1 ŊWED CORINTH 7 - Efik Old Bible With Sectional Headings

Ukpep Ŋkpɔ Abaŋade Ŋdɔ

1YAK ntiŋ ndien mbaŋa se mbufo ekewetde ebup: ɔkpɔfɔn owo nditetre ndituk ŋwan.

2Edi mbak edito do use odu, yak owo enyene ŋwan esiemɔ, ŋwan onyuŋ enyene ebe esiemɔ.

3Yak ebe ɔnɔ ŋwan se idide udeme ŋwan: ŋwan onyuŋ anam kpa ntre ye ebe.

4Ŋwan inyeneke odudu ndida ikpɔhidem esie nnam nte ededi, edi ebe enyene odudu ke idem ŋwan: ntre ŋko ke ebe inyeneke odudu ndida ikpɔhidem esie nnam nte ededi, edi ŋwan enyene odudu ke idem ebe.

5Ekubɔ kiet eken se idide unen esie, ibɔhɔke oto erinyime nkaŋ mbiba ke ekpri ini, man mbufo esin idem ke akam, enyuŋ efiak edidiana; mbak Satan editap mbufo oto koro mbufo mikemeke ndikara esit mbufo.

6Ntiŋ emi nnɔ mbufo nte ŋkpɔ eke mbufo ekpekemede ndinam, ntiŋke nte ewuhɔ.

7Edi ɔdɔŋ mi nte kpukpru owo ekpetie nte ami. Edi kpukpru owo enyene enɔ mmɔ nsio-nsio ke ubɔk Abasi; enɔ owo kiet esin ke usuŋ emi, enɔ enye eken esin ke usuŋ efen.

8Edi mmɔdɔhɔ mmɔ eke midɔhɔ kaŋa ndɔ ye mme ebe-akpa nte, ɔfɔn ye mmɔ ke mmɔ esuk etie nte ami.

9Edi edieke mmɔ mikemeke ndikara esit mmɔ, yak mmɔ edɔ ndɔ; koro ɔfɔn ndidɔ ndɔ akan andikpa udɔŋ.

10Edi mmɔnɔ mmɔ eke ekedɔde ndɔ uyo (inyuŋ idige ami, edi Ɔbɔŋ ɔnɔ uyo), nte, ŋwan okudianare ɔkpɔŋ ebe esie;

11(edi edieke enye ama adianare, yak enye etie nte anana ebe; midige, enye anam emem ye ebe esie); ebe okunyuŋ adianare ɔkpɔŋ ŋwan esie.

12Edi ami (idige Ɔbɔŋ), nnɔ mmɔ eken uyo nte; Edieke eyen-ete enyenede ŋwan eke minimke ke akpanikɔ, ndien ŋwan oro onyimede ndiduŋ ye enye, enye okukpɔŋ ŋwan oro.

13Ŋwan eke onyuŋ enyenede ebe eke minimke ke akpanikɔ, ndien ebe oro onyimede ndiduŋ ye enye, okukpɔŋ ebe esie.

14Koro ebe eke minimke ke akpanikɔ ama akabare edi edisana ke ŋwan esie, ŋwan eke minimke ke akpanikɔ ama onyuŋ akabare edi edisana ke eyen-ete oro: midige ntre, nditɔ mbufo ikpasanake; edi kemi mmɔ esana.

15Edi edieke owo eke minimke ke akpanikɔ adianarede, yak enye aka. Ibɔpke eyen-ete eren mme eyen-ete aŋwan isin ke ufin ndɔ ke utɔ ŋkpɔ eke etiede ntem.

16Abasi okokot mbufo ete editie ke emem. Koro afo ŋwan, anam didie; ofiɔk mme afo edinyaŋa uberi? Afo ebe, onyuŋ anam didie ɔfiɔk mme afo edinyaŋa ŋwan fo?

17Edi yak kpukpru owo edu uwem nte Ɔbɔŋ ekedemede ɔnɔ mmɔ, ye ke itie eke Abasi okokotde mmɔ. Ntem ke nnim nte enam ke kpukpru mme ufɔk Abasi.

18Nte ekekot owo ke ini enye edide anambobi? Yak enye okuyom ndikabare ntie nte owo eke minaŋa mbobi. Nte ekekot owo ke ini enye minaŋa mbobi? yak enye okuna mbobi.

19Erina mbobi idige ŋkpɔ, eritre ndina mbobi inyuŋ idige ŋkpɔ; edi erinim mbet Abasi edi ŋkpɔ.

20Yak owo kiet kiet osuk odu uwem ke itie eke ekekotde enye ke esit.

21Nte ekekot fi ke adaŋemi edide ofin? Kukere; edi edieke ekemede ndiwɔrɔ ufin, da ifet oro nyaŋa idem.

