2 ŊWED CORINTH 8 - Efik Old Bible With Sectional Headings

Ndinɔ Enɔ Nte Ɔyɔhɔ Ikɔt-Abasi

1NDITƆ-ETE mi, nnyin imɔŋ inam mbufo efiɔk ndien mfɔn Abasi, emi ekɔnɔde ke mme ufɔk Abasi ke Macedonia;

2ete, ke akwa ukut eke odomode mmɔ, uwak-ŋkan idaresit mmɔ ye ɔkpɔsɔŋ unana mmɔ akanam akwa ntarubɔk mmɔ owut idem uwak-uwak

3Koro ndi ntiense nte mmɔ ema enɔ ŋkpɔ adaŋa nte ukeme mmɔ edide, enyuŋ enɔ ebe nte ukeme mmɔ edide ke erinyime esit;

4enyuŋ esɔŋɔ ekpe ye nnyin, ebeŋe mfɔn emi, ete, iyak mme imɔ itiene inyene udeme ke erikama ikɔt Abasi.

5Mmɔ enam ebe nte ikedoride enyin; edi mmɔ ekebem iso eyak idem enɔ Ɔbɔŋ, enyuŋ eyak idem esin nnyin ke ubɔk, nte Abasi amade.

6Ntre ke inɔ Titus uyo ite, sia enye ama ɔkɔtɔtɔŋɔ utom mfɔn emi, enye okponyuŋ anam ama ke otu mbufo.

7Edi nte mbufo edade iso ke kpukpru ŋkpɔ, ke mbuɔtidem, ke eritiŋ ikɔ, ye ifiɔk, ye kpukpru ufiopesit, ye ima eke mbufo emade nnyin, eda iso ŋko ke utom mfɔn emi.

8Ndɔhɔke nnim nte ewuhɔ, edi nda ufiopesit mmɔ efen ndomo ŋwut nte ima mbufo edide akpanikɔ.

9Koro mbufo emefiɔk mfɔn Ɔbɔŋ nnyin Jesus Christ, ete, okposuk edi nte enye ekedide enyene-ŋkpɔ, ke ntak mbufo Enye akabare edi ubuene, man oto ke ubuene Esie mbufo ekabare edi mme enyene-ŋkpɔ.

10Nnyuŋ nsian se ŋkerede mbaŋa ŋkpɔ emi. Koro ɔfɔn mbufo emana enam utom emi, sia mbufo ekebemde iso etɔŋɔ isua oko, idige ndinanam ikpɔŋ, edi ndidaduak ŋko.

11Edi ke emi enam erinam oro ama; man nte mbufo ekemende idem enyime, kpa ntre ŋko erinam mma ɔwɔrɔ usuŋ, nte ukeme mbufo edide.

12Koro edieke erinyime esit odude, enem Abasi esit ndibɔ enɔ nte asaŋade ekekem ye se owo enyenede, idige nte ebede ukeme esie.

13Se ntiŋde iwɔrɔke ite, ebiomore mmɔ eŋwen mbiomo, eda efik mbufo;

14edi ɔwɔrɔ ete, mbufo ekpoduk aku ye mmɔ; nyɔhɔ-nsuhɔ mbufo ke ini emi aka ndiŋwam mmɔ ke unana mmɔ, man nyɔhɔ-nsuhɔ mmɔ onyuŋ edi uŋwam mbufo ke unana mbufo; man ɔkpɔwɔrɔ nte “ubɔk aka ubɔk ɔnyɔŋ” edide;

15kpa nte ewetde ete, Ŋkpɔ idoroke inɔ andiwobi uwak-uwak, inyuŋ inanake inɔ andiwobi esisit.

16Edi ekɔm enyene Abasi, emi ɔdɔŋde ke esit Titus ekikere mbaŋa mbufo nte nnyenede.

17Koro enye okokop uyo nnyin, edi enye ɔyɔŋ edi ke ɔtɔ mbufo ke idem esie, sia enye ekerede mbufo eti-eti.

18Nnyin inyuŋ idian enye eyen-ete kiet, emi itoro esie ke utom gospel asuanade ke kpukpru mme ufɔk Abasi;

19inyuŋ itakke ke oro, edi mme ufɔk Abasi ekonyuŋ emek enye enim, ete, edi nsaŋa nnyin ke utom mfɔn emi, eke nnyin inamde, ndinɔ Ɔbɔŋ ubɔŋ, ndinyuŋ ŋwut nte enemde nnyin.

20Itotim ikpeme, mbak owo edinyene se etiŋde adian nnyin ke akwa mfɔn emi inyenede ndida nsɔk ikɔt Abasi;

21koro imetiŋ enyin ikere se idotde, ke iso Ɔbɔŋ ye ke iso owo ŋko.

22Imonyuŋ idian mmɔ eyen-ete nnyin kiet efen, emi ikododomo enye ediwak ini ifiɔk ite, enye esin esit eti-eti ke utom, onyuŋ ɔdɔdiɔŋ esin ke utom emi akan, oto ke akwa mbuɔtidem eke enye enyenede ye mbufo.

23Ke ebupde ebaŋa Titus, enye edi abuana-utom ye ami, enye asaŋa ye ami anam ŋkpɔ ɔnɔ mbufo; ke enyuŋ ebupde ebaŋa nditɔ-ete eken, mmɔ edi mme isuŋ mme ufɔk Abasi, mmɔ edi ubɔŋ Christ.

24Enam ŋkpɔ ke iso kpukpru mme ufɔk Abasi ewut mmɔ ima mbufo, ye ntak eke idade mbufo inam mbure.