EZEKIEL 27 - Efik Old Bible With Sectional Headings

Ikwɔ Ikpo Emi Ekwɔde Enɔ Isɔŋ Tyre

1NDIEN uyo Jehovah osim mi ete, Afo eyen owo,

2men ndien ikwɔ eseme baŋa Tyre;

3nyuŋ dɔhɔ Tyre, ete, Afo andiduŋ esuk akamba mmɔŋ, andinyam urua mme idut nnɔ ediwak isuo; ntem ke Ɔbɔŋ Jehovah ɔdɔhɔ, ete, O Tyre, afo ɔdɔhɔ, ete, Ami mmeye mma.

4Adaŋa fo edu ke esit inyaŋ; mme andikɔŋ fi emenam fi eye ama.

5Emeda cypress ke Senir enam kpukpru obukpɔk fo: emeda cedar ke Lebanon enam ito enɔ fi.

6Eda ofriyo ke Bashan enam udeŋ fo; enam deck fo ke oduk enin esine ke box eke otode ke isuo Kittim.

7Eti linen eke otode Egypt, ubɔk-usɔ abiabon, edi ɔfɔŋ-ito fo, onyuŋ edi ɔfɔŋ-etak ubom fo; purple ye ididuot eke etode ke mme isuo Elishah edi se edade efuk fi.

8Mme andiduŋ Zidon ye Arvad edi mmɔ eke ewatde fi: mme enyene-ibuot owo fo, O Tyre, edu fi ke esit; mmɔ edi mme andibɔi fi.

9Mbiowo Gebal ye mme enyene-ibuot owo esie edu fi ke esit, efak fi ndudu: kpukpru ubom mbakara ke inyaŋ ye mbio mmɔ edu fi ke esit enyuŋ enyam ŋkpɔ-urua fo.

10Persia, ye Lud, ye Put edu ke otu udim fo, edi mbon-ekɔŋ fo: mmɔ eda otu-ekɔŋ ye ndun-ukwak ekɔŋ fi ke esit; mmɔ enɔ fi ubɔŋ.

11Nditɔ Arvad ye udim ekɔŋ fo edu ke ibibene ekan ekuk; mbon uko enyuŋ edu ke mme tower fo: mmɔ eda otu-ekɔŋ mmɔ ekɔŋ ke ibibene fo ekan ekuk; mmɔ enam fi eye ama.

12Uwak kpukpru oruk inyene esin Tarshish edi owo urua fo; mmɔ eda silver ye ukwak ye idaŋ ye ŋket enyam ke urua fo.

13Javan ye Tubal ye Meshech enyam urua ye afo: mmɔ eda owo ye ŋkpɔ okpoho enyam ke urua fo.

14Mmɔ eke etode ke ufɔk Togarmah eda horse ye mbon horse ye mule enyam ke urua fo.

15Nditɔ Dedan edi mbon urua fo; ediwak isuo edi urua ubɔk fo: mmɔ eda nduk enin ye obubit eto enɔ fi ke utip.

16Uwak ŋkpɔ-usɔ fo esin Syria enyam urua ye afo: mmɔ eda emerald, ye purple, ye ŋkpɔ-usɔ abiabon, ye eti linen, ye eme, ye ruby, enyam ke urua fo.

17Idem Judah ye isɔŋ Israel edi mbon-urua fo: mmɔ eda wheat Minnith ye pannag, ye aran-ɔkwɔk, ye aran, ye balm, enyam ke urua fo.

18Uwak ŋkpɔ ubɔk-usɔ fo, ye uwak kpukpru oruk inyene esin Damascus anyam urua ye afo ke wine Helbon ye ke afia idet erɔŋ.

19Vedan ye Javan emi etode ke Uzal eda ŋkpɔ esɔk ke urua fo: mmɔ eda edisana ukwak ye cassia ye calamus enyam ke urua fo.

20Dedan ada ɔfɔŋ eke ebride ke udori horse anyam ɔbɔ fi.

21Arabia ye kpukpru mbɔŋ Kedar edi mbon urua fo: mmɔ eda ŋkpri nditɔ ufene ye okukim erɔŋ ye okpo ebot enyam enɔ fi.

22Mbon-urua Sheba ye Raamah edi mbon-urua fo: mmɔ eda ata eti ye kpukpru oruk ɔsɔŋ-urua itiat, ye gold, enyam ke urua fo.

23Haran ye Canneh ye Eden, ye mbon-urua Sheba ye Asshur ye Chilmad edi mbon-urua fo.

24Mme mmɔ emi enyam urua ye afo ke ata ediye ŋkpɔ, ke awawa ekura, ye ubɔk-usɔ abiabon, ye ekese damask emi ebɔpde ke uruk, enyuŋ enamde ke cedar, ke urua fo.

25Ubom mbakara Tarshish edi ibibene fo ye urua fo: ŋkpɔ enyuŋ eyɔhɔ fi ke esit, afo onyuŋ enyene ata ukpono ke ufɔt inyaŋ.

26Mmɔ eke ewatde udeŋ fo eda fi eduk ke akwa mmɔŋ: ofum ikɔrabak obom fi ke esit inyaŋ.

27Inyene fo, ye unyam-urua fo, ye ŋkpɔ-urua fo, mbio ubom fo, ye mmɔ eke ebɔide fi, mmɔ eke efakde fi ndudu, ye mmɔ eke esaŋade urua enɔ fi, ye kpukpru mbon-ekɔŋ fo emi edude ke esit, ye ke ofuri udim fo emi odude ke ufɔt fo, eduɔŋɔ ke esit inyaŋ ke usen iduɔ fo.

28Uyom mkpo mmɔ eke ebɔide fi esin mben obio enyek.

29Ndien kpukpru mmɔ eke ewatde udeŋ, mbon-ubom, kpukpru mmɔ eke ebɔide ke inyaŋ, eto ke ubom mmɔ esuhɔre eda ke isɔŋ;

30ndien mmɔ eyeda uyo mmɔ enam ekop ebaŋa fi, enyuŋ eseme ndot-ndot, enyuŋ emen ntan eduɔk ke ibuot mmɔ, enyuŋ emiaŋa ke ntɔŋ:

31ndien mmɔ eyenam ibɔ ebaŋa fi, enyuŋ ebɔbɔ ɔfɔŋ-ikpo ke idem, ndien mmɔ eyetua eyet ebaŋa fi ke edidoro esit, ye ke ndot-ndot eseme.

32Ndien ke eseme mmɔ ke mmɔ editibi ikwɔ ebaŋa fi, enyuŋ eseme fi ke ikwɔ, ete, Anie ebiet Tyre, ebiet enye emi esobode ke ufɔt inyaŋ?

33Ke ini ŋkpɔ urua fo etode ke inyaŋ ewɔrɔ, afo ɔyɔhɔ ediwak mme idut; afo ada uwak inyene fo, ye eke ŋkpɔ urua fo ofori ndidem ererimbot.

34Ke emi mmɔŋ omobuŋ fi ke edem; ŋkpɔ urua fo ye ofuri udim fo ke ufɔt fo edeŋ.

35Afo enyene kpukpru mme andiduŋ mben inyaŋ ndyɔ; ata ndik anam ndidem mmɔ; mmɔ enyek ke iso mmɔ.

36Mbon-urua ke otu mme idut esi fi; afo amabiara fap, udunyuŋ uduhe ke nsinsi.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help