22Koro owo eke Ɔbɔŋ okotde enye ke itie ufin edi eyen-isɔŋ Ɔbɔŋ. Ntre ŋko owo eke ekotde enye ke itie eyen-isɔŋ edi ofin Christ.

23Ekedep mbufo ke ekɔm-urua; ekuduk ufin enɔ owo.

24Nditɔ-ete, yak owo osuk odu uwem ye Abasi ke itie eke ekekotde enye ke esit.

25Mbɔhɔ uyo ke ubɔk Ɔbɔŋ kabaŋa mkparawa iban; edi mmɔnɔ ekikere idem mi, nte owo eke Ɔbɔŋ akatuade enye mbɔm, ete ndi owo akpanikɔ.

26Nse ntem nte, ke ntak nnanenyin eke odude ke emi, ɔfɔn owo nditie nte enye etiede.

27Nte ɔmɔbɔbɔ ke ndɔ ye ŋwan? kuyom nditara ŋkpɔŋ enye. Nte amatara ɔkpɔŋ ŋwan? kuyom aba ŋwan.

28Edi edieke afo ɔdɔde ndɔ, uduehe; edieke eyen-aŋwan ɔdɔde ndɔ, enye inyuŋ iduehe. Edi mmɔ emi enamde ntre eyekut ukut ke obukidem, ndien ɔdɔŋ mi nte mbufo ebɔhɔ ukut oro.

29Edi ndɔhɔ mbufo, nditɔ-ete, nte, esibe ini ɔmuhɔ; ntre ɔtɔŋɔde ke ini emi, yak mmɔ emi enyenede ŋwan edu uwem nte mmɔ emi minyeneke;

30mmɔ emi etuaŋade enyuŋ edu uwem nte mmɔ emi mituaha; mmɔ emi edarade enyuŋ edu uwem nte mmɔ emi midarake; mmɔ emi edepde ŋkpɔ enyuŋ edu uwem nte mmɔ emi minyeneke;

31mmɔ emi edade ererimbot enam ŋkpɔ enyuŋ edu uwem nte mmɔ emi minɔhɔke ke esit.

32Koro ido ererimbot emi ke ebebe efep. Ɔdɔŋ mi nte mbufo ekunyene ntimere-esit. Owo eke midɔhɔ ndɔ esin esit ke mbubehe Ɔbɔŋ, ete idisaŋa didie inem Ɔbɔŋ esit;

33edi owo eke ɔdɔde ndɔ esin esit ke mbubehe ererimbot, ete idisaŋa didie inem ŋwan imɔ esit.

34Ntre ke ekikere asiaha enye usuŋ iba. Ŋwan eke minyeneke ebe ye mkparawa esin esit ke mbubehe Ɔbɔŋ, ete idi edisana ke ikpɔhidem ye ke spirit; edi ŋwan eke ɔdɔde ndɔ esin esit ke mbubehe ererimbot, ete idisaŋa didie inem ebe imɔ esit.

35Mmɔdɔhɔ emi nyom ufɔn mbufo. Ndɔhɔke man nsik mbufo uruk, edi ŋkere mbaŋa ido eke odotde, man mbufo etiŋ enyin ese mbubehe Ɔbɔŋ, ŋkpɔ okufina mbufo.

36Edi ke owo esede ete imɔ inamke ŋkpɔ ye eyen imɔ aŋwan nte odotde, edieke ndɔ ɔdɔŋde enye ɔkpɔsɔŋ onyuŋ anade nte enye enyene ebe, yak owo oro anam nte amade; enye iduehe; eyak mmɔ edɔ ndɔ.

37Edi owo eke ɔsɔŋɔde enyene iwuk ke esit esie, ŋkpɔ minyuŋ iduhe ndinyik enye, enye onyuŋ enyenede ukeme ndinam se enye aduakde, onyuŋ ebierede ye esit esie, ete iyesuk imum eyen imɔ aŋwan ikama, owo emi anam nte ɔfɔnde.

38Mmɔdo ndien owo eke emende eyen esie aŋwan ɔnɔ ndɔ anam nte ɔfɔnde; edi owo eke mimenke enye inɔ ndɔ anam se ifɔnde ikan.

39Ŋwan ɔbɔbɔ ke ndɔ ke adaŋa ini nte ebe esie odude uwem; edi ebe esie ama ede, enye atara, onyuŋ enyene unen ndidɔ owo eke amade; edi yak enye ɔdɔ owo Abasi ikpɔŋ-ikpɔŋ.

40Edi ɔfɔn ye enye akan nditie ke itie esie nte ami nsede; ndien nse nte ami mmonyuŋ nnyene Spirit Abasi.