2 ŊWED CORINTH 5 - Efik Old Bible With Sectional Headings

Abasi Ɔnɔ Nnyin Iso Utom Ndinam Owo Etie ke Emem ye Enye

1KORO nnyin imɔfiɔk ite, edieke ataya eke idaŋde ke esit ke isɔŋ emi owurede, imenyene ufɔk eke Abasi ɔnɔde, eke midaha ubɔk owo ibɔp, eke ebigide ke nsinsi ke heaven.

2Koro ke ini idaŋde ke ataya emi, idu ke mmum; ke ɔdɔŋ nnyin eti-eti ndiduk nsine ebiet iduŋ emi otode heaven,

3koro ima idoduk isine ke esit, eridi Ɔbɔŋ idisimke nnyin iferi.

4Ke akpanikɔ nnyin emi idaŋde ke ataya emi idu ke mmum, koro efefihe nnyin ke esit; emi iwɔrɔke ite, nnyin iyom efɔrɔre nnyin ikpɔhidem eduɔk, edi iyom esine nnyin ŋkpɔ ke idem edori, man uwem ekpemen se inyenede ndikpa emen.

5Edi Enye emi ekebeŋede nnyin onim ɔnɔ ŋkpɔ emi edi Abasi, emi ɔkɔnɔde nnyin Spirit nte akpa ubak udeme nnyin.

6Mmɔdo nnyin ikokop isɔŋ-esit kpukpru ini, inyuŋ ifiɔk ite, adaŋa ini nte nnyin idodu ke ikpɔhidem, iduhe ɔtɔ kiet ye Ɔbɔŋ;

7(koro isasaŋa ke mbuɔtidem idu uwem, isaŋake ke erikut ke enyin);

8Ŋkɔm ikokop isɔŋ-esit, onyuŋ odu nnyin ke udɔŋ akan ndidaha ŋkpɔŋ ikpɔhidem ŋkodu ye Ɔbɔŋ.

9Emi onyuŋ esin nnyin iŋwana, ye idude uwem ye miduhe ke ini Enye edide, ndinem Enye esit.

10Koro kpukpru nnyin inyene ndiwɔrɔ nyarare ke iso itie-ikpe Christ; man owo kiet kiet ɔbɔ utip eke ekemde ye se enye akanamde ke ikpɔhidem, ye ŋkpɔ oro edide eti, ye onyuŋ edide idiɔk.

11Sia nnyin ifiɔkde ndik Ɔbɔŋ ndien, imekpe ye owo, edi imayarare iwut Abasi idem; mmonyuŋ ndori enyin nte nnyin iyarare ke esit mbufo nde.

12Nnyin itɔŋɔke ntak itoro idem inɔ mbufo, edi itiŋ, man inɔ mbufo ntak ndida mbure mbure mbaŋa nnyin, man mbufo enyene se edade ebɔrɔ mmɔ emi eburede ke nnam-ŋwut, midige ke esit.

13Koro edieke ibuot ɔbɔhɔde nnyin, ɔwɔrɔ nnyin ntre ɔnɔ Abasi; onyuŋ edieke nnyin inyenede eti ibuot, edi man ɔfɔn ye mbufo.

14Koro ima Christ efefik nnyin; koro ida ntem ite, Owo kiet ama akakpa abaŋa kpukpru owo, kpukpru owo ekpaŋa ndien;

15Enye okonyuŋ akpa abaŋa kpukpru owo, man mme odu-uwem ekudu uwem aba enɔ idem mmɔ, edi edu uwem enɔ Enye emi akakpade abaŋa mmɔ, onyuŋ esetde.

16Ntre ɔtɔŋɔde ke emi nnyin ifiɔkke owo ke ido obukidem; ekpedi nte ikɔfiɔkde Christ ke ido obukidem, ifiɔkke Enye aba ke usuŋ oro.

17Ntem edieke owo odude ke Christ, ema ebot enye obufa; ŋkani ŋkpɔ ema ebe efep: sese, emekabare edi mbufa.

18Edi kpukpru ŋkpɔ eto Abasi, emi akamade nnyin itie ke emem ye Enye ke Christ, okonyuŋ ɔnɔ nnyin utom, ete nnyin inam owo etie ke emem ye Enye;

19ete, ke Christ Abasi ke ananam ererimbot etie ke emem ye Enye, ke mibatke ndudue owo inɔ mmɔ; okonyuŋ emen ikɔ erikabare ntie ke emem ye Enye esin nnyin ke ubɔk ete ikwɔrɔ.

20Ntre ke nnyin idi mme isuŋutom emi edide ke enyiŋ Christ, nte ŋkpɔ eke Abasi adade nnyin ekpe ye mbufo; imekpe mbufo ubɔk ke ibuot Christ, ekabare etie ke emem ye Abasi.

21Abasi akanam Enye emi mikɔfiɔkke idiɔk-ŋkpɔ akabare edi idiɔk-ŋkpɔ ke ntak nnyin; man nnyin ikabare idi edinen ido Abasi ke Enye.