1EKEM kpukpru nditɔ Israel ewɔŋɔ, mbio-esop enyuŋ ebono nte owo kiet, ɔtɔŋɔde ke Dan tutu osim ke Beer-sheba, ye isɔŋ Gilead, etiene Jehovah ke Mizpah.
2Ndien ikpɔ owo ofuri mbio-obio, kpa kpukpru esien Israel, edaha eda ke esop ikɔt Abasi, esim tɔsin owo ke itie ikie inaŋ, eke esaŋade ke ikpat enyuŋ esiode ofut.
3Ndien nditɔ Benjamin ekop ete nditɔ Israel ema edɔk ke Mizpah. Ekem, nditɔ Israel edɔhɔ, ete, Mbufo etiŋ nte idiɔk-ŋkpɔ emi akasaŋade.
4Ndien Levite oro, ebe ŋwan oro ekewotde, ɔbɔrɔ ete, Ami ye ŋwan mi ikesim Gibeah emi enyenede Benjamin, ite idaŋ ke okoneyo.
5Ndien mme enyene Gibeah edaha ke enyɔŋ enam ikɔ ye ami, enyuŋ ekan ufɔk ekuk mi ke okoneyo, eyom mi ndiwot: mmɔ enyuŋ esabare ŋwan mi ewot.
6Ndien nda ŋwan mi mbak enye mbak-mbak, mmen enye nnɔ esɔk ke ofuri isɔŋ udeme Israel: koro mmɔ emenam oburobut ŋkpɔ ye ndisime ke Israel.
7Sese, mbufo kpukpru edi nditɔ Israel; mbufo enɔ uyo ye item mi.
8Ndien kpukpru owo edaha eda nte owo kiet, ete, Baba owo nnyin kiet idinyɔŋke tent nnyin, idinyuŋ iwahake ke ufɔk nnyin.
9Edi yak ŋkpɔ emi edi se nnyin idinamde Gibeah; iyedomo ndomo ibaŋa enye;
10yak nnyin inyuŋ isio owo duop ke itie ikie ke kpukpru esien Israel, ye ikie ke itie tɔsin, ye tɔsin ke itie tɔsin duop, man mmɔ eka ekeyom udia enɔ kpukpru owo, man mmɔ eka ke Gibeah Benjamin, ekenam nte ekemde ye ofuri oburobut ido emi mmɔ ekenamde ke Israel.
11Ndien ofuri Israel edian idem nte owo kiet ebono, ete iŋwana ekɔŋ ye obio oro.
12Ndien mme esien Israel edɔŋ owo esaŋa ke ofuri esien Benjamin, ete, Nso idiɔk-ŋkpɔ ke enam ntem ke otu mbufo?
13Mbufo eyak ndien mbon oro, kpa mme oburobut owo oro edude ke Gibeah, man nnyin iwot mmɔ, inyuŋ ifimere idiɔk-ŋkpɔ ke Israel ifep. Edi nditɔ Benjamin inyimeke ndikop uyo nditɔ-ete mmɔ, nditɔ Israel:
14edi nditɔ Benjamin eto ke mme obio mmɔ edibono ke Gibeah, ete iwɔrɔ ika ekɔŋ ye nditɔ Israel.
15Ndien usen oro mmɔ ebat nditɔ Benjamin emi eketode ke mme obio, tɔsin owo edip ye itiokiet emi esiode ofut, ekɔrɔ ye mme andiduŋ Gibeah emi mmɔ ebatde, edimek owo ikie itiaba.
16Edimek owo ufien ikie itiaba edu ke otu kpukpru mme mmɔ emi; kpukpru mmɔ emi ekekeme nditop idet ke itiat, ndien iduehe due.
17Ebat nditɔ Israel ŋko, esio Benjamin, tɔsin owo ikie inaŋ, emi esiode ofut; kpukpru mmɔ emi edi mbon-ekɔŋ.
