwa, enyuŋ efɔp incense ke mme edikoŋ ebiet.

44Jehoshaphat onyuŋ etie ke emem ye edidem Israel.

45Ndien ama edi ikɔ Jehoshaphat eke esuhɔde, ye uko esie emi enye akanamde, ye nte enye ŋwanade ekɔŋ, nte ikewetke mmɔ isin ke ŋwed ikɔ eyo ndidem Judah?

46Enye onyuŋ ɔkpɔri mbon-use-sodom eke esuhɔde, eke ekekpɔŋde ke eyo Asa ete esie, ke isɔŋ efep.

47Edidem inyuŋ iduhe ke Edom: adidaha owo kiet edi edidem.

48Jehoshaphat ɔkɔŋ ubom mbakara: ete eka ke Ophir ndida gold ndi: edi mmɔ ikaha ka; koro mme ubom oro ebomode ke Ezion-geber.

49Ahaziah eyen Ahab onyuŋ ɔdɔhɔ Jehoshaphat, ete, Yak ikɔt mi etiene ikɔt fo eka ke ubom oro. Edi Jehoshaphat inyimeke.

50Ekem Jehoshaphat ɔsuhɔre ana ye mme ete esie ede, onyuŋ ɔbuhɔ ye mme ete esie ke obio David ete esie: ndien Jehoram eyen esie ada ubɔŋ ke itie esie.

51Ahaziah eyen Ahab ada ubɔŋ ke Samaria ke ɔyɔhɔ isua Jehoshaphat edidem Judah efureba, onyuŋ edi edidem Israel ke isua iba.

52Enye ŋko onyuŋ anam idiɔk ke iso Jehovah, onyuŋ asaŋa ke usuŋ ete esie, ye ke usuŋ eka esie, ye ke usuŋ Jeroboam eyen Nebat, emi akanamde Israel ediɔk.

53Enye onyuŋ anam ŋkpɔ Baal, onyuŋ atuak ibuot ɔnɔ enye, ndien ayat Jehovah Abasi Israel esit, kpasuk nte ete esie akanamde kpukpru ŋkpɔ.