MATTHEW 19 - Efik Old Bible With Sectional Headings

Jesus Ekpep Ŋkpɔ Abaŋa Owo Ndisio Ŋwan Ndɔ(Mk 10.1-12)

1EDIKEM, ke ini Jesus ama ɔkɔdɔhɔ ikɔ emi ama, Enye adaha ke Galilee, edi ke mme adaŋa Judaea emi odude ke edem Jordan oko.

2Ndien ediwak otu owo etiene Enye; Enye onyuŋ anam udɔŋɔ okure mmɔ do.

3Ekem mme Pharisee edi edidomo Enye ete, Mme enen owo ndisio ŋwan esie ndɔ ke ntak ekededi?

4Edi Enye ɔbɔrɔ ete, Nte mbufo ikokotke ite, Enye emi okobotde mmɔ obot mmɔ eren ye ŋwan toto ke eritɔŋɔ?

5ŋko, Ke ntak emi owo eyekpɔŋ ete ye eka sie akadiana ye ŋwan esie, ndien mmɔ mbiba eyekabare edi obuk kiet.

6Ntre ke mmɔ idige aba owo iba, edi edi obuk kiet. Mmɔdo se Abasi ama akadian, yak owo okudianare.

7Mmɔ edɔhɔ Enye ete, Nsinam Moses etemede ndien ete ewet ŋwed usio-ndɔ enɔ ŋwan, enyuŋ esio enye?

8Jesus ɔdɔhɔ mmɔ ete, Oto nsɔŋesit mbufo ke Moses onyime mbufo esio iban mbufo.

9Edi toto ke eritɔŋɔ ikedige ntre. Edi ndɔhɔ mbufo nte, Owo ekededi eke edisiode ŋwan esie ndɔ, ke mitoho ke eridue ye erenowo, onyuŋ ɔdɔde efen, esin efibe: ndien owo emi ɔdɔde enye, ke ini ema esio enye, esin efibe.

10Mbet Esie edɔhɔ Enye ete, Edieke ŋkpɔ etiede ntem ye owo ye ŋwan esie, ifɔnke owo ndidɔ ndɔ.

11Edi Jesus ɔdɔhɔ mmɔ ete, Idige kpukpru owo ekeme ndibɔ ikɔ emi, ibɔhɔke mmɔ emi enɔde mmɔ ukeme ndibɔ.

12Koro mme eunuch edu emi emanade ntem ke idibi eka mmɔ; mme eunuch enyuŋ edu emi edide owo enam mmɔ edi eunuch; mme eunuch enyuŋ edu ŋko emi enamde idem mmɔ eunuch kabaŋa Obio Ubɔŋ Heaven. Owo eke ekemede ndibɔ, yak ɔbɔ.

13Ekem eda ŋkpri nditɔ esɔk Enye, ete Enye odori mmɔ ubɔk ɔbɔŋ akam: edi mbet Esie esua enɔ mmɔ emi edade mmɔ edi.

14Edi Jesus ɔdɔhɔ mmɔ ete, Eyak ŋkpri nditɔ, ekukpan mmɔ nditiene Mi; koro Obio Ubɔŋ Heaven edide eke oruk emi.

15Ndien Enye odori mmɔ ubɔk, onyuŋ adaha.

16Ndien sese, owo kiet etiene Enye, ete, Andikpep, ndinam nso eti ŋkpɔ man nnyene nsinsi uwem?

17Edi Jesus ete enye, Nsinam obupde Mi abaŋa se idide eti: Kiet odu emi edide eti: edi edieke oyomde ndiduk uwem, nim mbet.

18Owo oro obup Enye ete, ibet ewe? Edi Jesus ete, Kuwot owo, Kusin efibe, Kuyip inɔ,

19Kudi ntiense nsu, Kpono usɔ ye uka, Nyuŋ ma mbɔhiduŋ fo nte idem fo.

20Akparawa oro ɔdɔhɔ enye ete, Mma nnonim kpukpru ŋkpɔ emi: nso isuhɔ mi ndinam?

21Jesus ɔdɔhɔ enye ete, Edieke oyomde ndifɔn mma, ka kanyam se enyenede, da nɔ mme ubuene, ndien eyenyene inyene ke heaven: nyuŋ di disaŋa ye Ami.

22Edi ke adaŋemi akparawa okopde ikɔ oro, enye ɔnyɔŋ ye mfuhɔ, koro enye edide owo eke enyenede ediwak inyene.

23Edi Jesus ɔdɔhɔ mbet Esie ete, Ke akpanikɔ ke ndɔhɔ mbufo, ɔsɔŋ owo inyene ndiduk ke Obio Ubɔŋ Heaven.

24Mmonyuŋ ntɔŋɔ ntak ndɔhɔ mbufo nte, edi mmemmem ŋkpɔ ye camel ndibe ke odudu abiabon, akan owo inyene ndiduk ke Obio Ubɔŋ Abasi.

25Edi ke ini mbet ekopde, mmɔ eyik eti-eti, enyuŋ edɔhɔ ete, Anie ndien ekeme ndibɔhɔ?

26Edi Jesus owuk enyin ese mmɔ, onyuŋ ɔdɔhɔ mmɔ ete, Emi edi se owo mikemeke ndinam edi Abasi emekeme ndinam kpukpru ŋkpɔ.

27Ekem Peter ɔbɔrɔ Enye ete, Sese, nnyin ikɔkpɔŋ kpukpru ŋkpɔ itiene Fi; nso ndien ke nnyin idinyene?

28Edi Jesus ɔdɔhɔ mmɔ ete, Ke akpanikɔ ke ndɔhɔ mbufo nte, ke ini edinamde ŋkpɔ ekabare edi mbufa, ke adaŋemi Eyen Owo editiede ke ebekpo ubɔŋ Esie, mbufo, emi eketienede Mi, eyenyuŋ etie ke ebekpo duopeba, ekpe ikpe enɔ esien Israel duopeba.

29Ndien kpukpru owo emi ekɔkpɔŋde ufɔk, mme nditɔ-eka iren, mme nditɔ-eka iban, mme ete, mme eka, mme nditɔ, mme isɔŋ, kabaŋa enyiŋ Mi, eyebɔ utip utim ikikie, eyenyuŋ enyene nsinsi uwem.

30Edi ediwak mmɔ eke ebemde iso eyekpere edem, mme ekperedem eyenyuŋ ebe iso.