18Ekem mmɔ edaha ke enyɔŋ edɔk ke Beth-el, ekebup Abasi. Ndien nditɔ Israel edɔhɔ, ete, Mme anie owo nnyin edibem iso edɔk ekeŋwana ekɔŋ ye nditɔ Benjamin? Ndien Jehovah ɔdɔhɔ ete, Judah edibem iso.
19Ndien ke eyo esierede, nditɔ Israel edaha ke enyɔŋ eka ekenam nna-ekɔŋ ekpere Gibeah.
20Ndien nditɔ Israel ewɔŋɔ ekeŋwana ekɔŋ ye Benjamin; nditɔ Israel enyuŋ etim udim ekɔŋ ete iŋwana ye mmɔ ke Gibeah.
21Ndien nditɔ Benjamin ewɔŋɔ ke Gibeah, ekesobo tɔsin owo Israel edip ye iba ke usen oro, eduɔŋɔ ke isɔŋ.
22Ndien nditɔ Israel esɔŋ esit, enyuŋ etɔŋɔ ntak etim udim-ekɔŋ ke ebiet oro mmɔ eketimde ke akpa usen.
23Nditɔ Israel enyuŋ edɔk eketua eyet ke iso Jehovah, ete, Nte ntɔŋɔ ntak ŋka ekɔŋ ye Benjamin eyen-ete mi? Ndien Jehovah ɔdɔhɔ ete, Mbufo edɔk eka ekɔŋ ye enye.
24Ekem nditɔ Israel esaŋa ekpere itie ekɔŋ ye nditɔ Benjamin ke udian-akpa usen.
25Ndien Benjamin ewɔŋɔ ke Gibeah ke udiana-akpa usen, ekebiɔŋɔ mmɔ, enyuŋ etɔnɔ ntak esobo nditɔ Israel tɔsin owo efureta, eduɔŋɔ mmɔ ke isɔŋ; kpukpru mmɔ emi esio ofut.
26Ndien kpukpru nditɔ Israel ye kpukpru owo edɔk eka Beth-el eketua eyet, enyuŋ etie do ke iso Jehovah, enyuŋ etre udia ke usen oro, tutu osim mbubreyo: mmɔ enyuŋ ewa edifɔp uwa ye uwa emem ke iso Jehovah.
27Ndien nditɔ Israel ebup Jehovah (ekebe ediomi Abasi onyuŋ odu do ke usen oro;
28Phinehas eyen Eleazar, eyen Aaron, onyuŋ ada enye ke iso ke eyo oro,) Nte ntɔŋɔ ntak ŋwɔrɔ ŋka ekɔŋ ye nditɔ Benjamin eyen-ete mi, mme nyetre? Ndien Jehovah ɔbɔrɔ ete, Mbufo edɔk: koro mkpɔŋ ke ndida mmɔ nsin mbufo ke ubɔk.
29Ndien nditɔ Israel enim mbon-udibe ekan Gibeah ekuk.
30Ntre ke nditɔ Israel edɔk eka ekɔŋ ye nditɔ Benjamin, ke ɔyɔhɔ usen ita, enyuŋ etim udim-ekɔŋ ekpere Gibeah, kpa nte akpa.
31Ndien nditɔ Benjamin ewɔŋɔ ekebiɔŋɔ mmɔ, edianare ekpɔŋ obio; ndien mmɔ etɔŋɔ ndikpeŋe ndusuk owo ŋwot, osim owo Israel edip ye duop, kpa nte eke akpa, ke mme ɔkpɔ-usuŋ emi kiet ɔdɔkde aka Beth-el, kiet eken onyuŋ akade ke Gibeah ke iŋwaŋ.
32Ndien nditɔ Benjamin edɔhɔ ete, Eyak nnyin itibi itɔk idudi mmɔ idianare ke obio isin ke mme ɔkpɔ - usuŋ.
33Ekem kpukpru owo Israel edaŋa eda ke ɔtɔ mmɔ, enyuŋ etim udim ekɔŋ ke Baal-tamar: mbon-udibe Israel enyuŋ ewɔŋɔ ke ebiet mmɔ ke mben-isɔŋ Gibeah.
34Ndien tɔsin owo duop emi ekesatde ke ofuri Israel, eda ekesin ye Gibeah, ekɔŋ onyuŋ ɔsɔŋ eti-eti: edi mmɔ eken ifiɔkke, ite ke idiɔk-ŋkpɔ ekpere mmimɔ.
35Ndien Jehovah asuan Benjamin ke iso Israel: ndien nditɔ Israel esobo Benjamin ke usen oro, tɔsin owo edip ye ition, ye owo ikie: kpukpru mme mmɔ emi esio ofut.
36Ndien nditɔ Benjamin ekut ete ke mmimɔ imasuana: koro nditɔ Israel ekeyakde ufaŋ enɔ nditɔ Benjamin, koro mmɔ ebuɔtde idem mmɔ ye mbon-udibe oro mmɔ ekenimde ke mben isɔŋ Gilead.
37Ndien mbon-udibe ewara ebumere eduk ke Gibeah; ndien mbon-udibe esaŋa eka ekesuan ofuri obio ke iso ofut.
38Ndien nditɔ Israel ye mbon-udibe ekenim idiɔŋɔ kiet, ete, Yak mmɔ enam akamba nsuŋ-ikaŋ ɔwɔrɔ ke obio ɔdɔk ke enyɔŋ.
39Ntre nditɔ Israel efiak edem ke ekɔŋ, nditɔ Benjamin enyuŋ etɔŋɔ ndikpeŋe owo ŋwot ke otu nditɔ Israel, owo edip ye duop: koro mmɔ edɔhɔde, ete, Mmɔ emesobo ke iso nnyin, kpa nte ke akpa ekɔŋ.
40Ekem ediwak nsuŋikaŋ ɔtɔŋɔ ndito ke obio ndɔk nte adaha, ndien Benjamin ekabare ese edem, ndien, sese, ofuri obio asak ikaŋ ɔdɔk ke enyɔŋ.
41Ndien nditɔ Israel ekabare, ndien nditɔ Benjamin ebumere itɔk: koro mmɔ ekutde ete ke idiɔk-ŋkpɔ omosim mmimɔ.
42Ndien mmɔ ekpa edem enɔ nditɔ Israel, efeŋe eka usuŋ wilderness; edi ekɔŋ ekpehe mmɔ, ndien mmɔ eke etode ke obio esobo mmɔ ke ufɔt mmɔ.
43Mmɔ ekan Benjamin ekuk, ebine mmɔ, enyuŋ edigi mmɔ ke Menuhah, tutu ekem ye Gibeah ke edem usiaha-utin.
44Ndien tɔsin owo Benjamin efureta eduɔŋɔ, kpukpru mmɔ edi mbon uko.
45Ndien mmɔ ewɔŋɔre efeŋe itɔk eka edem wilderness, ekesim itiat Rimmon: ndien etaŋ tɔsin owo ition ke ɔkpɔ-usuŋ; enyuŋ ebine tutu osim ke Gidom, enyuŋ ewot mmɔ tɔsin owo iba.
46Ndien kpukpru nditɔ Benjamin oro eduɔŋɔde ke usen oro, esim tɔsin owo edip ye ition eke esiode ofut,
47kpukpru mmɔ edi mbon uko. Edi owo ikie itiokiet ekabare efeŋe itɔk eka edem wilderness, ekesim ke akwa itiat Rimmon: ndien mmɔ eduŋ ke Rimmon ke ɔfiɔŋ inaŋ.
48Ndien nditɔ Israel efiak edem eyom nditɔ Benjamin, enyuŋ ewot mmɔ ke iso ofut ke obio, owo, ye ufene, ye kpukpru se mmɔ ekutde: mmɔ enyuŋ ekim ikaŋ ke obio kpukpru emi mmɔ esimde.
Who We AreWhat We EelieveWhat We Do
2025 by iamachristian.org,Inc All rights reserved.
